Kwamamaza

Kigali:Hatangiye kubakwa amacumbi 561 agenewe ab’amikoro aciriritse

Yanditswe kuya 5-08-2016 saa 11:38' na Tombola Felicie


Si umuntu wese ubasha kwiyubakira inzu mu mujyi wa Kigali bitewe n’ubushobozi bucye hagendewe ku gishushanyombonera, ikaba ari yo mpamvu RSSB yatangiye kubaka amacumbi 561 aciriritse azunganira gahunda yo gukemura iki kibazo.

Aya macumbi yatangiye kubakwa na RSSB ku bufatanye na Minisiteri y’Ibikorwa remezo, iy’Ingabo n’Umujyi wa Kigali bikaba biteganyijwe ko muri Kamena umwaka utaha azaba yuzuye.

Azaba ari amacumbi bivugwa ko aciriritse ugereranyije n’andi RSSB yubatse hirya no hino mu mujyi wa Kigali yamaze kugurwa.Agenewe abakozi ba leta n’abikorera ariko b’amikoro aciriritse.

RSSB itangaza ko ku bufatanye n’Umujyi wa Kigali n’amabanki y’ubucuruzi hazakorwa igenzura hakarebwa umushahara ndetse n’umutungo w’umuntu uzaba ushaka kugura inzu kuko nta muherwe uyemerewe.

Mu imurikagurisha mpuzamahanga ririmo kubera i Kigali ku nshuro ya 19, Ikigo cy’Igihugu cy’Ubwiteganyirize mu Rwanda RSSB kirimo gusobanurira abakigana aho imirimo yo kubaka ayo macumbi igeze n’igihe abashaka kuzayagura bazatangira kwiyandikisha.

Mu kiganiro IGIHE yagiranye na Viviane Akili, umukozi wo mu biro by’itangazamakuru muri RSSB yavuze ko impamvu yo gusobanurira abagana Expo iby’amacumbi yatangiye kubakwa mu karere ka Gasabo, Umurenge wa Kinyinya, Akagari ka Kagugu ahitwa i Batsinda, ari uko hari abatabizi nyamara aya mazu yaragenewe ab’amikoro yitwa ko ari macye kandi ko mu kwezi k’Ukuboza uyu mwaka abazaba bashaka kuyagura bazaba baratangiye kuyafat.

Ati” Turashaka ko abatugana muri iyi expo bamenya ko ubu imirimo yo kubaka yatangiye muri Kamena 2016 kandi ko ayo macumbi uko ari 561 azaba yamaze kubakwa muri Kamena 2017, bityo mu Kuboza uyu mwaka abazashaka kuyagura bakazaba barimo kwiyandikisha.”

RSSB ivuga ko itaheje abafite ubushobozi buhambaye kuko aribo yabanje kubakira amacumbi i Gaculiro (Vision City & 2020 Estate) ndetse n’i Kagugu (Umucyo Estate).

Amacumbi azubakwa i Batsinda yose ni amagorofa hakazaba harimo isoko, aho bategera imodoka, amashuri, amaduka, inzu z’imyidagaduro n’ibindi bikoresho byose abantu bakenera ngo babashe kubaho neza.

Ibiciro by’amacumbi bihera ku mafaranga miliyoni 25 kugeza kuri Miliyoni 32 z’amafaranga y’u Rwanda bitewe n’ibyumba inzu umuntu ashaka ifite.

Kuri ubu imirimo yo kubaka igeze ku kigero cya 10% nyuma y’amezi abiri itangiye bikaba biteganywa ko muri Kamena 2017 izaba irangiye ari na bwo amabwiriza y’ubugure azashyirwa ahagaragara.

Nubwo hazaba ari mu magorofa, uwaguze inzu azaba afite uburenganzira bwo kuzayigurisha no kuba yayitangaho ingwate kuko izaba ari iye bwite.

Si muri Kigali gusa RSSB ikora ibikorwa byo kubaka amacumbi aciriritse kuko hari inzu zuzuye i Nyagatare zigurishwa ndetse n’indi mishinga myinshi igenda ikora.

Hirya no hino mu mu turere tugize Umujyi wa Kigali hari kugenda hubakwa amacumbi aciriritse muri gahunda yo kubaka amacumbi rusange ibihumbi 10 yo muri uru rwego.

Uko amacumbi yubakwa i Batsinda azaba ateye namara kuzura

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved