Kwamamaza

“RwandAir igira uruhare runini ku mafaranga u Rwanda rwinjiza avuye mu bukerarugendo”

Yanditswe kuya 17-11-2016 saa 17:34' na Mukaneza M.Ange


Mu gihe kitageze ku myaka itandatu, Sosiyete Nyarwanda itwara abantu n’ibintu mu ndege imaze kugura indege 10 ndetse hakaba hari n’izindi ebyiri zitegerejwe mu gihe kitarambiranye.

Nubwo hari benshi babyishimira ndetse bakabibona nk’iterambere ry’igihugu, hari n’abandi ubona ko biteye impungenge bibaza niba koko amafaranga leta y’u Rwanda ikomeje gushora muri RwandAir izayagaruza.

Aba ariko, ubwo hakirwaga indege nshya ya Boeing 737- 800(Next Generation) ku wa 16 Ugushyingo 2016, Umunyamabanga wa leta ushinzwe ubwikorezi muri Minisiteri y’ibikorwaremezo, Dr Nzahabwanimana Alexis yabamaze impungenge avuga ko inyungu zituruka kuri RwandAir ziboneka mu buryo bwinshi.

Ati” Iyo ubaze amafaranga menshi ava mu bukerarugendo, ni ukubera RwandAir. Indege kugira ngo zigende mu gihugu ni uko zisangayo izikomoka muri icyo gihugu zishobora gukusanya abagenzi zikabageza hano i Kigali, noneho na zo zikabafata zibajyana ahandi ariko n’abo zizanye bakabasha kuba bava i Kigali bakerekeza mu bindi bice.”

Yakomeje avuga ko iyo ziriya ndege zije zigira amafaranga zishyura, abo zizanye nabo bakagira ibyo bakora mu gihugu bizana amafaranga ndetse n’abanyarwanda ubwabo bakabyungukiramo bakora gahunda zabo zitandukanye hirya no hino ku isi.

Ati” Izi hotel zose mubona aha i Kigali, ntabwo nzi umuntu ufite inzu ku Kicukiro uyita akajya kurara Noblezza. Ni abantu baje muri ubu buryo cyane cyane banyuze kuri iki kibuga. Ibi byinshi mubona hano muri uyu mujyi bituma uba umujyi mu rwego rwa serivisi ibyinshi bifite aho bihuriye n’amafaranga dushyira muri RwandAir.”

Umuyobozi mukuru wa Rwandair, John Mirenge we yavuze ko nubwo uyu munsi imvune zikiri nyinshi ariko mu myaka itanu cyangwa 10 iri imbere, ubwo bazaba bamaze kwishyura imyenda yose no kugaruza ayo bashoramo, abanyarwanda bazicara bagaseka bishimira ko bafite indege nziza kandi ikigo gikomeje gukura.

Mirenge yakomeje avuga ko kandi guhera mu 2017 RwandAir iteganya gutangira ingendo zerekeza Mumbai mu Buhinde, Guinee Conakry , Bamako muri Mali, Dakar muri Senegal, Harare muri Zimbabwe, Lilongwe muri Malawi na Durban muri Afurika y’Epfo, Londres mu Bwongereza na New York muri Leta Zunze Ubumwe za Amerika.

Mu kwezi gushize RwandAir yatangije ingendo i Cotonou muri Benin na Abidjan muri Côte d’Ivoire. Ubusanzwe yakoreraga ingendo mu byerekezo 19 birimo Nairobi, Entebbe, Mombasa, Bujumbura, Lusaka, Juba, Douala, Dar es Salaam, Kilimanjaro, Johannesburg, Dubai, Lagos, Libreville na Brazzaville.

Dr Nzahabwanima Alexis na John Mirenge bitegereza ahabikwa ibikapu mu ndege nshya yiswe Kalisimbi

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved