Kwamamaza

IFAD yateye u Rwanda inkunga ya miliyoni zisaga 65 $ yo guteza imbere ubuhinzi n’ubworozi

Yanditswe kuya 5-11-2016 saa 08:38' na Philbert Hagengimana


Ikigega Mpuzamahanga gishinzwe guteza imbere Ubuhinzi n’Ubworozi, (IFAD) cyateye u Rwanda inkunga ya miliyoni 65.1 z’amadolari ya Amerika, izafasha abahinzi baciriritse bagera ku bihumbi 100, ndetse igakoreshwa mu guteza imbere umukamo no kubungabunga ubuziranenge bw’amata.

Amasezerano y’iyo nkunga yashyiriweho umukono i Roma na Ambasaderi w’u Rwanda akaba anaruhagarariye muri IFAD, Jacques Kabale Nyangezi na Kanayo F. Nwanze, umuyobozi w’icyo kigega.

Uwo mushinga wo guteza imbere umukamo no kubungabunga ubuziranenge bw’amata uzakorerwa mu turere 12, ukazatangwaho amadolari ya Amerika miliyoni 65.1. Azaba agizwe na miliyoni 43.6 z’amadolari, IFAD ihaye u Rwanda nk’inguzanyo, miliyoni 1.1 atanzwe ariko atazishyuzwa, hakabamo na miliyoni 4 na yo atanzwe nk’impano iturutse mu Muryango Heifer International ushinzwe kurandura ubukene, Leta y’u Rwanda, urwego rw’abikorera ndetse n’abandi bagenerwabikorwa.

Kuri ubu, umusaruro w’amata mu Rwanda ubarirwa ku gaciro k’amadolari ayingayinga miliyoni 162,4. Kuva mu myaka isaga icumi ishize, Guverinoma y’u Rwanda yakoze iyo bwabaga ngo ishoremo akayabo, byanatumye urwo rwego rutera imbere cyane, dore ko rugize 10.5% by’umusaruro mbumbe w’igihugu mu by’ubuhinzi.

Nubwo urwo rwego rw’ubworozi butanga amata bwateye imbere, haracyari imbogamizi nk’ubuke bwa serivisi zo gutera intanga, ubuvuzi bw’amatungo bukigoye, kwagura ubwo bworozi no kubwongeramo ubushobozi. Hari kandi ubumenyi budahagije mu gucunga inzuri ku bakora ubworozi, ubushobozi buke bwo gukusanya no gushaka isoko ry’amata, umukamo udahagije, no kutabona ku rwego ruhagije serivisi z’imari.

Umuyobozi wa IFAD, Nwanze yagize ati “Mu Rwanda, ubworozi butanga amata bufite uruhare rukomeye mu iterambere ry’icyaro no kuzamura imirire. Bufasha ababukora kurwanya ubukene, bikanatanga imirimo mu buryo agenda atunganywa anitabwaho.”

Uyu mushinga witezweho kuzamura ubuziranenge bw’amata, ndetse n’ingano y’umukamo, ubushobozi bwo gutunganya amata no kuyabyaza ibindi biribwa, kuzamura urwego rw’ikoranabuhanga mu bworozi butanga amata, bikanafasha mu kwiyubaka kw’amakoperative biturutse mu kororera isoko.

Kuva mu 1981, IFAD imaze gutera inkunga imishinga 16 igamije iterambere ry’icyaro mu Rwanda, aho icyo kigega kimaze gutanga amadolari ya Amerika miliyoni 283.8, yageze ku baturage nibura 634,300.

Ambasaderi w’u Rwanda muri IFAD, Jacques Kabale Nyangezi na Kanayo F. Nwanze uyobora IFAD bashyira umukono ku masezerano

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved