Banki ya Kigali yatangije ikigo gitanga serivisi z’ubwishingizi

Yanditswe na Mukaneza M.Ange
Kuya 16 Werurwe 2017 saa 09:02
Yasuwe :
0 0

Banki ya Kigali, BK imaze imyaka igera kuri 50 itanga serivisi z’imari mu Rwanda, yinjiye mu bijyanye n’Ubwishingizi itangiza ikigo BK General Insurance (BKGI).

Iki kigo cyahawe uruhushya rwo gutanga serivisi z’ubwishingizi na Banki Nkuru y’Igihugu mu mpera za 2016, cyatangijwe ku mugaragaro kuri uyu wa 17 Werurwe 2017.

BKGI ifite imari shingiro ya miliyari eshanu z’amafaranga y’u Rwanda, izajya itanga ubwishingizi butandukanye ukuyemo ibijyanye n’indwara n’ubuhinzi bikiri kunonosorwa.

Umuyobozi Mukuru wa BK, Dr Diane Karusisi, yavuze ko BKGI izanye uburyo busa n’aho ari bushya mu bijyanye n’ubwishingizi mu Rwanda kuko byahujwe na serivisi z’imari.

Ati ”Uburyo bwose twashyizeho mu gutanga serivisi za banki niko dushaka gutanga serivisi z’ubwishingizi. Tubona ko ari uburyo bwiza ku bakiliya bacu no ku Banyarwanda bose muri rusange.”

Umuyobozi wa BKGI, Alex Bahizi, yavuze ko mbere yo gutangiza iki kigo babanje gukora ubushakashatsi aho basanze abaturage benshi bumva ko ubwishingizi ari ubw’abafite imitungo myinshi, mu gihe abandi bavuze ko ku bufata bihenze.

Yakomeje avuga ko nyuma yo kumenya ibi bibazo, batekereje uburyo bazana serivisi z’ubwishingizi zizana ibisubizo kandi bigenewe buri wese ndetse banashyiraho uburyo n’umuntu ku giti cye yabufata.

Bahizi kandi yavuze ko BKGI yihaye intego yo kwinjiza miliyari 23 z’amafaranga y’u Rwanda azatangwa n’abifuza ubwishingizi, ndetse ikanigarurira 12% by’isoko ry’ubwishingizi mu Rwanda.

Mu bihe biri imbere BK kandi irateganya gukorana n’Ikigo Africa Investments Ltd kimaze imyaka isaga 150 gitanga serivisi z’ubwishingizi muri Mauritius, kizagura 30% by’imigabane ya BKGI.

Mu Rwanda ibijyanye n’ubwishingizi ntibiritabirwa uko bikwiye, kuko buri ku kigero cya 2.8% gusa; ibigo 11 ni byo bimaze guhabwa ibyangombwa byo gutanga izi serivisi.

Umuyobozi Mukuru wa BK, Dr Diane Karusisi, afungura ku mugaragaro ikigo cy'iyi banki kizajya gitanga serivisi z'ubwishingizi
Iki kigo kizajya gitanga ubwishingizi butandukanye ukuyemo ibijyanye n’indwara n’ubuhinzi
Bamwe mu bitabiriye umuhango wo gutangiza ku mugaragaro ikigo cya BK kizajya gitanga serivisi z'ubwishingizi
Umuyobozi Mukuru wa BK, Dr Diane Karusisi, yavuze ko BKGI izanye uburyo busa n’aho ari bushya mu bijyanye n’ubwishingizi mu Rwanda kuko byahujwe na serivisi z’imari

[email protected]

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza