Kwamamaza

Ikigo cyo muri Koreya y’Epfo kigiye gushora imari mu gutunganya indodo mu Rwanda

Yanditswe kuya 27-11-2016 saa 12:15' na Rabbi Malo Umucunguzi


Gahunda yo kongera ibicuruzwa bikorerwa mu Rwanda yabonye umufatanyabikorwa, uruganda Heworks rwo muri Koreya y’Epfo rugiye kujya rutunganya indodo zituruka ku magweja atungwa n’amababi y’ibiti by’ibobere.

Heworks iteganya kubaka uruganda rutunganya indodo zituruka ku magweja, hagamijwe kubyutsa ubuhinzi bw’ibobere n’ubworozi bw’amagweja bwari bwarasinziriye nyuma y’uko uruganda rukumbi rwari rusanzwe rukora imyenda mu Rwanda ari narwo rwatunganyaga izo ndodo, UTEXRWA, rutari rukizitunganya.

Ikigo cy’Igihugu gishinzwe ibyoherezwa mu mahanga bikomoka ku buhinzi, NAEB, cyari cyatangiye kuyagura, ariko gicibwa intege n’uko abaturage benshi bari batangiye kurandura amabobere bakayasimbuza ibindi bihingwa.

Heworks igiye gufatanya na NAEB, aho icyo kigo kigiye gushora imari mu bworozi bw’amagweje no gutunganya indodo ziyakomokaho.

Umuyobozi w’ikigo Ikigo cy’igihugu Gishinzwe Guteza Imbere Ubuhinzi bw’ibobere n’ubworozi bw’amagweja, Eng. Eric Mbonigaba, yabwiye The East African ati “Heworks guhera mu kwezi gutaha izatangira kugura umusaruro w’abahinzi kandi ibishyure ku gihe. Kuba hazaba hariho amasezerano bizafasha mu kwizeza abahinzi ko bafite isoko ry’igihe kirekire.’’

Muri iki gihe, u Rwanda mu nganda z’imyenda rukoresha ibiva hanze. Ikigo cy’Igihugu cy’Iterambere kivuga ko ubutaka bw’u Rwanda butabereye guhingwaho ipamba imeze neza, ariko bushobora guhingwaho ibobere yagaburirwa amagweja agatanga indodo zihagije.

Minisiteri y’Ubuhinzi ivuga ko guverinoma y’u Rwanda iri mu biganiro bya nyuma byo kubaka uruganda rwa miliyoni $5 (ni ukuvuga hafi miliyari enye z’amafaranga y’u Rwanda), ruzashyirwamo ibikoresho ndetse rugacungwa na Heworks.

Mu ntangiriro, abahinzi bagera ku 1600 bibumbiye muri koperative 40 bari baritabiriye ubuhinzi bw’ibobere n’ubworozi bw’amagweja mu bice bitandukanye by’igihugu, ariko baje gucika intege baragabanuka bagera ku 1200, bamwe bakayasimbuza ibindi bihingwa.

Umusaruro w’indodo zikomoka kuri bobere wagiye ugabanuka aho wavuye kuri toni 20 z’amagi yateganywaga ku mwaka zikagera ku munani hagati ya 2010 na 2013, mu 2014 zirazamuka ziba 15, mu 2015 ziba 18 ariko muri uyu mwaka byitezwe ko zizagera kuri 24.

Mbonigaba yavuze ko umubare muto w’ibiti by’ibobere biterwa kuri hegitari n’ahantu hato amagweja atunganyirizwa kimwe n’ubumenyi budahagije bwo kubikora ku ruhande rw’abahinzi, biri mu bigira ingaruka ku musaruro uboneka.

Ati “Turacyakeneye gufasha abahinzi bubaka ahantu heza ho kororera amagweja no kugerageza kuziba icyuho kuko nibura hakenewe ibiti nk’ibihumbi 13 kuri hegitari.’’

Ikigo gishinzwe ubu buhinzi kivuga ko ubu hegitari 1453 zihinzeho ibobere mu gihugu hose, mu gihe hari intego ko zazaba ari 10000 mu 2020. Ubuhinzi bw’ibobere n’ubworozi bw’Amagweja bwatangiye gukorerwa mu Rwanda mu 2006.

Uretse gutuma abahinzi benshi bitabira guhinga ibobere amasezerano mashya ahagati y’impande zombi azatuma uyu mushoramari ashyiramo igice cya miliyoni $5.2 zikenewe mu ruganda rugiye kubakwa, agashyirwa mu kubona ubutaka buhagije bwo gukoreraho ubwo buhinzi n’ubworozi.

Kugira ngo amagweja atange indodo abanza kugaburirwa ibibabi bya baberi, nyuma akaza gutera amagi ari na yo avamo indodo. Igweja rimwe riba rifite ubushobozi bwo gutera amagi ari hagati ya 300 na 400 ariko nyuma rigahita ripfa.

Ubudodo bukomoka ku magweja buba ari burebure cyane ku buryo rumwe rugira hagati ya metero 300 na metero 900.

Umukozi mu ruganda rwa Utexrwa umwe mu zikora ibikomoka ku budodo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved