Kwamamaza

Banki y’Abaturage yungutse imbaraga zizayifasha kwesa imihigo

Yanditswe kuya 4-08-2016 saa 13:32' na Philbert H


Banki y’Abaturage y’u Rwanda yungutse imbaraga, nyuma y’aho umwe mu banyamigabane bayo, Rabobank, agiranye amasezerano n’ibindi bigo by’imari bikomeye, bikazayifasha kuba icyitegererezo mu gukoresha ikoranabuhanga no kurigeza ku batararigezwaho bose.

Mu kiganiro yagiranye n’abanyamakuru kuri uyu wa Kane, Sanjeev Anand, Umuyobozi mukuru wa BPR yatangaje ko amasezerano y’ubufatanye Rabobank yagiranye n’ibindi bigo by’imari ari byo Norfund na FMO, azatanga amahirwe menshi kuri Banki y’Abaturage isanganywe umunyamigabane mukuru Atlas Mara.

Sanjeev yagize ati “BPR twishimiye ubu bufatanye bw’umunyamigabane ukomeye muri banki yacu, akaba n’umuterankunga w’ibanze mu kubaka urwego rw’imari ruhamye muri Afurika yo munsi y’ubutayu bwa Sahara.”

Norfund, FMO na Rabobank bisanzwe bifite imigabane mu bigo bitanga serivisi z’imari bitandukanye muri Afurika yo munsi y’Ubutayu bwa Sahara.

Ibyo bigo uko ari bitatu byiyemeje kugirana ubufatanye hagamijwe cyane cyane gushyiraho ibindi bigo by’imari bifite ubushobozi bwo gufasha ibigo bito n’ibiciriritse, ibyaro ndetse n’abandi bakiriya bose batashoboraga kugezwaho serivisi z’imari mu buryo bworoshye.

Berry Martin, Umwe mu bagize inama y’Ubutegetsi ya Rabobank yatangaje ko ibikorwa by’icyo kigo bigamije gushora imari no gushyiraho ibigo bihamye, bitanga serivisi mu bihugu biri mu nzira y’amajyambere, cyane cyane ibiherereye munsi y’ubutayu bwa Sahara.

Yagize ati “Ibi bijyamye neza n’icyerekezo na gahunda yacu nka banki igamije guteza imbere ubuhinzi, yibanda cyane mu gufasha abakiliya gushaka ibisubizo no guhaza Isi mu mwaka wa 2050. Ni ngombwa cyane rero ko duharanira icyatuma tubigeraho.

Guhuriza hamwe ingufu, imari, ubumenyi n’ubunararibonye by’ibigo bikomeye kandi byizewe cyane nka Norfund na FMO, ni intambwe ikomeye izatuma byose bigerwaho.”

Ubufatanye bw’ibyo bigo uko ari bitatu ni amahirwe akomeye kuri BPR, kuko bugiye gutuma Rabobank iba Umunyamigabane ukomeye kurushaho, bityo binahe abagize inama y’ubutegetsi ubumenyi bwisumbuye n’ubunararibonye bwihariye, buzatuma ibasha kunoza gahunda n’icyerekezo cy’iterambere ifite.

Rabobank yari isanzwe ifatanya na BPR mu bya tekiniki ndetse no mu kunoza imiyoborere, bikazakomeza ari na ko hashyirwaho izindi gahunda zigendeye ku bunararibonye n’ubushobozi bw’abafatanyabikorwa bashya.

Ubwo bufatanye bwa Norfund, FMO na Rabobank buzibanda ku mugabane wa Afurika, aho hazashyirwaho ikigo gishinzwe ishoramari n’iterambere, kikazitwa ARISE, kikazatangirira mu bihugu 20, kikazatangira kandi gukora kuwa 1 Mutarama 2017.

Icyo kigo ngo kizashora amadolari ya Amerika miliyoni Magana atandatu na mirongo itandatu (USD 660M) ateganywa ko aziyongera kugera kuri miliyari imwe, akazashorwa mu gufasha ibyo bigo ndetse n’ibindi bito bifitemo imigabane.

Rabobank ni banki yo mu Buholandi ifite imisusire nk’iya Koperative, ikaba Umunyamigabane wa kabiri wa BPR kuva mu 2008, ubwo yaguragamo imigabane 35%, mu gihe Umunyamigabane wa mbere ari Atlas Mara ifitemo imigabane 62%, ari na yo yabumbiye hamwe iyo banki y’abaturage na banki y’amajyambere (BRD) cyari kimaze kugura.

Norfund ni ikigega cyo muri Norvege, gishinzwe ishoramari mu bihugu bikiri mu nzira y’amajyambere, kikaba cyarashyizweho n’Inteko Ishinga Amategeko y’icyo gihugu mu 1997.

FMO na yo ni banki yo mu Buholandi ishinzwe iterambere, ikaba itera inkunga ibigo byo mu bihugu bikiri mu nzira y’amajyambere n’indi mishinga mishya, aho iba ifatanyije na ba rwiyemezamirimo.

BPR yishimiye abafatanyabikorwa bashya
Ronald Musoni, umwe mu bakozi ba BPR
Gisele Ingabire ushinzwe imenyekanishabikorwa muri BPR
Sanjeev ANAND, Umuyobozi mukuru wa BPR

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved