Kwamamaza

Asaga miliyari 80 yashowe mu guteza imbere imijyi izunganira Kigali

Yanditswe kuya 20-09-2016 saa 21:55' na Mukaneza M.Ange


Mu rwego rwo kuzamura iterambere ry’imijyi yunganira Kigali ifatwa nk’umwe mu miyoboro ikomeye yo kwihutisha iterambere ry’igihugu no gusaranganya ubukungu mu banyarwanda, amafaranga asaga miliyari 80 z’amanyarwanda (miliyoni 100 z’amadorali) agiye gukoreshwa mu kuyishyiramo ibikorwaremezo no kuvugurura ibihasanzwe.

Aya mafaranga azatangwa na Banki y’Isi ku bufatanye na Leta y’u Rwanda, azakoreshwa mu mushinga w’imyaka itanu iri imbere ugamije guteza imbere imijyi itandatu izunganira umujyi wa Kigali ariyo Nyagatare, Muhanga, Huye, Rusizi, Rubavu na Musanze ndetse no kuzamura iterambere rya tumwe mu duce two mu Karere ka Nyarugenge.

Ubwo yatangizaga ku mugaragaro uyu mushinga, Minisitiri w’Ibikorwa Remezo, James Musoni, yavuze ko aya mafaranga azakoreshwa mu kubaka imihanda, imiyoboro y’amazi ndetse no kongerera ubumenyi inzego z’ubuyobozi bw’iyi mijyi.

Ati ”Uyu mushinga uzarushaho guteza imbere imijyi binyuze mu bikorwa remezo nk’imihanda, inzira z’abanyamaguru, ibikorwa bijyanye n’ubuzima, imiyoboro y’amazi, amatara ku mihanda ndetse no guhuza ibikorwa bitandukanye by’ubukungu.”

Yakomeje avuga ko hazakorwa imihanda ingana na kilometero 81 muri iyi mijyi yose n’akarere ka Nyarugenge, kilometero 44 z’imiyoboro y’amazi na ho hegitari 86 z’ubutaka zizongererwa agaciro (kuko zizaba zanyujijweho ibikorwa remezo).

Umunyamabanga uhoraho muri iyi Minisiteri, Rwakunda Christian, yavuze ko uyu mushinga ugizwe n’ibice bibiri, aho igice cya mbere kizamara imyaka ibiri, hanyuma hakurikireho icya kabiri kizamara imyaka itatu.

Yakomeje avuga ko hari aho bizaba ngombwa ko bimura abantu nk’ahazashyirwa imihanda n’imiyoboro y’amazi kandi ko ahazongererwa agaciro abahatuye ari bo bazabyungukiramo, kuko ubutaka bwabo buzarushaho guhenda.

Umuyobozi w’akarere ka Nyarugenge, Kayisime Nzaramba yavuze ko muri uyu mushinga hazavugururwa akagali ka Rwampala, Biryogo, Kiyovu na Agatare.

Yakomeje avuga ko nta muturage bazasaba kwimuka, kandi n’abo bizaba ngombwa bitewe n’aho batuye ngo hari ahantu bagenewe bazimurirwa ariko hatari kure y’ibyo bikorwa remezo bigeye kubakwa.

Mininfra igaragaza ko 95% by’amafaranga azakoreshwa muri uyu mushinga ari inguzanyo ya Banki y’Isi mu gihe 5% ari uruhare rwa Leta y’u Rwanda.

Minisitiri Musoni avuga ko muri uyu mushinga hazubakwa imihanda, imiyoboro y'amazi n'ibindi
Uyu mushinga uzakorwa ku bufatanye bwa Banki y'Isi na Leta y'u Rwanda
Meya Kayisime (ibumoso) yemeza ko ibi bikorwa nta muturage bizabangamira
Impande zombi mu ifoto y'urwibutso

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 24 September 2016
Copyright © 2009 -2014 - IGIHE Ltd - All Rights Reserved