Ibiciro by’amashanyarazi byasubiwemo, ku nganda biragabanywa

Yanditswe na Rabbi Malo Umucunguzi
Kuya 10 Kanama 2018 saa 04:59
Yasuwe :
0 0

Urwego Ngenzuramikorere, RURA, rwakoze impinduka mu biciro by’amashanyarazi bizatangira gukoreshwa guhera ku wa Mbere tariki 13 Kanama 2018, bigasimbura ibyaherukaga gushyirwaho ku wa 1 Mutarama 2017.

Nk’uko RURA yabitangaje, ku mashanyarazi akoreshwa mu ngo, abakoresha kWh (kilowati imwe ku isaha) hagati ya 0-15 ku kwezi, igiciro cyagumye ku mafaranga 89 kuri kWh; abakoresha kWh hagati ya 15-50 igiciro kiguma ku ku 182 Frw, mu gihe igiciro ku bakoresha amashanyarazi hejuru ya kWh 50 igiciro cyazamutse kikava ku 189Frw kikagera kuri 210Frw.

Itangazo yashyize ahagaragara rikomeza rigira riti “Ku mashanyarazi akoreshwa ahatari mu rugo, abakoresha ku kwezi amashanyarazi ari hagati ya kW 0-100 igiciro cyazamutse kiva ku 189Frw kigera kuri 204Frw kuri kWh, mu gihe abakiliya bakoresha hejuru ya kWh100 ku kwezi, igiciro cyazamutse kikava ku199Frw kikagera kuri 222Frw kuri kWh.”

Ku mashanyarazi akoreshwa ku minara y’itumanaho igiciro cyavuye kuri 126Frw kuri kWh kigera ku 185Frw; ku nganda zitunganya amazi n’iziyakwirakwiza kiguma ku 126Frw kuri kWh; ku mahoteli igiciro kiguma ku Frw 126 kuri kWh; amavuriro aguma ku giciro kidahinduka cya 192 Frw kuri kWh na za radio ziguma ku giciro kidahinduka cya 184 Frw kuri kWh.

Inganda zahawe umwihariko

Inganda zashyizwe mu byiciro bitatu, icya mbere gishyirwamo inganda nto zikoresho umuriro utarenga kWh 22000 ku mwaka; ikindi gishyirwamo inganda ziciriritse zikoresha amashanyarazi ari hagati ya kWh 22000-66000, ikindi gishyirwamo izikoresha kWh guhera kuri 660000.

RURA yavuze ko inganda zizajya zishyuzwa amashanyarazi bitewe n’igihe cy’umunsi uruganda ruri kuyakoreshamo, niba ari mu gihe abantu batari kuyakoresha ari benshi zishyure ku giciro gito, naho mu gihe abaturage bari kuyakoresha nabo, zishyure amafaranga menshi.

Umuyobozi ushinzwe ibijyanye n’ubucuruzi muri RURA, Dr Rutimirwa Benjamin, yabwiye IGIHE ko ubusanzwe kuva saa sita z’ijoro kugeza mu gitondo, abaturage baba baryamye, ibiro byafunze, ariko inganda zo zishobora gukomeza gukora kandi bakishyura amafaranga make, naho ku mugoroba igihe ingo zitangiye gucana amatara, bakishyura amafaranga menshi.

Yagize ati “Nko ku nganda ntoya, nirukora igihe amashanyarazi akenewe cyane, rurishyura 11017Frw kuri kVA imwe ku kwezi, naho igihe amashanyarazi asabwa mu buryo buringaniye bishyure 4008Frw, igihe amashanyarazi atarimo akoreshwa bishyure 1691Frw. Tukabasaba ngo igihe amashanyarazi asabwa cyane babirekere ingo, noneho baze gukora cya gihe amashanyarazi adakenewe.”

Ku nganda ziringaniye, mu gihe amashanyarazi akenewe cyane bazajya bishyura 10514Frw kuri kVA ku kwezi, mu gihe akenewe gahoro bishyure 3588Frw naho igihe adakenewe bishyure 1292Frw. Ku nganda nini, igihe amashanyarazi akenewe cyane bazajya bishyura 7184Frw, mu gihe akenewe biringaniye bishyure 2004Frw kuri kVA ku kwezi naho igihe adakenewe bishyure 886Frw kuri kVA ku kwezi.

Igiciro cyagabanyijwe ku nganda mu gihe amashanyarazi adakenewe cyane ndetse n’igihe akenewe mu buryo buringaniye, naho igihe amashanyarazi akenewe cyane, nta cyagabanutse.

Mu buryo busanzwe, inganda nto zizaba zishyura 110Frw kuri kWh, iziringaniye zishyure 87Frw kuri kWh (bishyuraga 90Frw) naho inganda nini zishyure 80Frw (bishyuraga 83Frw.)

RURA yatangaje ko “ibiciro by’amashanyarazi ku nganda byagabanyijwe mu rwego rwo kureshya abashoramari b’abanyamahanga no guteza imbere urwego rw’inganda,” igiciro cy’amashanyarazi ku baturage kikagumaho ngo akomeze guhendukira abafite amikoro aciriritse.

Yavuze ko ibiciro bizajya bisuzumwa buri gihembwe ngo hahuzwe ibiciro n’izindi mpamvu zishobora kuba zidashingiye ku kugenzura urwego rw’ingufu birimo agaciro k’ifaranga, ibiciro by’ibikomoka kuri peteroli n’ibindi.

Mu masaha y'ijoro, inganda zizajya zihabwa umwihariko ku biciro by'amashanyarazi
Inganda zashishikarijwe kubyaza umusaruro amasaha abantu benshi badakoresha amashanyarazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza