Ubucukuzi bw’amabuye y’agaciro bwatewe inkunga yitezweho kubuzahura

Yanditswe na Evariste Nsengimana
Kuya 3 Ukwakira 2017 saa 09:55
Yasuwe :
0 0

Umuyobozi Mukuru w’Ikigo cy’Igihugu gishinzwe Mine, Gaz na Peteroli, Gatare Francis, yatangaje ko ku bufatanye n’abaterankunga, u Rwanda ruri gukora ibishoboka byose ngo ruzamure umusaruro w’ubucukuzi bw’amabuye y’agaciro bwagiye bugira ibibazo birimo gucukurwa n’abatarabigize umwuga no kudahabwa agaciro ku isoko mpuzamahanga.

Yabitangaje kuri uyu wa 3 Ukwakira 2017, mu muhango wo gutangiza umushinga wo kuzamura ubucukuzi bw’amabuye y’agaciro watewe inkunga n’Umuryango Mpuzamahanga w’Abongereza, DFID.

Uyu mushinga ukubiyemo ingamba zo kongerera ubumenyi n’ubushobozi abacukuzi b’amabuye y’agaciro no kubafasha kubona ibikoresho binyuze mu kubegereza aho babikura n’ibindi bakenera nk’imyambaro no guhuza amakuru ajyanye no kumenya aho amabuye aherereye.

Bimwe mu bibazo byugarije ubucukuzi bw’amabuye y’agaciro mu bihe byashije, Gatare yavuze ko uyu mushinga uzakemura harimo kuba bukorwa n’abafite ubumenyi buke n’intambara zo muri Congo mu bihe byashize n’ibindi bituma umusaruro ubura.

Yagize ati “Ubucukuzi bw’amabuye y’agaciro mu gihugu cyacu bushobora gutanga umusaruro mwinshi ku iterambere ry’igihugu cyacu ariko ntibyagiye bishoboka kubera imbogamizi nko kuba harakunze kwibandamo abacukuzi bato bacirirtse, bakoresha ibikoresho bya gakondo n’ishoramari ricirirtse. Kubera iyo mpamvu, umusaruro ugahora ari muke n’uburyo bwagiye bukorwa ugasanga kenshi bitujuje ubuziranenge bukenewe hahandi abakoramo bakwiye kuba bafite ibikoresho bikenewe, barinzwe ku buryo impanuka zigabanuka n’ababikora bafite ubumenyi kugira ngo umusaruro wiyongere.”

Yongeye ati “Ubucukuzi bw’amabuye y’agaciro mu gihe cyashize, kubera akarere dutuyemo bwugarijwe n’izina ribi rijyanye n’amabuye y’agaciro ajyanye n’intambara zari muri Congo. Kubera iyo mpamvu, hashizweho gahunda yo gukurikirana aho yacukuwe, yagurishirijwe, inzira yanyujijwemo kuyageza ku isoko. Ibyo byatumye abashoramari benshi badashora amafaranga yabo.”

Yakomeje asobanura ko hashize imyaka irindwi u Rwanda ruri gukora ibishoboka byose ngo amahanga amenye ko amabuye akomoka mu Rwanda yujuje ubuziranenge, ko n’uyu mushinga watangijwe uzunganira ingamba zisanzwe aho yagize ati “Igihe tugezemo uyu munsi, ni aho abashoramari batangiye kugarukira ubucukuzi bw’amabuye y’agaciro akaba ariyo mpamvu twakoranye n’aba bafatanyabikorwa kugira ngo dushobore kugenda tugana abo bashoramari tubagaragariza uko buteye mu Rwanda kugira ngo ishoramari ryiyongere.”

Umuyobozi ukuriye itsinda rishinzwe kuzamura ubukungu muri DFID, Kato Kimbugwe, yavuze ko uyu mushinga ugamije gufatanya na Leta y’u Rwanda gukuraho imbogamizi zose ubucukuzi bw’amabuye y’agaciro buhura nazo zirimo korohereza abashoramari kubona serivisi z’imari, gutunga no kongerera agaciro umusaruro w’amabuye y’agaciro n’ibindi bizagira uruhare ku iterambere ry’ubucukuzi n’iry’igihugu muri rusange.

Uyu mushinga washowemo asaga miliyoni enye z’amapawundi, yatangiye gukoreshwa kuva muri Mata 2017, ukaba uzamara imyaka itatu.

Ikigo cy’Igihugu gishinzwe Mine, Gaz na Peteroli gitangaza ko umusaruro w’ibyo u Rwanda rwashoye hanze bikomoka ku bucukuzi bw’amabuye y’agaciro byari miliyoni 200 z’amadorali ariko ko ubu bufatanye buzatuma mu 2024 ugera kuri miliyari imwe n’igice y’amadorali.

Umuyobozi Mukuru w’Ikigo cy’Igihugu gishinzwe Mine, Gaz na Peteroli, Gatare Francis
Umuyobozi ukuriye itsinda rishinzwe kuzamura ubukungu muri DFID, Kato Kimbugwe, yavuze ko uyu mushinga ugamije gufatanya na Leta y’u Rwanda gukuraho imbogamizi zose ubucukuzi bw’amabuye y’agaciro buhura nazo
Umuyobozi w'Ikigo cy'igihugu gishinzwe kurengera ibidukikije, REMA, Eng. Collette Ruhamya(iburyo) na we yari yitabiriye iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza