Gati yatangije iduka rigemura ibicuruzwa byo muri Amerika abizana mu Rwanda

Yanditswe na Munyengabe Murungi Sabin
Kuya 24 Kanama 2017 saa 04:39
Yasuwe :
1 0

Gati Meddy, ni rwiyemezamirimo watangije ubucuruzi bw’ibikorerwa muri Amerika abigemura mu Rwanda abicishije mu ikompanyi yashinze ikorera kuri internet.

Ni umusore ukiri muto ariko ufite imigambi ikomeye mu kuzamura ubucuruzi bukorerwa kuri internet ndetse akaba afite intego ihamye mu gushakira akazi n’ubumenyi abakiri bato bashaka kwinjira mu bushabitsi bukoresheje ikoranabuhanga.

Gati Meddy akora umwuga udahuye n’ibyari inzozi ze kuva mu mashuri yisumbuye na kaminuza ko yize ibijyanye n’amashanyarazi mu yahoze ari KIST [Kigali Institute of Science and Technology] ndetse no muri Amerika aho asigaye atuye yihuguye mu byerekeye uyu mwuga ariko ubu ni umushabitsi mu by’ubucuruzi bukoresha ikoranabuhanga kandi byatangiye kumuhira.

Ni umushabitsi wize iby’amashanyarazi n’ikoranabuhanga

Mu kiganiro yagiranye na IGIHE, Gati Meddy yavuze ko umurimo yahanze umaze gutanga akazi kuri bamwe mu bakorana na we muri ubu bucuruzi ndetse yatangiye gukemura ikibazo cyabangamiraga benshi mu Rwanda mu kubona ibicuruzwa byo muri Amerika.

Yatangiye ubu bucuruzi mu 2012 ahereye ku iduka rikomeye cyane ku Isi rya eBay na Amazon,yabanje gucuruza amataratara arinda izuba [sunglasses] n’amasaha ava kuri uri rwego ahita atangiza iduka rye ryakoreraga ku rubuga bwite yashinze rwa www.gatishop.com mu 2015.

Gati Shop yatangiye icururiza ku Mugabane wa Amerika, Australie, u Burayi na Aziya nyuma muri 2017 afata umwanzuro wo gutangiza Mall for Africa, ikompanyi igemura ibicuruzwa biva muri Amerika abyoherereza ababikeneye mu Rwanda.

Yagize ati “Ubusanzwe nize ibijyanye n’amashanyarazi muri KIST nyuma nagiye muri Amerika, ubu mba muri Leta ya California mpamaze imyaka irindwi. Inaha nihuguye mu bijyanye n’amashanyarazi ndetse n’ubucuruzi bwo kuri internet [e-commerce]. Natangiye gucuruza kuri internet mu 2012 ntangirira kuri eBay aho nacuruzaga amataratara n’amasaha, muri 2013 ntangira gucuruza kuri Amazon ibintu bitandukanye nyuma muri 2015 ntangiza urubuga rwanjye www.gatishop.com rucuruza ku Mugabane wa Amerika, Australia, u Burayi na Aziya. Ubu muri 2017 nkaba ndigutangiza Mallforafrica.com mu Rwanda.”

Gati yatangije Mall For Africa nyuma y’uko Leta y’u Rwanda yari imaze gufata umwanzuro wo gukumira caguwa mu gihugu. Yavuze ko yahise atekereza inzira yakoresha kugira ngo ajye agemurira Abanyarwanda ibicuruzwa bishya bacike burundu kuri caguwa kandi badahenzwe.

Ati “Nibwo n’abantu batangiraga kumbaza uburyo babona ibintu bya hano ariko nibuka ko nanjye mba mu Rwanda nashakaga ikintu i Burayi muri Amerika bikambana ihurizo kubona umuntu uzaza mu Rwanda wanamubona ugasanga azaza mu mezi atatu cyane nyuma y’umwaka, mu gushaka gukemura icyo kibazo nibwo natekereje uburyo abantu bajya bagura ibyo bashaka kandi bikabageraho byihuse mu buryo bworoshye mu gihe kitarenze iminsi 15 kandi wishyuye mu manyarwanda”

Mu gihe amaze akora ubu bucuruzi bwo kuri internet Gati Meddy ngo yungutse byinshi by’umwihariko ubumenyi no guhura n’abantu bakomeye bagatuma arushaho kwagura inzira zimufasha kugeza kure ubucuruzi bwe.

Ati “Mu by’ukuri ikintu gikomeye cya mbere nabonye ni ubumenyi, nungutse mu bijyanye n’ubucuruzi kuri internet, ikindi nk’umucuruzi ni inyungu mvanamo, hanyuma no kumenyana n’abantu [networking]”

Akorana n’amaduka 180

Meddy ubu afite amaduka 180 yo muri Amerika n’u Bwongereza bafitanye amasezerano yo kugemura ibicuruzwa byabo abyohereza mu Rwanda. Ati “Ubu dukorana n’amaduka 180 yo muri Amerika n’u Bwongereza, ayo maduka ushobora kuyasanga ku rubuga rwacu www.mallforafrica.com”.

Mu migambi afite mu bucuruzi bwe, Gati Meddy avuga ko ‘yifuza ko mu mwaka umwe Abanyarwanda baba bamaze kumenyera uburyo yatangije bwo kugura ibicuruzwa byo muri Amerika’ akaba anifuza gutanga akazi kuri benshi.

Ati “Icya mbere ni uko ni uko mu mwaka umwe Abanyarwanda baba bamaze gukoresha urubuga rwacu mu gutumiza ibintu, ikindi ndifuza kwagura ubucuruzi bwanjye ngatanga akazi, korohereza abanyarwanda guhahira ku masoko yo hanze baciye kuri mallforafrica.com mu buryo bworoshye.”

Yashishikarije urubyiruko kugira icyerekezo no kongera imbaraga mu kwihangira umurimo kurusha uko bahora bateze amaboko kuri leta cyangwa bategereje inkunga ziva mu mahanga.

Gati Meddy afite imugambi ukomeye mu kuzamura ubucuruzi bukorerwa kuri internet

Ati “Urubyiruko narubwira nti igihe ni iki cyo gukora bafungure amaso barebe no hanze y’u Rwanda, Isi yabaye imwe aho waba uri hose wakora kandi ugatera imbere, twite ku ikoranabuhanga cyane duhange ibintu byinshi byaduteza imbere, icyo mbasaba gikomeye ni ugutinyuka.”

Yatangiye gutanga akazi

MallforAfrica yatangiye gukora muri Werurwe 2017, ubu imaze kugemurira ibicuruzwa abantu bageze ku ijana mu Rwanda ndetse bafite abafatabuguzi[subusribers] bagera ku bihumbi bitanu.

Mu byo bagemura cyane higanjemo imyenda, inkweto, telefone, ibikoresho by’abana na byinshi mu bikoresho by’ikoranabuhanga bigezweho muri Amerika.

Gati Meddy aherutse gutangiza ibiro mu Mujyi wa Kigali kuri Centenary House aho afite abakozi babiri bahoraho. Ati “Ubu maze gutanga akazi ku bakozi babiri bahoraho kandi bazagenda biyongera bitewe n’uko umubare w’abaguzi wiyongera, twatanze akazi ku bantu bamamaza, twahaye akazi amaradiyo n’abagemura ibintu byacu.”

Ibicuruzwa agemura mu Rwanda anabisakaza mu bihugu birimo Nigeria, Kenya , Ghana, i Dubai na Arabia Saudite.

Gati Meddy aherutse gutangiza ibiro mu Mujyi wa Kigali kuri Centenary House
Yakoze ubushabitsi bwo kugemura ibicuruzwa abivana muri Amerika abizana mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza