Gisagara: Hatangiye kubakwa uruganda rwongerera inyama agaciro rwa Miliyoni 700 Frw

Yanditswe na Prudence Kwizera
Kuya 23 Gashyantare 2021 saa 06:14
Yasuwe :
0 0

Mu Karere ka Gisagara hatangijwe ibikorwa byo kubaka uruganda rwongerera inyama agaciro hagamijwe guteza imbere ubworozi no kububyaza umusaruro, rukaba ruzuzura rutwaye Miliyoni 700 Frw.

Ni uruganda rwitwa Gisagara Meat Processing -GMP Ltd ruri kubakwa mu cyanya cy’inganda mu Kagari ka Muyira mu Murenge wa Kibilizi, bikaba biteganyijwe ko ruzaba rwuzuye mu gihe cy’umwaka umwe.

Dr Kubumwe Celestin uzobereye mu bijyanye no kongerera ibiribwa agaciro yavuze ko urwo ruganda ruzajya rutunganya inyama zishobora kubikwa mu gihe cy’amezi atatu zitangiritse kandi bakazajya bakoramo n’ibindi bizikomokaho.

Ati “Hano tuzakora inyama zishobora kubikwa amezi atatu zitagombye gushyirwa muri firigo. Hanyuma uretse ibyo tuzakoramo n’ibindi byose bituruka ku nyama nka Sosiso, inyama zo mu dukombe, inyama zo kugemura hanze y’igihugu, jambo na sambusa bimara amezi atandatu bitari byangirika”.

Yakomeje avuga ko ruzajya rutunganya amavuta akomoka ku ngurube no ku rugimbu rw’ihene n’ibindi bigamije kongerera inyama agaciro ku buryo bishobora kumara amezi atandatu bigifite umwimerere wabyo.

Ruzajya rwongerera agaciro inyama z’inka, ingurube n’ihene kandi ruzakoresha abakozi bahoraho 93.

Ati “Ku munsi tuzajya tubaga inka esheshatu n’ingurube 20 ndetse n’ihene nyinshi.”

Bamwe mu baturage bo mu Karere ka Gisagara bavuga ko bishimiye ko hari kubakwa uruganda rwongerera inyama agaciro kuko bazajya bagurisha amatungo yabo hafi kandi biteze ko bashobora kuhabona akazi.

Iryumugabe Anastase wakoze umushinga w’ubworozi bw’ingurube ati “Biranejeje cyane kuko mbonye aho nzajya ngurisha umusaruro wanjye bitansabye ko njya kure. Icya mbere ni uko haje isoko hafi naho icya kabiri ni uko bazajya batugurira amatungo ku guciro cyiza.”

Kankindi Agnes na we avuga ko urwo ruganda ruzakemura ikibazo cy’isoko ry’amatungo kuko ntaho bari bafite bayagurisha bigatuma abazaga kuyagurira mu ngo babahendaga.

Umuyobozi w’Akarere ka Gisagara, Rutaburingoga Jérome, yavuze ko biyemeje kongera agaciro ibikomoka ku buhinzi n’ubworozi kuko ari imwe mu mishinga ihakorerwa cyane.

Ati “Nk’uko Gisagara ari Akarere ku buhinzi n’ubworozi twiyemeje rero kuva mu bya gakondo tukajya mu nganda, nyuma yo kubona ko uruganda rw’urwagwa n’urw’umutobe byagezweho kandi bikaba bikora neza, ubu twateye intambwe tugeze mu nganda zijyanye no gutunganya ibikomoka ku bworozi.”

Muri icyo cyanya cy’inganda kandi hari uruganda rutunganya ibigori rukabibyazamo ifu.

Rutaburingoga yavuze ko urwo ruganda rwongera agaciro inyama ruzaba rufite isoko mu Ntara y’Amajyepfo yose, asaba abaturage gushyira ingufu mu buhinzi n’ubworozi kugira ngo izo nganda zose zijye zibona ibyo zikoresha nabo babone amafaranga.

Biteganyijwe ko urwo ruganda ruzuzura mu gihe cy'umwaka umwe
Dr Kubumwe Celestin uzobereye mu bijyanye no kongerera ibiribwa agaciro yavuze ko urwo ruganda ruzajya rutunganya inyama zishobora kubikwa mu gihe cy’amezi atatu zitangiritse
Hashyizwe ibuye ry'ifatizo ahari kubakwa urwo ruganda
Mu Karere ka Gisagara hatangiye kubakwa uruganda rwongerera agaciro inyama
Meya Rutaburingoga yavuze ko urwo ruganda rwongera agaciro inyama ruzaba rufite isoko mu Ntara y’Amajyepfo yose, asaba abaturage gushyira ingufu mu buhinzi n’ubworozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .