Imishinga ikomeye u Rwanda rwaboneye abashoramari mu 2017

Yanditswe na Cyprien Niyomwungeri
Kuya 31 Kanama 2018 saa 10:26
Yasuwe :
0 0

Umwaka wa 2017, wasize u Rwanda rwungutse abashoramari mu mishinga umunani ikomeye irangajwe imbere n’uw’Ikibuga Mpuzamahanga cy’indege cya Bugesera kirimo kubakwa n’abo muri Portugal.

Raporo y’Ikigo cy’Igihugu cy’Iterambere (RDB), igaragaza ko mu 2017, cyasoje ibiganiro n’abashoramari bashya umunani byatumye biyemeza gushora imari ya miliyoni zirenga 588 z’amadolari ya Amerika.

Harimo imishinga ibiri yo kongerera agaciro ibikomoka ku buhinzi n’ubworozi, umwe wo mu bwubatsi, ine yo mu ngufu n’umwe w’uruganda.

Iyo mishinga irimo Ikibuga Mpuzamahanga cy’indege cya Bugesera, uruganda rukora imyenda n’inkweto rwa Albert Supply Textile Ltd, uruganda rw’amashanyarazi ruzatanga Megawatt 30.

Hari kandi umushoramari wo guhinga imboga n’imbuto mu gishanga cya Gashora, icyayi cya Rugabano, umushinga wo kugeza amazi mu Bugesera na Kigali ndetse n’urugomero rw’amashanyarazi rw’Agatobwe mu Karere ka Nyaruguru.

Ikompanyi yo muri Portugal Mota-Engil Africa S.A n’ikigo Remote Group cyo mu Rwanda, nizo yubaka Ikibuga Mpuzamahanga cy’indege cya Bugesera kuva muri Kanama umwaka ushize.

Igice cya mbere kizatwara miliyoni 400 z’amadolari ya Amerika, Mota-Engil Africa S.A, izagiramo uruhare rwa 75% naho Guverinoma y’u Rwanda igiremo urwa 25%.

Iki kibuga kimaze kubakwa ku kigero kirenga 20%, ku ikubitiro kizaba gifite ubushobozi bwo kwakira abantu miliyoni 2.5 ku mwaka. Biteganyijwe ko kizakoreshwa n’abashyitsi bazitabira inama y’ibihugu bikoresha Icyongereza izabera i Kigali mu 2020.

Uruganda rukora imyenda n’inkweto, Albert Supply Textile Ltd, rwahawe ubutaka bwo kubakaho mu gice cyahariwe inganda i Masoro ‘Kigali Special Economic Zone’, ni undi mushinga ukomeye waranze 2017.

Ni uw’abashoramari Nsengiyumva Albert uhagarariye ikompanyi Albert Supply Ltd na Bède Bedetse, Umuyobozi Mukuru w’Ikompanyi ‘Rwantan’ izwiho gukora inkweto, imikandara n’ibindi bikoresho bikorwa mu mpu.

Mu ntangiriro uru ruganda ruzaba rukora inkweto kuva ku 1000 kugera ku 3000 buri munsi, rukaba rurimo ishoramari rya miliyari 10 Frw.

U Rwanda kandi rwabonye umushoramari mu mushinga wo kubaka ububiko bw’ingoboka bw’ibikomoka kuri Peteroli.

Iri shoramari biteganyijwe ko rizatwara miliyoni 84 z’amadolari, rigatuma u Rwanda rugira ububiko bwa litiro miliyoni 150 z’ibikomoka kuri Peteroli mu 2018, zivuye kuri 74 mu 2016.

Raporo ya RDB kandi yerekana ko umushinga w’ubuhinzi bw’imboga mu gishanga cya Gashora wabonye umushoramari.

Guverinoma y’u Rwanda ifite intego yo gushora miliyoni 400 z’amafaranga y’u Rwanda mu kongera umusaruro w’imboga n’imbuto kuri hegitari 250 z’igishanga cya Gashora mu Karere ka Bugesera.

Urugomero rw’amashanyarazi aturuka ku mazi rw’Agatobwe mu Karere ka Nyaruguru, ni undi mushinga wabonewe abashoramari. Hari intego yo kuwagura ukava ku bushobozi bwa kilowatt 200 zikagera kuri kilowatt zirenga 350.

Hari kandi umushinga w’amazi wa Kanzenze uzatanga metero kibe 40.000 ku munsi ukazageza amazi mu Karere ka Bugesera n`Umujyi wa Kigali, uzubakwa hagati ya 2018-2020.

Hari kandi umushinga wo kubaka uruganda rw’icyayi rwa Rugabano mu Karere ka Karongi no kugihinga ku butaka bungana na hegitari 4 438.

Uruganda rw’Abahinde Luxmi Tea Company, nirwo rwashoye asaga miliyari 25 Frw, (miliyoni 30 z’amadolari) muri uyu mushinga.

Umwaka ushize wa 2017 RDB yanditse abashoramari 137, biyemeje gushora miliyari 1.67 y’amadolari mu Rwanda.

Ishusho y'ikibuga Mpuzamahanga cy'indege cya Bugesera nikimara kubakwa
Imirimo yo kubaka iki kibuga igeze hejuru ya 20%, biteganyijwe ko kizatangira gukoreshwa mu 2020
Mu 2017 habonetse umushoramari uzubaka uruganda rw'icyayi mu Murenge wa Rugabano muri Karongi ndetse akongera n'ubuso gihingwaho
Umushoramari Albert Supply Textile Ltd, aziyongera ku bandi basanzwe bakora imyenda mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza