Kwamamaza

Leta igiye gushyiraho uburyo bwo kuzigamira izabukuru ku baturage bose

Yanditswe kuya 14-09-2016 saa 21:37' na Rabbi Malo Umucunguzi


Guverinoma y’u Rwanda igiye gutangiza uburyo bushya bw’igihe kirekire bwo kwizigamira, aho amafaranga azajya atangwa n’umunyamuryango yose azaba ari aye kimwe n’inyungu azaba yarabyaye, akamugoboka ubwo azaba atagishoboye kwikorera.

Inama y’Abaminisitiri yateranye kuri uyu wa Kabiri, tariki ya 13 Nzeri 2016, niyo yemeje Umushinga w’Itegeko rishyiraho ubu bwizigame bw’igihe kirekire rikanagenga imitunganyirize yabwo.

Minisitiri w’Imari n’Igenamigambi, Amb. Gatete Claver mu kiganiro we n’abandi baminisitiri bagiranye n’itangazamakuru kuri uyu wa Gatatu, yavuze ko leta yagiye ishyira imbaraga nyinshi muri gahunda ziteza imbere abaturage zirimo mutuelle de santé, mu gihe nka mbere ubwishingizi bw’ubuzima bwishyurwaga n’abafite umushahara gusa.

Ati “Ariko ibyo ntabwo bihagije, ubundi habaho kwizigamira izabukuru. Kimwe n’ibindi bihugu byose biri mu nzira y’amajyambere, ntabwo abantu bose bakora, ariko noneho usanga abakora aribo bafata igice cy’umushahara kugira ngo bizigamire noneho nibageza mu gihe cy’izabukuru bazabone ikibatunga.’’

‘‘Ahangaha twasangaga abantu bakoraga bizigamiraga muri RSSB ari 10% gusa by’abantu bose bakora. Ariko twe turashaka ko n’Abanyarwanda bose, ari umuhinzi, ari umworozi, ari uri mu cyaro, ari uwikorera, uwo ariwe wese, nawe agire ikintu yizigama.’’

Minisitiri Gatete yavuze ko ikigamijwe ari ukugira ngo buri Munyarwanda wese agire ikizamutunga mu zabukuru, ari mu gihe ataragera aho ngaho abone uko yivuza, abone icumbi, abone uburezi bw’abana n’ibindi.

Yakomeje agira ati “Ubundi nk’abantu basanzwe bizigamira iza bukuru, usanga bamenyereye y’uko utanga amafaranga runaka buri gihe, noneho ukaba uzi n’amafaranga uzabona n’ujya mu zabukuru. Ahangaha ntabwo ariko bimeze. Ni ukuvuga ngo amafaranga yose utanga ni ayawe, n’iyo nyungu na yo ni iyawe. Byose biterwa n’ayo ushyiramo kandi ntabwo ari ukuvuga ngo igihe icyo aricyo cyose urashyiramo amafaranga runaka, ni amafaranga yose ushoboye.”

Uko ayo mafaranga azakoreshwa ishoramari

Minisitiri Gatete yavuze ko leta izashyiraho uburyo bufasha abakoresha ubu bwizigame, Iteka rya Minisitiri w’Intebe rikazashyiraho ikigo gishinzwe gucunga ayo mafaranga ku buryo hanifashishijwe ikoranabuhanga ayo amafaranga azaba afite umutekano usesuye kandi agakurikiranwa ku nyungu z’Abanyamuryango bose.”

Ati “Uburyo bwo kuyabyazamo andi mafaranga nabwo hazashyirwaho izindi nzego zizayashoramo imari kugira ngo ziyabyazemo inyungu. Ni inzego zisanzwe zikora ku Isi, ntabwo ari buri muntu wese wabikora kandi agomba kubona ibyangombwa bya Banki Nkuru y’Igihugu.’’

Leta izagena uburyo bwo gushishikariza abantu gukoresha ubu bwizigame, ku buryo ishobora no gufata umwanzuro wo kuvuga ngo “nushyiramo ayangaya hari n’andi tuzakongera n’ahandi nta musoro uri bwishyure”, byose bizajya bigera ku bafite ishoramari muri ayo mafaranga.

Minisitiri Gatete yavuze ko hari icyizere ko bizakora, kuko mu 2014 guverinoma yakoze inyigo yifashishije Ikigo cy’Abanyamerika, mu 2015 ikoresha ikigo cy’Abahinde cyerekanye uko bizakora, uko abantu bazanabasha gutanga imisanzu bakoresheje telefoni, kuburyo imyiteguro ihagije yakozwe.

Ati “Ni ikintu kizahoraho, ariko ubundi kugira ngo amafaranga yawe ubu muri iri tegeko twashyizemo imyaka 55 yo kugira ngo uzajye ubona ku mafaranga yawe igice runaka, kuzageza igihe uzasazira. Niba hari amafaranga yandi asigaye ushaka kuyasigira abana, ushaka kuyasigira umuryango, ibyo ni wowe ubigena.’’

Biteganyijwe ko ubu bwizigame bw’izabukuru buzakoreshwa ku bantu yaba ufite umushahara, uwikorera na koperative kugeza ku mwana uri munsi y’imyaka 16, hagamijwe ko buri Munyarwanda azabone ubwizigame bwe buherekejwe n’inyungu amafaranga ye yabyaye.

Inama ya 13 y’Umushyikirano yahuje abayobozi bo mu nzego zinyuranye ku wa 21 na 22 Ukuboza 2015, mu myanzuro 13 yafashwe, uwa 10 wagarukaga ku gushishikariza Abanyarwanda b’ingeri zose kugira umuco wo kwizigamira harimo no guteganyiriza iza bukuru, nyuma yo gusanga 90% by’Abanyarwanda batagira ubwo bwiteganyirize.

Minisitiri ushinzwe imirimo y'Abaminisitiri, Stella Ford Mugabo
Ambasaderi Claver Gatete, Minisitiri w'Imari n'Igenamigambi na Evode Imena, Umunyamabanga wa Leta ushinzwe ubucukuzi bw'amabuye y'agaciro
Abanyamakuru bitabiriye ikiganiro cyakurikiye ibyemezo by'Inama y'Abaminisitiri byo ku wa 13 Nzeri
Minisitiri w'Imari n'Igenamigambi, Amb. Claver Gatete

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved