RwandAir yahawe igihembo cya sosiyete y’indege itanga icyizere cy’ahazaza ku Isi

Yanditswe na Evariste Nsengimana
Kuya 26 Ukwakira 2019 saa 04:45
Yasuwe :
0 0

Ikigo cy’Abarabu gitanga ibihembo ku bigo by’ubukerarugendo n’amahoteli (Arabian Travel Awards) cyahaye Sosiyete y’u Rwanda y’indege, RwandAir, igihembo gihabwa ikigo gitanga icyizere cy’ahazaza cy’umwaka wa 2019, kubera imikorere na serivisi inoze.

Umuyobozi uhagarariye RwandAir muri Leta Zunze Ubumwe z’Abarabu, Timothy Njihia, niwe washyikirijwe iki gihembo mu muhango wabereye Dubai kuri uyu wa Gatanu. Iki gihembo ni ubwa kabiri RwandAir icyegukanye yikurikiranya.

Umuyobozi mukuru wa RwandAir, Yvonne Manzi Makolo, yabwiye Saturday Times ko ari ikimenyetso cy’agaciro gahabwa imbaraga n’umuhate bashyira mu gutanga serivisi inoze kandi ko byongerera umuhate iyi sosiyete.

Ati “Twishimiye kongera kwakira iki gihembo cy’ishimwe gitangwa na Arabian Travel Awards. Ibi bigaragaza ko imbaraga dukoresha kugira ngo dutange serivisi inoze bihabwa agaciro ku rwego mpuzamahanga.”

Makolo yavuze ko nk’ikigo kirimo gutera imbere, icyo gihembo ‘Kiradutera umwete wo gukora cyane no gukomeza kunoza serivisi duha abakiliya’, asaba abakozi ba RwandAir gukomeza gukorana umwete n’ikinyabupfura basanganywe.

Gasore François ubarizwa mu Ishyirahamwe ry’Abatwara n’abatembereza ba mukerarugendo mu Rwanda (RTTA) yavuze ko kuba RwandAir yongeye guhabwa iki gihembo bigaragaza ko iha serivisi nziza abayigendamo kandi ikagira uruhare mu iterambere ry’ubukerarugendo ku Isi.

RwandAir ikomeje kwagura ibikorwa byayo birimo kongera ibyerekezo iganamo aho nko muri Mata uyu mwaka yafunguye icyerekezo gishya cya Kigali-Kinshasa naho muri Kamena ikaba yarafunguye icyerekezo mu mujyi Guangzhou mu Bushinwa n’i Tel Aviv muri Israel.

Muri rusange RwandAir imaze kugira ibyerekezo 29.

Ni ku nshuro ya kabiri RwandAir yegukana iki gihembo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza