Rubavu: Abaturage beretswe inyungu iri mu kugura imigabane ya Leta iri muri I&M Bank

Yanditswe na Mukwaya olivier
Kuya 1 Werurwe 2017 saa 08:44
Yasuwe :
0 0

Ubuyobozi bwa Minisiteri y’Imari n’Igenamigambi, Minecofin, ubwa I&M Bank ku bufatanye n’Ikigo cy’Igihugu cy’Isoko ry’Imari n’Imigabane bwakanguriye abaturage batuye mu Karere ka Rubavu kugura imigabane ya Leta iri muri I&M Bank, bubagaragariza inyungu babifitemo.

Mu kiganiro aba bayobozi bagiranye n’abaturage bo muri aka Karere, kuwa Mbere, tariki ya 27 Gashyantare 2017, bagaragaje ko kuba leta yarashyize ku isoko imigabane yayo yari muri I&M Bank ingana na 18.9%, biri mu rwego rwo guha amahirwe Abanyarwanda mu gushora imari.

Ibi bizatuma inyungu iba nyinshi ku baturage mu rwego rwo kubafasha kunguka ndetse n’ibikorwaremezo bikarushaho kwagurwa.

Umwe mu bacuruzi bakorera mu Mujyi wa Rubavu, Hamudara Bertin, avuga ko hakenewe ibisobanuro byimbitse kuko iki gikorwa cyo kugura imigabane kije ari gishya.

Ati “ Sinjye njyenyine hari benshi batarasobanukirwa n’ibijyanye no kuba imigabane iri muri banki yashyirwa ku isoko; hari abumva ko yaba yahombye, cyane ko yagiye inahindura amazina kenshi ubwo rero tubonye ibisobanuro byimbitse byadufasha.”

Umuyobozi Ushinzwe Umutungo wa I&M Bank, Gatashya John, avuga ko kuba iyi migabane leta yari ifite muri banki igiye ku isoko atari ukuvuga ko banki yahombye nkuko bamwe mu baturage babigarutseho.

Ati “Nyuma yo kugura imigabane umuturage azaba afite uburenganzira aho ikigo kizajya kimwungukira, kandi noneho murabona leta irimo kubaka ibikorwaremezo bikomeye abaturage rero bazabona inyungu ndetse banabyaze umusaruro ibyo bikorwa remezo.”

Uyu muyobozi akomeza avuga ko kuba leta ikangurira abaturage kugura imigabane atari uko yabuze umushoramari uza akayigura yose ahubwo ari amahirwe ibaha, kandi ko ishinzwe guteza imbere ibikorwa bizamura abaturage bayo.

Umuyobozi ushinzwe Itangazamakuru mu Kigo cy’Isoko ry’Imari n’Imigabane (Capital Market Authority), Migisha Magnifique, avuga ko aya ari amahirwe akwiye kubyazwa umusaruro n’abaturage yemeza ko kuba imigabane washyizwe ku isoko atari banki yahombye ahubwo ari Guverinoma y’u Rwanda ishaka kuyakoresha mu bikorwa by’iterambere.

Yagize ati “Aya ni amahirwe yahawe Abanyarwanda bose babyifuza, ngo bayabyaze umusaruro, ariya mafaranga bazashora azakomeza yunguke kuko ikigo kirizewe kandi n’ibikorwa remezo bikorwe babibyaze umusaruro rero turabakangurira gushora imari kandi bakagira umuco wo gushora ahunguka.”

Iyi migabane yashyizwe ku isoko ry’imari n’imigabane ry’u Rwanda kuwa 14 Gashyantare 2017. Abanyarwanda bahawe 60% by’imigabane naho ababa hanze bahabwa agera kuri 40 % by’igurishwa yose. Nibura imigabane mike umuntu ashobora kugura ikaba ari 1000 ndetse umwe ukaba ugura amafaranga 90.

Minecofin yasobanuye ko kugurisha iyi migabane bizarangira kuwa 10 Werurwe 2017, kugira ngo amakuru agendanye n’iyi migabane ndetse n’impapuro zuzuzwa n’abayigura zigere ku bashoramari bose mu gihugu no mu Karere ka Afurika y’Iburasirazuba kandi ku gihe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza