Kwamamaza

Sosiyete y’abanya-Koreya igiye gushora miliyoni 5.2 z’amadorali mu bworozi bw’amagweja

Yanditswe kuya 10-08-2016 saa 13:09' na Mukaneza M.Ange


Mu rwego rwo guteza imbere inganda zikora ubudodo, sosiyete y’abanya-Koreya HEWORKS Rwanda Silk Ltd igiye gushora miliyoni 5.2 z’amadorali mu buhinzi bw’ibobere n’ubworozi bw’amagweja.

Ni nyuma y’uko ku itariki 9 Kanama 2016, iyi sosiyete igiranye amasezerano n’ikigo cy’igihugu gishinzwe kohereza mu mahanga ibikomoka ku buhinzi n’ubworozi, NAEB.

Nk’uko bikubiye muri aya masezerano, ku ikubitiro HEWORKS Rwanda Silk Ltd izashora mu buhinzi bw’amagweja miliyoni 5.2 z’amadorali aho izagura udupfunyika twose tw’ubudodo turi mu Rwanda ndetse ikazanashyiraho Ikigo kizajya gitangirwamo amahugurwa ku borozi ndetse kikanakoreshwa nk’ituragiro.

NAEB n’iyi sosiyete bizafatanya mu gukora ubudodo buvuye mu musaruro w’amagweja witezweho kwiyongera ukagera kuri toni 500 uvuye kuri toni 7.5 ku mwaka.

Uruganda ruzajya rutunganyirizwamo ubudodo ruzubakwa na leta mu gace kagenewe inganda mu gihe HEWORKS Rwanda Silk Ltd ari yo izashyiramo imashini zizakoreshwa mu gutunganya umusaruro w’amagweja.

Umuyobozi w’Ikigo cy’igihugu gishinzwe ubworozi bw’amagweja(National Sericulture Center), Eric Mbonigaba yavuze ko HEWORKS yamaze kugura hegitari eshatu mu karere ka Rwamagana ndetse ikodesha n’izindi 20 yahise itangira guhingaho ibobere.

Minisitiri w’Ubuhinzi n’Ubworozi, Dr Gerardine Mukeshimana yashimye umusanzu w’iyi sosiyete yo muri Koreya mu guteza imbere uruganda rw’ubudodo ndetse anavuga ko leta izatanga ubufasha aho buzaba bukenewe.

Ati” Iki ni cyo gihe gikwiye cyo gushora mu bijyanye no gutunganya ubudodo. Nizera neza ko kugira umufatanyabikorwa ufite ubunararibonye bizadufasha kugera kubyo dushaka kugeraho. Ni iby’agaciro kandi tubasezeranyije gukora ibyo dushoboye byose.”

Umuyobozi wa HEWORKS Ltd, Hee Choon YANG we yashimangiye ko icyo bifuza ari ukugera ku cyo biyemeje no gukora ubucuruzi buzahindura imibereho y’abahinzi n’aborozi.

Ubuhinzi bw’ibobere n’ubworozi bw’Amagweja bwatangiye gukorerwa mu Rwanda mu 2006.

Kugira ngo amagweja atange ubudodo abanza kugaburira ibibabi by’ibobere, nyuma akaza gutera amagi ari na yo avamo ubudodo. Igweja rimwe riba rifite ubushobozi bwo gutera amagi ari hagati ya 300 na 400 ariko nyuma rigahita ripfa.

Ubudodo bukomoka ku magweja buba ari burebure cyane ku buryo rumwe rugira hagati ya metero 300 na 900.

Hee Choon Yang,Umuyobozi wa Heworks Ltd,(Ibumoso), Umunyamabanga Uhoraho muri Minagri, Innocent Musabyimana, George William Bill Kayonga, umuyobozi wa NAEB

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved