Inyungu ya Equity Group inafite ishami mu Rwanda yiyongereyeho 10%

Yanditswe na Evariste Nsengimana
Kuya 3 Kanama 2019 saa 04:14
Yasuwe :
0 0

Ikigo gitanga serivisi z’imari gikomoka muri Kenya, Equity Group Holdings Plc, cyatangaje ko inyungu cyagize mbere yo kwishyura umusoro mu gihembwe cya mbere cya 2019 yiyongereho 10%, ikagera kuri miliyoni $164.81.

Imibare yashyizwe ahagaragara ku wa 1 Kanama, igaragaza ko urwunguko muri rusange kuri iki kigo gifite amashami mu bihugu birimo Uganda, Tanzania, Sudani y’Epfo, Repubulika ya Demokarasi ya Congo n’u Rwanda, rwazamutseho 9%.

Umuyobozi mukuru wa Equity Group Holdings Plc, Dr. James Mwangi, yatangarije abashoramari ko inguzanyo iki kigo cyahaye abakiliya ziyongereyeho 17% mu gihe cyari cyihaye intego yo kuzongera hagati ya 10-15%.

Ubuyobozi bw’iki kigo buvuga ko ibigo bigishamikiyeho byo mu bihugu byo mu Karere byagize uruhare rwa 18% mu kwiyongera kw’inyungu rusange.

Umutungo mbumbe w’iki kigo wo wiyongereyeho 18% ugera kuri miliyari 638.7 z’amashillingi ya Kenya, avuye kuri miliyari 542.02 z’amashillingi yabarwaga mu gihe nk’icyo mu mwaka ushize.

Muri Mata uyu mwaka nibwo byatangajwe ko Equity Group na Atlas Mara byemeranyije igurana ry’imigabane, rizagera no kuri Banki y’Abaturage y’u Rwanda (BPR) n’izindi banki zo muri Tanzania, Zambia na Mozambique.

Equity Group Holdings Plc yavuze ko izahabwa imigabane 62% Atlas Mara ifite muri BPR na 100% by’imigabane muri African Banking Corporation Tanzania Limited, African Banking Corporation Zambia Limited na African Banking Corporation Mozambique Limited.

Atlas Mara yo izahabwa imigabane miliyoni 252 muri Equity Group Holdings Plc ingana na 6.27% muri iki kigo gikomeye muri Kenya. Biteganywa ko icyo gikorwa kizaba gifite agaciro ka miliyari 10.7 z’amashillingi ya Kenya (miliyoni $106).

Dr. James Mwangi yavuze ko ibiganiro bigikomeje kandi ubushake bugihari.

Equity Group ikomeje kwagura ibikorwa byayo mu karere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza