Kwamamaza

Perezida Kagame yakiriye Umuyobozi wa Marriot ku Isi wamwijeje kubaka indi hoteli

Yanditswe kuya 5-10-2016 saa 19:49' na Rabbi Malo Umucunguzi


Perezida Paul Kagame yakiriye Arne M. Sorenson uyobora Marriott International, aho ubuyobozi bw’uru rwunge rwa hoteli bwamugaragarije ko bugiye kubaka mu Rwanda indi hoteli igezweho ya Sheraton, mu mwaka utaha wa 2017.

Uyu muyobozi yari mu Rwanda aho yitabiriye ifungurwa rya Kigali Marriott Hotel, hoteli y’inyenyeri eshanu igizwe n’ibyumba 254 birimo n’icyo ku rwego rw’aba Perezida, yafunguwe ku mugoroba wo kuri uyu wa Kabiri tariki 04 Ukwakira 2016.

Muri Village Urugwiro, Sorenson yashimiye Perezida Kagame ubufasha guverinoma y’u Rwanda yatanze kugeza ubwo iyi hotel ifunguwe mu Mujyi wa Kigali, anamugaragariza gahunda nshya y’iki kigo mu Rwanda mu gihe kiri imbere.

Nyuma y’ikiganiro n’Umukuru w’Igihugu, Sorenson yabwiye itangazamakuru ko baganiriye ku ngingo zigaruka ku ishoramari.

Ati “Twaganiriye ku ishoramari rya hoteli, ingendo, ubukerarugendo mu Rwanda, bigaragara ko bijyana n’ibintu bitandukanye birimo ibikorwaremezo, uburyo bwo kubona Visa no kumenyekanisha u Rwanda nk’igihugu cyo gukoreramo ingendo.”

Kuwa 23 Nzeri 2016 nibwo Marriott International yatangaje ko yarangije kugura ikigo cya hoteli, Starwood Hotels & Resorts Worldwide kuri miliyari hafi $13, bituma iba iya mbere ku Isi mu mahoteli, aho ifite hoteli zigera ku 5700 zihurira ku mazina (brands) 30.

Ayo mahoteli yose hamwe afite ibyumba bisaga miliyoni 1.1 mu bihugu bisaga 110, Hoteli ya Kigali Marriott ikaba iya mbere muri Afurika yo munsi y’ubutayu bwa Sahara ifite izina ‘Marriott’. Indi irisanganywe iri mu Misiri nubwo hari andi menshi abarizwa muri Marriott International.

Sorenson yakomeje agira ati “Dufite amazina 30 ahuriramo hoteli 150 zikorera muri Afurika n’izindi 50 ziri kubakwa. Muri Kigali twasinyanye amasezerano ya Sheraton izatangira kubakwa mu mwaka utaha, kandi mu myaka iri imbere turifuza gukomeza guterana imbere n’u Rwanda.”

“Turatekereza ko nko mu cyiciro gikurikira cyareba mu nyenyeri eshatu, hamwe n’andi mazina nka Protea, Courtyard cyangwa Sheraton Four Points, dutekereza ko hazaba ari muri Kigali cyangwa ku yandi masoko mu Rwanda.”

Sorenson yashimiye Perezida Kagame ubufasha guverinoma y’u Rwanda yatanze kugeza ubwo iyi hotel ifunguwe mu Mujyi wa Kigali

Sorenson w’imyaka 57, yavuze ko isoko ryo kwakira abantu mu Rwanda rimaze gutera imbere kandi ritanga icyizere, ndetse “iterambere rya hoteli rishingira ku iterambere ry’ubukungu, ku buryo uko ubukungu buzamuka ari na ko byoroha gukora ubucuruzi.’’

Umuyobozi w’Ikigo cy’Igihugu cy’Iterambere, RDB, Francis Gatare, yavuze ko ifungurwa rya Marriott Hotel mu Rwanda bikozwe n’ikigo nka Marriott International gifite hoteli nyinshi ku Isi, ari ishema ku gihugu.

Ati “Kuba bafata iya mbere kuza gushora imari mu gihugu cyacu no gufatanya na guverinoma yacu mu guteza imbere ubukerarugendo n’ubucuruzi mu mahoteli, biradushimishije.”

“Ni n’amahirwe mu gukomeza muri ubwo bucuruzi kuko mu gihugu cyacu hari inama ihuje abakora ubucuruzi mu mahoteli, Africa Hotel Investment Forum, irimo abayobozi batandukanye baturutse hirya no hino ku Isi. Biraduha amahirwe yo kuzana abandi bashoramari muri ubu bucuruzi.”

Sorenson kandi ‘yashimye Perezida Kagame kuba RwandAir ikomeza gukura, gufungura inzira nshya no kugura izindi indege, kuko bizakomeza kuzana abashyitsi mu gihugu no guteza imbere ubukerarugendo, ari bwo ubucuruzi bwa hoteli bushingiyeho.”

Ubukerarugendo nibwo bwinjiriza u Rwanda amadovize menshi, aho mu 2015 yabaye miliyoni $342, yiyongeraho 10% ugereranyije na 2014. Guverinoma y’u Rwanda ifite intego ko ubukerarugendo byajya bwiyongeraho 25% buri mwaka.

Perezida Paul Kagame mu biganiro na Arne M. Sorenson uyobora Marriott International
Perezida Paul Kagame asuhuza Arne M. Sorenson
Sorenson yavuze ko isoko ryo kwakira abantu mu Rwanda rimaze gutera imbere kandi ritanga icyizere
Umuyobozi w’Ikigo cy’Igihugu cy’Iterambere, RDB, Francis Gatare, yavuze ko ifungurwa rya Marriott Hotel mu Rwanda ari ishema ku gihugu.

Amafoto:Village Urugwiro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved