Ferwafa yatanze inkunga y’asaga miliyoni 34 Frw mu Kigega Agaciro

Yanditswe na Jean Pierre Tuyisenge
Kuya 22 Ukuboza 2016 saa 03:00
46 31

Ishyirahamwe ry’Umupira w’Amaguru mu Rwanda “FERWAFA” ryateye inkunga ingana na miliyoni 34 n’ibihumbi 200 z’amafaranga y’u Rwanda, Ikigega Agaciro Development Fund, mu rwego rwo gufasha igihugu kwihutisha gahunda yo kwigira.

Umuhango wo gushyikiriza ubuyobozi bw’Ikigega Agaciro, iyi nkunga, wabereye ku cyicaro cy’iri Shyirahamwe kuri uyu wa Kane tariki ya 22 Ukuboza, 2016.

Perezida wa Ferwafa, Nzamwita Vincent De Gaule yavuze ko nk’Ishyirahamwe ry’umupira w’Amaguru bifuje gufatanya n’abanyarwanda kwiyubakira igihugu.

Yagize ati “ Ishyirahamwe ry’umupira w’Amaguru mu Rwanda, amakipe yose, abagize umuryango wacu ,amashyirahamwe y’abasifuzi, ay’abadamu, twishyize hamwe n’abakozi bacu bo muri Ferwafa tuvuga ko tugomba gutanga umusanzu wacu, turawemera, uyu munsi twifuje kuwubagezaho.”

Umuyobozi w’iki kigega, Jack Kayonga yashimiye Ferwafa ku nkunga yatanze ndetse avuga ko ari umusanzu uziye igihe.

Ati “ Mbashimiye uyu musanzu wanyu mutanze kuko uziye igihe, kandi byerekana ko namwe mwumva ko ari inshingano zanyu kwiyukakira igihugu. Icyo nabizeza ni uko natwe tuzawucunga neza kugira ngo ikigega gikomeze gikure, kizatugeze ku cyerekezo cy’uko u Rwanda rugomba guhagarika inguzanyo cyangwa ubufasha buturuka ku baterankunga, kugira ngo dukomeze twiheshe agaciro.”

Kayonga yasabye abandi Banyarwanda muri rusange kureberaho bagatanga umusanzu wabo.

Ku mugoroba wo kuwa 1 Ukuboza 2016, ubuyobozi bw’Agaciro Development Fund bwaganirije abikorera nka rumwe mu rwego rwafashe iya mbere mu gushyigikira iki kigega, kugira ngo umurava bari bafite gishyirwaho bongere bibuke ko bikiri inshingano zabo kongera kugiteza imbere.

Icyo gihe yagize ati “Barasa n’abahagaze.Iyo dukomeza nk’uko twatangiye dufite miliyari 17, uyu munsi twakabaye dufite miliyari 110 ari nayo mpamvu twumva ko na miliyari 200 zishobora kuzagerwaho mu myaka ya vuba mu gihe abanyarwanda bose bakomeza kumva ko ari inshingano zabo, iki kigega bakakigira icyabo,bakumva ko kizafasha leta kugira ngo igere ku bikorwa bitandukanye, kandi ari umurage w’u Rwanda rw’ejo hazaza.”

Umuyobozi wa Ferwafa yavuze ko badahagarikiye aho kuko ngo buri mwaka bazajya bareba mu byo bamaze kugeraho hanyuma bakuremo umusanzu bazajya batera icyo kigega.

Kugeza ubu Ubuyobozi bw’iki kigega butangaza ko amafaranga bafite bayaguriza za banki na Leta, gusa ngo mu mwaka utaha bazatangira kuyashora mu mishinga itandukanye.

Kuva mu mwaka wa 2012, Perezida wa Repubulika Paul Kagame atangije Ikigega Agaciro Development Fund, Abanyarwanda n’inshuti zabo bakomeje gutangamo imisanzu bashyigikira umuco wo kwigira. Kugeza ubu hamaze gutangwa asaga miliyari 38 z’amafaranga y’u Rwanda.

Inkuru bifitanye isano: Mu myaka itanu,ikigega Agaciro Development Fund kimaze gutangwamo Miliyari 38

Umuyobozi wa Ferwafa, Nzamwita Vincent De Gaule (ibumoso) ashyikiriza Kayonga Jack uyobora Ikigega Agaciro sheke ya miliyoni 34 n'ibihumbi 200 z'amafaranga y'u Rwanda
Perezida wa Ferwafa, Nzamwita Vincent n'Umuyobozi w'Ikigega Agaciro, Jack Kayonga
Perezida wa Ferwafa, Nzamwita Vincent atangaza ko bazakomeza gutanga umusanzu wabo muri iki kigega
Umuyobozi Mukuru w'Ikigega Agaciro, Jack Kayonga yasabye abandi Banyarwanda kwigira kuri Ferwafa nabo bagatanga umusanzu wabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE