Kwamamaza

Ibanga ry’u Bushinwa bukomeje kuguriza akayabo ibihugu bya Afurika birimo n’u Rwanda

Yanditswe kuya 22-11-2016 saa 15:58' na Rabbi Malo Umucunguzi


Uko imyaka ihita indi igataha, Ishoramari ry’Abashinwa rikomeza kwikuba inshuro nyinshi mu bihugu bya Afurika, ndetse imishinga yabo iranyurana kuva ku bucuruzi bwo hasi cyane, ubwubatsi bw’imihanda, kugeza mu mishinga rutura yo kubaka ibiraro n’imihanda ya gari ya moshi iri gushyirwamo miliyari y’amadolari.

Gusa Abanyafurika nabo banyuzwe n’ibikorwa by’iki gihugu cy’igihangange cyo muri Aziya, aho mu ibarura riheruka, Afrobarometer, ryerekanye ko hafi ya bibiri bya gatatu by’Abanyafurika (63%) bashima ishoramari ry’Abashinwa, 15% bonyine aba ari bo batarishira amakenga.

Mu Rwanda naho Abashinwa si bashya kuko badasiba gutanga inguzanyo z’igihe kirekire, ndetse muri Kanama u Rwanda na Banki y’Ibyoherezwa n’ibitumizwa mu mahanga y’u Bushinwa, Export-Import Bank of China (Exim Bank) basinyanye amasezerano y’inguzanyo ya miliyari 58.2 Frw, agomba gukoreshwa mu kubaka imihanda ya kilometero 51.5 mu Mujyi wa Kigali.

Mu ihembe rya Afurika naho, muri Ethiopia, haheruka gutahwa umuhanda wa kilometero 750 watwaye miliyari $4, wahuje icyo gihugu no ku cyambu muri Djibouti, aho naho harashimwa umushinwa.

Abashinwa nibo bashoyemo amafaranga ndetse wubakwa n’ibigo byabo, nk’uko binitezwe muri Kenya, ahagomba kubakwa umuhanda uzahuza Sudani na Kenya, ndetse igice cya mbere kikazatwara miliyari $13, kigahuza Mombasa na Nairobi.

Umuhanda nk’uwo kandi ugomba guhuza ibihugu birimo Sudani y’Epfo, Uganda, u Rwanda n’u Burundi, mu mushinga mugari w’umuhanda wa gari ya moshi uzahuza ibihugu bya EAC.

Ubushinwa nibwo bwihariye isoko, kuko Muri Nyakanga, Guverinoma ya Tanzania, yahawe inguzanyo ya miliyari $7.6 na Exim Bank, igenewe kubaka uyu muhanda uzayihuza n’abaturanyi barimo u Rwanda na Repubulika Iharanira Demokarasi ya Congo.

Muri Gicurasi 2014, nibwo abakuru b’ibihugu bya EAC bemeranyijwe n’u Bushinwa bwari buhagarariwe na Minisitiri w’Intebe, Li Keqiang, mu nama yabereye i Nairobi, bemeranya ko u Bushinwa buzatera inkunga intangiriro z’umuhanda wa gari ya moshi uzahuza ibyo bihugu.

Ku ruhande rwa Kenya, yari amahirwe yo gusimbuza umuhanda wubatswe n’abakoloni b’Abongereza mu myaka isaga 100 ishize, ndetse u Bushinwa bwahise bwemera gutanga 90% y’amafaranga akenewe mu cyiciro cya mbere cyabarirwaga miliyari $3.8, ariko busaba ko uzubakwa n’ibigo byo mu Bushinwa.

Umukozi mu kigo gitanga ubujyanama muri Kenya PwC, Kuria Muchiru yabwiye CNN ko icyambu nka Mombasa kinyuzwaho ibicuruzwa byinshi bigana mu bihugu bidakora ku Nyanja, ku buryo imihanda ya gari ya moshi ari ishoramari rikomeye.

Ati “Iyi mihanda mishya izoroshya kugera ku byambu, ibicuruzwa bihite bigera muri gari ya moshi nayo ibigeze aho bigomba kujyanwa.’’

Kuki ubushinwa buri guhimbazwa no gutanga inguzanyo?

Imihanda ya gari ya moshi si imishinga ihendutse, ndetse ibihugu bya Afurika biri kwaka inguzanyo y’umurengera mu Bushinwa, ku buryo mu myaka 10 hagati ya 2004 kugea mu 2014, ibihugu bya Afurika byatse inguzanyo ya miliyari hafi $10 mu Bushinwa yo gushyirwa mu mihanda ya gari ya moshi, binyuze muri Exim bank, nk’uko bigaragazwa n’ikigo cy’abashakashatsi, SAIS China Africa Research Initiative.

Hagati ya 2000 na 2011, u Bushinwa bwemeye gushyigikira imishinga isaga 1700 y’ubwubatsi butandukanye mu bihugu 50 byo muri Afurika, yose ifite agaciro kagera kuri miliyari $75.

U Bushinwa bubona amahirwe akomeye y’ishoramari mu mihanda ya gari ya moshi, ndetse bibaha isoko rikomeye ry’ibyuma bakora mu nganda zabo, nk’uko bishimangirwa na Deborah Brautigam, umwarimu wa Politiki y’ubukungu mpuzamahanga.

Ati "Bafite ubushobozi burenze mu Bushinwa. Bafite ibyuma bakeneye kubona aho babikoresha. Bafite ibigo by’ubwubatsi bimaze kugira uburambe mu kubaka imihanda ya gari ya moshi.’’

Uyu mwarimu avuga ko nubwo u Bushinwa bukora ibyo byose buzi neza ko harimo n’impungenge, ndetse n’ibyo guhangwa amaso niba izo nguzanyo zose zizishyurwa nk’uko byagenwe.

U Burayi na Amerika ntibagishora agatubutse

Leta Zunze Ubumwe za Amerika n’ibindi bihugu byo mu Burengerazuba bw’isi byari bimenyerewe ku Isi, byagiye bigira ubushake mu gushora imari mu mishinga y’imihanda ya gari ya moshi, gusa muri iki gihe ntibari ku rwego rw’u Bushinwa, Brautigam, akavuga ko biterwa n’impungenge z’uko ibihugu bya Afurika bizabasha gusigasira ibyobikorwa.

"Bagiye bashyira amafaranga mu mihanda ya gari ya moshi, ariko si menshi cyane. Mu by’ukuri ntabwo bashatse gutera inkunga iyo mishinga.’’

Gusa ku mihanda yo muri Afurika y’Iburasirazuba, ho ngo nta mpungenge zikwiye kubaho mu gihe hari ubushobozi bw’ingengo y’imari n’ubushake bwa politiki, ku buryo nta bibazo byapfa kubamo.

Gusa u Bushinwa ntibubura kunengwa ku miyoborere y’abakozi bukoresha, ndetse hamwe bakitwaza n’abakozi babo ahakorera ibigo by’Abashinwa, aho kugira ngo bahe akazi abaturage b’ahari imirimo yabo.

Ni mu gihe u Bushinwa bumaze gukwira Afurika yose, ku buryo nibura mu mwaka baba bafite imishinga y’ubwubatsi igera kuri miliyari 50 muri uyu mugabane.

Ibihugu bya Afurika bikomeza kubaka imihanda ya gari ya moshi ahanini iva ku byambu igera ahakenewe ibicuruzwa cyangwa ku birombe by’amabuye y’agaciro, mu gihe Afurika ifite inzozi zo kuzubaka umuhanda uzahuranya uyu mugabane, ugahuza Cairo mu Misiri na Cape Town muri Afurika y’Epfo, nubwo bisa n’aho atariwo w’ibanze ibihugu byahisemo gutangiriraho.

Ubuhangange bw’u Bushinwa ku bukungu bw’ibihugu birimo ibya Afurika, bunagaragarira ko mu gihe ubukungu bwabwo bwazamukaga cyane bugatumiza ibintu byinshi muri Afurika birimo amabuye y’agaciro, kuva bwatangira kugenda gahoro, ibiciro byayo byaragabanutse, ubu ingaruka zakwiriye Isi yose.

Abashinwa baheruka kuzuza ikiraro Mohammed VI Bridge cyuzuye gitwaye miliyoni $ 72 muri Maroc
Abashinwa bubatse uyu muhanda muri Ethiopia
Uko ibihugu byagujije mu Bushinwa mu kubaka imihanda ya gari ya moshi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved