Kwamamaza

Hotel Umubano imaze imyaka hafi itatu yarabuze umuguzi

Yanditswe kuya 10-08-2016 saa 17:49' na Philbert Hagengimana


Mu Ukuboza 2014, hatangajwe ko Hotel Umubano igiye kugurishwa kubera ukutumvikana hagati y’abanyamigabane ba Sosiyete SOPROTEL iyigenzura, ari bo Leta y’u Rwanda n’iya Libiya.

Kuva icyo gihe kugeza ubu iyo hotel ntirabona uyigura, nubwo abayifuza batabura kuyirambagiza amanywa n’ijoro.

Me Emmanuel Butare, washyizweho n’urukiko nk’ushinzwe ikusanya n’igabanyamutungo mu iseswa rya SOPROTEL yari isanzwe igenzura Hotel Umubano, yatangarije IGIHE ko kugeza ubu hataraboneka umuguzi, gusa ngo hari abo barimo kuvugana, ku buryo bateganya ko hazavamo uyegukana.

Me Butare yagize ati “Ntabwo iragurishwa, turacyashaka uwayigura.”

Byavuzwe ko iyo hotel y’inyenyeri enye yaba yaraburiwe umuguzi, ngo kubera ko abashinzwe kuyigurisha bashyizeho igiciro kiri hejuru bitewe n’inyungu yinjiza, gusa ibyo Me Butare ntabwo ahamanya na byo, aho avuga ko abaza haba harimo abashishikajwe no kugura, ariko basobanurirwa ibisabwa bamwe bagakomeza nk’abifuza kugura abandi bagahita babivamo.

Ati “Oya, benshi baba bari babishishikariye, ariko nyine baraza tukababwira uko bimeze, aba ari inzira ndende urebye. Ariko ubu ntiturabona uwujuje ibisabwa ngo agure.”

Yakomeje avuga ko hari abaguzi babiri bakomeje ibiganiro, hakaba n’abandi babiri bagitunganya ibisabwa n’ubwo bataragera kure, gusa ngo bagaragaza ko bafite ubushake.

Intandaro y’ishyirwa ku isoko rya Hotel Umubano

Hotel Umubano yubatswe kubwa Col. Muammar Gaddafi, wari Perezida wa Libya. Nyuma y’Urupfu rwe, Leta y’icyo gihugu yasezeranyije iy’u Rwanda ko izakomeza kuyishoramo imari.

Amakuru IGIHE yahawe na bamwe mu bazi amabanga y’abanyamigabane, avuga ko Leta ya Libiya yemeye kuyivugurura, ikayigeza ku rwego rw’inyenyeri eshanu, ariko kugeza ubu ngo ntiyigeze igira icyo ikora, ndetse ngo bamaze imyaka isaga icumi bari mu mishyikirano, ariko biza kunanirana hitabazwa inkiko.

Nyuma yo kunanirwa kumvikana Leta y’u Rwanda yareze iya Libiya, aho ikirego mu rukiko cyavugaga ko Umunyamigabane muto (Rwanda) abangamiwe n’Umunyamigabane munini (Libiya).

Ibyo byatumye abahagarariye inyungu za Libiya bavuga ko ibyo basabwa bazabikora ariko ntibabikora.

Urukiko rwaje kwemeza ko haseswa sosiyete SOPROTEL Leta y’u Rwanda ifitemo imigabane ingana na 40% n’aho iya Libiya ikagira 60%, ndetse Hotel Umubano ikagurishwa.

‘Akabuze umuguzi gasubizwa bene ko, Hotel Umubano bimeze bite?’

Mu kiganiro n’abanyamakuru cyo ku wa 13 Gashyantare 2014, Me Butare Emmanuel, yatangaje ko mu gihe kitarenze amezi atandatu iyi Hoteli iraba yashyizwe ku isoko igahabwa abashoramari, ariko abafitemo imigabane na bo badahejwe gupiganwa.

Yagize ati “Turimo gukusanya ibirebana n’imyenda iyi sosiyete yaba ifite ariko nta biteye impungenge birimo. Ariko kandi abanyamigabane na bo bemerewe gupiganwa buri wese ku giti cye, apfa gusa kuba agaragaza ubushobozi. Twizera ko mu mezi atandatu byose bizaba byarangiye kuko hari inzobere ziga agaciro ka hoteli.”

Kugeza ubu ntihizewe igihe hazabonekera umuguzi, aho Me Butare yagize ati “Biragoye kuvuga igihe, kuko no mu kwezi kumwe bishobora gukunda, no mu mezi abiri, ariko iyo uganira, uciririkanya n’abantu, biragoye gufata icyemezo ngo bazafata icyemezo cyo kugura ryari, ariko turizera ko nk’abo ngabo bashobora kuzaba bamaze gufata icyemezo.”

Hotel Umubano yahawe amazina nk’ay’ishoka

Imirimo yo kubaka Hotel Umubano yatangijwe na SOPROTEL mu 1977 itangira gukora mu 1979 yitwa Hotel Umubano Meridien kugeza muri Mata 1994 icungwa n’Abafaransa basanzwe bafite bafite Groupe Meridien.

Hagati ya 1994 na 1997 yongeye kwitwa Hotel Umubano icungwa na ba nyirayo SOPROTEL; hagati ya 1998-2000 Hotel Umubano yahinduye izina yitwa Windsor International Umubano icungwa na sosiyete izobereye mu micungire y’amahoteli ku rwego mpuzamahanga yitwa Windsor International; 2001-2008 yiswe Novotel Umubano Kigali icungwa na Group Accord icunga Hoteli zisaga 4000 ku Isi.

Muri hoteli icunga ifite inyenyeri eshanu yitwa Sofitel na ho ifite enye ikitwa Novotel, akaba ari muri urwo rwego Hotel Umubano yahawe iryo zina; Mu 2009-2010/2011 yahawe izina rya Laico Umubano Hotel icungwa na Laico ifite icyicaro i Tunis muri Tunisia. Kuva mu 2011 kugeza ubu yasubiranye izina yahoranye, Hotel Umubano, ikaba icungwa na bene yo.

Iyi hoteli y’inyenyeri enye yubatse ku butaka bufite ubuso busaga hegitari enye.

Nubwo Hotel Umubano iri ku kugurishwa, ibyo ngo ntibihungabanya serivisi zisanzwe zitangwa muri iyo Hoteli, kandi n’abakozi bayo imirimo irakomeza uko bisanzwe.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved