BDF yafatanyije n’amabanki gusobanura uko bakorana mu gufasha umuturage kubona inguzanyo

Yanditswe na Mukaneza M.Ange
Kuya 30 Kamena 2018 saa 11:48
Yasuwe :
0 0

Mu gufasha abaturage kurushaho gusobanukirwa no kugira amakuru yuzuye, Ikigega gitanga ingwate (BDF) cyafatanyije n’amabanki gusobanura uburyo bikorana kugira ngo abifuza inguzanyo bazihabwe.

Iki gikorwa cyakozwe mu bukangurambaga bwari bumaze ukwezi, cyabaye ku wa 29 Kamena 2018, haganirizwa abari bitabiriye imurikagurisha ry’ibikorerwa mu Rwanda (Made in Rwanda Expo), mu gace kahariwe abanyamaguru ‘Car Free Zone’ mu Mujyi wa Kigali.

Muri ubu bukangurambaga, abacuruzi n’abakora ibintu bitandukanye birimo imyenda, inkweto, ibikapu n’ibindi basobanuriwe uko barushaho kwagura ibyo bakora, bagahabwa inguzanyo bishingiwe ingwate na BDF.

Abakozi b’iki kigo n’ab’amabanki atandukanye basobanuriye abacuruzi, bigaragara ko hari benshi batari bafite amakuru ko umuntu akora umushinga, BDF ikamufasha kuwunonosora, banki yamara kuwemerera inguzanyo, yo ikihingira ingwate.

Mukarubuga Adelinda ukora mu nzu idoda ubwoko butandukanye bw’imyenda ya Odileira Fashion Designs, yavuze ko kuba BDF yafatanyije na banki bakabegera, byatumye barushaho kugira amakuru y’ukuri no kumenya inzira banyuramo kugira ngo babone inguzanyo.

Yagize ati “ Ndi umudozi udoda ibintu bitandukanye, BDF nari nsanzwe nziko ifasha umuntu kubona inguzanyo binyuze mu kumworohereza kubona ingwate. Uyu munsi ariko narushijeho gusobanukirwa inzira binyuramo, ndetse nibonera n’abatangabuhamya babashije kwiteza imbere babikesha BDF.”

Yakomeje avuga ko mu kazi ke ka buri munsi, uretse abaza bamugana ngo abadodere nawe aba afite imideli ye yahanze yifuza gucuruza, akaba yifuza kuba yakorana na BDF kugira ngo abashe kubona inguzanyo yakoresha mu gutangiza iduka yajya ayicururizamo.

Uwitwa Jeanette nawe ucuruza ibirimo imyenda, ibikapu n’inkweto byose bikorerwa mu Rwanda yahamije ko aribwo bwa mbere yari agize amahirwe yo kubona umuntu umusobanurira imikorere ya BDF imbona nkubone, ahamya ko nyuma yo kubona amakuru ahagije agiye gutekereza uko yategura umushinga akaka inguzanyo.

Umuyobozi ushinzwe imibanire ya BDF n’ibindi bigo, Mugisha Albert, yavuze ko ibikorwa nk’ibi bimaze igihe bikorwa mu gihugu hose, ikigamijwe akaba ari ugufasha abantu kurushaho gusobanukirwa ibijyanye n’ingwate ku nguzanyo.

Ati “ Hari abumvaga BDF kuri radiyo ariko batazi uko ikora, hari n’abari bayumvise bwa mbere. Ubundi buri bucuruzi bwose buba bukeneye igishoro, urabona n’aba bari muri Made in Rwanda bafite ibintu bito kuko niko bari bashoboye, ariko baramutse bagize amahirwe yo kujya muri banki bakabona inguzanyo bakwagura ibikorwa byabo.”

Mugisha yakomeje avuga ko bahisemo gukora ubu bukangurambaga bafatanyije na banki zitandukanye, kugira ngo abantu barusheho gusobanukirwa inzira nyayo binyuramo kugira ngo umuntu ahabwe inguzanyo ariko yishingiwe na BDF.

BDF yashyizweho ku bufatanye bwa Guverinoma y’u Rwanda na Banki y’Igihugu Itsura Amajyambere (BRD), ngo ifashe abaturage kwiteza imbere binyuze mu kubona ingwate ku nguzanyo.

Kugeza ubu BDF ifite imishinga hafi ibihumbi 10 yishingiye ku ngwate. Itanga ingwate igera no kuri miliyoni 500 Frw ku mishinga y’ubuhinzi n’ubworozi na miliyoni 20 Frw ku bifuza kuzahura ubucuruzi bwabo. Igihe gito ku mishinga yishingirwa ingwate ni umwaka umwe, ikirekire gishoboka kikaba imyaka 10.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza