Kwamamaza

Koreya y’Epfo: Dr Uzziel Ndagijimana yakomoje ku kamaro k’ubufatanye bwa Leta n’abikorera

Yanditswe kuya 2-11-2016 saa 09:44' na Jean PierreTuyisenge


Umunyamabanga wa Leta muri Minisiteri y’Imari n’Igenamigambi ( Minecofin), ushinzwe igenamigambi, Dr.Uzziel Ndagijimana, yagarutse ku kamaro ko gufatanya hagati y’ibigo byigenga n’ibya Leta, avuga ko ari inzira nyayo yo gukemura ibibazo bigaragara mu ishoramari bitewe no kubura ibyangombwa bihagije kugira ngo rirusheho gutera imbere cyane mu bihugu bikiri mu nzira y’amajyambere.

Ibi yabitangarije muri Koreya y’Epfo mu cyumweru gishize aho yitabiriye inama y’abaminisitiri y’iminsi itatu yiga ku bufatanye mu by’ubukungu hagati ya Afurika na Koreya y’Epfo (KOAFEC) ifite insanganyamatsiko igira iti “Guhindura iterambere ry’Ubuhinzi bwa Afurika binyuze mu guteza imbere inganda n’ubukungu buhuriweho.”

Avuga ku kamaro k’imikoranire hagati y’ibigo bya Leta n’ibyigenga mu kwihutisha iterambere, Ndagijimana yavuze ko ikibazo kigihari ari uko usanga ishoramari mu bigo bya Leta rihenze kandi ugasanga ahanini ritorohereza ibigo byigenga bishaka gushoramo imari.

Yongeyeho ko hari n’igihe usanga Leta ifite ibikoresho bihagije, ariko idafite ubushobozi bufatika bwo kubikoresha neza no kubibyaza umusaruro.

Yagize ati “ Zimwe mu ntego u Rwanda rufite mu cyerecyezo 2020, ni uguteza imbere ubukungu burangajwe imbere n’urwego rw’abikorera. Ni muri urwo rwego u Rwanda rwakoze amavugurura atandukanye mu bukungu hagamijwe korohereza abashaka gukorera ubucuruzi mu Rwanda yaba abigenga cyangwa abashaka gufatanya na Leta.”

Yatanze ingero ku bikorwa bitandukanye Leta ifatanyamo n’abikorera ku giti cyabo harimo nk’urugomero rw’amashanyarazi rwa Mutobo, urwa Nyabarongo, n’igice kiberamo imurikagurisha. Yavuze kandi ko hari indi mishinga ihuriweho na Leta n’abikorera irimo ishingiye ku ikoranabuhanga, ingufu, ubwikorezi, amazi, no gutunganya ibikomoka ku buhinzi.

KOAFEC yakoze ibikorwa by’iterambere ku mugabane wa Afurika ahanini bishingiye ku ikoranabuhanga, ubuhinzi, ibikorwa remezo, ibishingiye ku bidukikije, inasangiza inzira Koreya yaciyemo kugira ngo itere imbere.

Iyi nama y’uyu mwaka yahuje abaminisitiri n’izindi ntumwa zituruka ku mugabane wa Afurika no muri Koreya, abahagarariye imiryango n’ibigo bya Leta, inzego z’abikorera, abahanga n’abahagarariye itangazamakuru.

Mu mwaka wa 2006 nibwo Minisiteri y’Imari n’igenamigambi muri Koreya, Banki Nyafurika Itsura Amajyambere (BAD), na Banki igenzura ibyinjira n’ibisohoka muri Koreya bishyize hamwe binyuze mu bufatanye hagati ya Afurika na Koreya y’Epfo bwiswe KOAFEC.

Umunyamabanga wa Leta muri Minisiteri y'Imari n'Igenamigambi ( Minecofin), ushinzwe igenamigambi, Dr.Uzziel Ndagijimana, yashimangiye ko imikoranire hagati y'ibigo byigenga n'ibya Leta bitanga umusaruro urambye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved