Kwamamaza

Rusizi:Hotel bijeje Minisitiri w’Intebe yanze kuzura

Yanditswe kuya 9-08-2016 saa 11:09' na Sitio Ndoli


Muri Kanama 2015, Banki itsura amajyambere y’u Rwanda (BRD) yemereye Minisitiri w’intebe Anastase Murekezi wari wasuye Akarere ka Rusizi ko Hotel Kivu Marina Bay mu mpera za Kanama 2016 izaba yuzuye.

Alex Kanyankore, Umuyobozi wa BRD yari yasobanuye agira ati “Icyadindije imirimo yari imicungire idahwitse harimo kudahuza ari ku rwego rw’abashoye imari ndetse n’abacungaga uyu mishinga ariko icyo cyarakemutse izarangira mu kwezi kwa munani umwaka utaha (2016).”

Kuri ubu iyo ugeze ahubakwa iyi hoteli, usanga imirimo isigaye kugira ngo irangire ikiri myinshi.

Umuyobozi w’Akarere ka Rusizi Harerimana Frederick mu kiganiro yagiranye na IGIHE, yavuze ko nyuma y’ibibazo byinshi byagaragayemo, uyu mwaka ugomba kurangira yuzuye.

Ati “Hari uburyo abantu bategura bavuga bati iki gikorwa turagitangira iki gihe amafaranga akabura, hari n’ibintu byari birimo bidasobanutse kuburyo bitari byoroshye ko ubwira BRD ngo zana amafaranga dushyiremo twubake, itarabanza kumenya amafaranga yashowe kuri iyi hoteli ariko uno munsi turashima aho bigeze.Ubu ubufatanye buhari ni uko byibuze uyu mwaka warangira hoteli yuzuye.”

Nubwo meya avuga ko uyu mwaka uzarangira yuzuye, hari abayikoraho batabibona kimwe.

Kamali (izina ryahinduwe) yagize ati “Urareba ntihari hajyaho imiryango, amadirishya n’ibindi byinshi nawe urabibona, cyokoze izuzura mu mpera z’umwaka utaha.”

Bamwe mu batuye umujyi wa Rusizi bemeza ko iyi hoteli yatinze ukurikije igihe yatangiriye kubakwa, bakavuga ko iri dindira riri muri bimwe bituma umujyi wa Rusizi udatera imbere.

Kubwimana Evariste ati “urareba umujyi wacu ntutera imbere nk’indi mijyi, iriya Hoteli ni imwe mu byagaragaza umujyi ariko reba igihe imaze yubakwa.”

Hotel Kivu Marina Bay iri ku rwego rw’inyenyeri 5, izuzura itwaye miliyoni 20 z’amadorari y’Amerika ku bufatanye na Kiliziya Gatorika diocese ya Cyangugu ndetse n’uturere tugize intara y’uburengerazuba.Yitezweho kuzamura ubukerarugendo muri iyi ntara no guhuza umujyi wa Bukavu na Rusizi.

Iyi hoteli yatangiye kubakwa mu mwaka wa 2008, iza kubamo ibibazo byo kunyereza amafaranga ndetse isosiyete yari yarahawe kuyubaka irayamburwa ihabwa abandi.

Iyi hoteli bigaragara ko ikibura byinshi ngo yuzure
Iyi hoteli yahawe sosiyete y'Abashinwa ngo ibe ariyo ikomeza imirimo yo kuyubaka

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved