Gisagara: Inganda z’inzoga zari zarafunzwe zatangiye gukomorerwa

Yanditswe na Prudence Kwizera
Kuya 4 Ukwakira 2017 saa 01:20
Yasuwe :
0 0

Hashize amezi atatu inganda 29 zenga inzoga mu bitoki mu Karere ka Huye na Gisagara zifungiwe imiryango ariko zimwe zamaze gukomorerwa gukomeza imirimo zimaze kuzuza ibikoresho zaburaga.

Nyuma y’igenzura ku mikorere y’inganda ziciriritse zenga inzoga, Akarere ka Gisagara kafunze by’agateganyo inganda umunani z’abikorera hasigara hakora rumwe rw’akarere ; Muri Huye hafungwa inganda 21 zikarimo.

Abanyendanda babwiwe ko ubuyobozi butagamije kubuhombya ko ahubwo ikigenderewe ari ukuzuza ibikoresho nkenerwa kugira ngo inzoga benga zibe zujuje ubuziranenge. Yarangije kwiga mu ishuri ry’ubumenyingiro muri Uganda ajya mu gace akomokamo gushyira mu nginro ibyo yize.

Muri izo nganda zafunzwe hamaze gukomorerwa eshanu zo muri Gisagara.

Umukozi ushinzwe umusaruro w’umwe mu ruganda rwenga ibitoki mu ako karere , Nyirangirinshuti Francine, yabwiye IGIHE ko bafunguriwe bakimara kugura imashini yenga n’ikamura.

Yagize ati “Iyi mashini yujuje ubuziranenge kandi yenga ibitoki byinshi mu gihe gito, twarayiguze tugura n’ikamura. Ubu nizo dukoresha kandi twenga inzoga nziza nta kibazo. Tukimara kugura izi mashini ubuyobozi bwaradusuye busanga twujuje ibisabwa baradufungurira twongera gukora”.

Mu Karere ka Huye hari umushoramari witwa Kanyandekwe Diomede, ukora imashini zenga inzoga mu bitoki no mu zindi mbuto zikabibyaza umutobe, akaba ari we uri kugeza ibyo bikoresho ku nganda.

Abafite inganda zenga inzoga mu bitoki mu Karere ka Huye na bo barasaba ubuyobozi ko bwabasura bukareba ko bamaze kuzuza ibisabwa.

Uwitwa Munyeshyaka Syldio yagize ati “Ibyo badusabye kunoza twarabikoze, mbere twengaga dukoresheje uburyo gakondo ariko ubu twaguze imashini yenga n’ikamura kandi n’ibindi byose dusabwa twarabikoze. Icyo twifuza ni uko abayobozi badusura bagakora igenzura bakareba uko bimeze, tukongera gukomorerwa tugakora.”

Umuyobozi wungirije ushinzwe iterambere ry’ubukungu mu Karere ka Huye, Mutwarasibo Cyprien, yavuze ko abanyenganda bavuga ko bamaze kuzuza ibisabwa bazasurwa vuba.

Yagize ati “Habaye hari abarangije kuzuza ibisabwa nk’uko babimenyereye bakwandikira ubuyobozi bw’akarere noneho tugashyiraho itsinda rihuriweho n’inzego z’umutekano tukabasura, twasanga babyujuje tukabafungurira bagakomeza gukora akazi kabo. Hari amabaruwa y’abantu nka babiri bamaze kutwandikira ku buryo duteganya ko muri iki cyumweru tuzajya kubasura.”

Kanyandekwe Diomede ukora uko imashini zenga inzoga mu bitoki avuga ko nyuma yo kwiga mu ishuri ry’ubumenyingiro muri Uganda yaje mu gace akomokamo agamije kuhakorera ibyo yize.

Yagize “Nifuje gukoresha ubumenyi mfite ngo nkemure ikibazo gihari mpereye iwacu, iyi mashini ifite ubushobozi bwo kwenga toni 12 z’ibitoki kuva saa moya za mu gitondo kugeza saa munani kandi ikabikorana isuku.”

Akarere ka Huye kagiriye inama abanyenganda kudaharanira inyungu y’amafaranga gusa ahubwo ko bagomba kwibuka no gukora ibyujuje ubuziranenge kandi ntibwagerwaho uruganda rudafite ibikoresho bihagije.

Imwe mu mashini yenga umutobe mu bitoki yakozwe na Kanyandekwe
Iyi mashini yenga ibitoki ikanakamura. Inganda zayiguze zarafunguwe
Inganda zo muri Huye zose ziracyafunze

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza