BK yahawe inguzanyo y’asaga miliyari 20 azateza imbere ibigo bito n’ibiciriritse

Yanditswe na Ferdinand Maniraguha
Kuya 20 Kamena 2019 saa 08:06
Yasuwe :
0 0

Ikigo cy’Abafaransa gishinzwe Iterambere (Agence Française de Développement, AFD) cyahaye Banki ya Kigali (BK) inguzanyo ya miliyoni 20 z’amayero (asaga miliyari 20 Frw) yo guteza imbere ibigo bito n’ibiciriritse mu Rwanda.

Iki kigo kandi cyiyemeje gutanga ibihumbi 300 by’amayero (asaga miliyoni 300 Frw) azifashishwa mu bya tekiniki.

Aya mafaranga y’inguzanyo azatangwa mu nzego ziganjemo ikoranabuhanga, ubuhinzi, ubworozi ndetse n’ingufu.

Ni amafaranga azatangwa ku bigo bito n’ibiciriritse byo mu Rwanda bifite abakozi batarenga ijana kandi bikeneye amafaranga atari hejuru ya miliyoni 500 Frw.

Kuri uyu wa Kane mu muhango wo gusinya aya masezerano y’inguzanyo, Umuyobozi Mukuru w’Ikigo BK Plc kibarizwamo Banki ya Kigali, Dr Diane Karusisi yavuze ko iyo nguzanyo ije gushimangira umubano mwiza hagati ya AFD na BK dore ko ibyo bigo byatangiye ubufatanye guhera mu 2014.

Yagize ati “Aya masezerano aje gushimangira umubano mwiza ibigo byacu byombi bisanganywe, akaba aje gufasha BK gukomeza gutanga inguzanyo ku bigo bito n’ibiciriritse. Inkuru nziza nuko abakora mu nzego zose bemerewe gusaba iyi nguzanyo ariko kubera ko AFD yibanda cyane ku bidukikije n’iterambere rirambye, tuzibanda ku buhinzi, ubworozi, ikoranabuhanga n’ingufu.”

Iyi nguzanyo Dr Karusisi yavuze ko bazayishyura mu myaka umunani, ikishyuranwa inyungu iri hagati ya 6% na 7%.

Yakomeje avuga ko kuba bahawe inguzanyo ku mafaranga make kandi mu gihe kirekire, bizatuma n’abakiliya bashaka inguzanyo muri BK bayihabwa ku nyungu nto.

Kuba bagiye kwibanda ku buhinzi n’ubworozi, Dr Karusisi yashimangiye ko ari uko ari urwego rukomeye mu bukungu bw’u Rwanda.

Ati “Turashaka gushyira amafaranga menshi mu buhinzi n’ubworozi, kuko ni urwego rukomeye cyane mu bukungu bwacu. Ahandi ni mu mashanyarazi kuko nayo turashaka kureba uko dushishikariza abanyarwanda kugira amashanyarazi avuye ku mirasire y’izuba n’ahandi.”

Umuyobozi Mukuru wa AFD, Rémy Rioux, yavuze ko bafite icyizere ko BK izakoresha neza iyo nguzanyo, bashingiye ku mikoranire basanzwe bafitanye.

Rioux yavuze ko icyiza kurushaho ari uko inguzanyo batanze igiye gukoreshwa mu guteza imbere ubukungu bw’u Rwanda, busanzwe butanga icyizere.

Ati “Ni byiza kuba twatanze iyi nkunga yacu mu Rwanda kuko ubukungu bwaho bugenda neza ugereranyije n’ahandi muri Afurika. Niho hantu dukwiriye kuba dushyira imbaraga nyinshi.”

Dr Karusisi yavuze ko bakurikije inguzanyo bahawe, nibura ibigo bito n’ibiciriritse bigera kuri 50 bizagurizwa ku nyungu iri hagati ya 15 % na 17%.

AFD isanzwe itera inkunga imishinga itandukanye muri Afurika cyane cyane imito n’iciriritse. Uyu mwaka iki kigo giteganya gutera inkunga imishinga ya miliyari 14 z’amayero hirya no hino ku Isi, kandi kimwe cya kabiri kizajya muri Afurika.

Umuyobozi Mukuru wa AFD, Rémy Rioux (ibumoso) n'Umuyobozi Mukuru wa BK Plc Dr Diane Karusisi basinya amasezerano y'inguzanyo
Kuba bagiye kwibanda ku buhinzi n’ubworozi, Dr Karusisi yashimangiye ko ari uko ari urwego rukomeye mu bukungu bw’u Rwanda
AFD na BK bisanzwe bifitanye umubano mwiza guhera mu 2014
Rioux yavuze ko icyiza kurushaho ari uko inguzanyo batanze igiye gukoreshwa mu guteza imbere ubukungu bw’u Rwanda, busanzwe butanga icyizere.
Umuyobozi Mukuru w’Ikigo BK Plc kibarizwamo Banki ya Kigali, Dr Diane Karusisi yavuze ko iyo nguzanyo ije gushimangira umubano mwiza hagati ya AFD na BK
Abayobozi ba BK n'aba AFD bafata ifoto y'urwibutso

Amafoto:Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza