Abikorera bagiye gushora miliyari 40 Frw mu kubaka ahazajya habera imurikagurisha

Yanditswe na Kanamugire Emmanuel
Kuya 8 Ukuboza 2016 saa 04:33
45 31

Urugaga rw’abikorera mu Rwanda ruri kunoza umushinga wo kubaka igice kizajya kiberamo imurikagurisha mpuzamahanga mu Mujyi wa Kigali, igikorwa gifata nk’ikizahindura isura y’imurikagurisha ngarukamwaka risanzwe ribera mu Rwanda, mu mushinga uzatwara hagati ya miliyoni $30 na $50.

Ubwo abanyamuryango bagera ku 2000 bagize urugaga rw’abikorera, PSF, bahuraga na Perezida Kagame kuwa Mbere w’iki cyumweru, Umuyobozi Mukuru w’uru rugaga, Benjamin Gasamagera, yabwiye Umukuru w’Igihugu ko biyemeje “gushyira imbaraga nyinshi mu guteza imbere ikoranabuhanga n’ubukerarugendo, aha abikorera bagateganya kubaka ikigo gikorerwamo amamurikagurisha ari ku rwego mpuzamahanga.’’

Iyi gahunda yavuzwe kenshi ariko ikagenda ihura n’ibizazane, ndetse imurikagurisha rimaze imyaka 19 riba mu Rwanda, umuyobozi muri PSF, Gerard Mukubu, yavuze ko kwimura ahabera imurikagurish habayemo ibibazo, nyuma y’uko ikibanza bari bafite i Kagarama baje gusanga ari icyo guturwamo bityo baguranirwa i Gahanga, kuhubaka bikaba byatwara imyaka.

Ati "Ikibazo cya Gahanga ni umushinga ukomeye wenda tuzamara n’imyaka n’itanu cyangwa itandatu, turacyavugana na Leta ngo turebe uko dufatanya mu mushinga wacu wo kuhubaka ariko dufatanyije n’ibindi bikorwa Leta nayo ishaka kuhubaka bya Stade, ibyo ni byo bishobora kuba byaratinzemo kugirango umushinga ugende neza".

Mu mwaka ushize nabwo Minisitiri w’Intebe, Anastase Murekezi ubwo yafunguraga ku mugaragaro iri murikagurisha mpuzamahanga yasabye ko umwaka ukurikiyeho (2016) ryakwimurirwa ahandi kuko hari n’abasabye kumurika ariko batabonye ibibanza.

Ati “Maze gusura iyi Expo biragaragara ko ibintu bimurikwa bimaze kuba byinshi cyane ku buryo bushimishije n’abamurika baba abanyarwanda n’inshuti z’u Rwanda nabo ni benshi. Birasaba rero ko haboneka ahandi hantu hagutse, ahantu hagezweho, ahantu hashyashya ho gukorera imurikagurisha mpuzamahanga ryo mu Rwanda.”

Gusa nabyo ntibyashobotse, amaso arakomeza guhangwa ikibanza cya hegitari 13 kiri i Gahanga mu karere ka Kicukiro.

Kera kabaye imirimo igiye gutangira

Gasamagera yabwiye IGIHE ko imirimo ikomeje gutegurwa ngo ubwubatsi butangire vuba, ndetse itsinda ryahawe gukora inyogo rikaba ririmo kuyinoza.

Ati “Ni vuba cyane kubera ko iriya gahunda imaze igihe kirekire cyane, yagiye ikomwa mu nkokora no kugura ikibanza, ubu ikibanza noneho twarakibonye i Gahanga, ikibanza gifatanye n’icya Stade. Imbanzirizamushinga zarakozwe, icyo tugiye kugira ni uko umushinga uzashyirwa mu bikorwa tukaba twabimurika ku mugaragaro, dukomeza twinjira mu kubishyira mu bikorwa.’’

“Twarebaga ko byakorwa hagati y’imyaka ibiri n’imyaka itatu. Ni ibintu twatekereje igihe kirekire, ibintu tukabiteganya bigapfa, ariko ni hagati ya miliyoni $30 na miliyoni $50, ariko ushobora kugenda ubikora mu byiciro.’’

Ushyize mu mafaranga y’u Rwanda, ni ukuvuga hagati ya miliyari 24.2 na 40.4 z’amafaranga y’u Rwanda, ashobora gukoreshwa mu kubaka aho hantu hagezweho.

Gasamagera yavuze ko bizatuma abanyamahanga benshi baza kumurika ubucuruzi bwabo mu Rwanda, ku buryo byagera no mu bucuruzi bwihariye, kuko u Rwanda rwiyemeje kwinjiza amafaranga menshi binyuze no mu bantu rwakira mu biganiro n’inama mpuzamahanga, gahunda izwi nka MICE (Meetings, Incentives, Conferences and Events).

Ati “Hazaba ari ahantu hagezweho ku buryo habera abantu bo mu ngeri zose kuko byazakomeza ririya murikagurisha mpuzamahanga dufite, ariko tukaba twanagira andi mamurikagurisha yihariye nk’ariya tugira y’ubuhinzi, ikoranabuhanga, tukaba twagira iy’ubukerarugendo, burya ibintu byose bicuruzwa bishobora kugira imurikagurishwa ryabyo.’’

“Iki turi kubara ni isoko ry’akarere kugira ngo abantu bo hanze cyane cyane bajye baza kwerekanira ibintu byabo inaha, ku buryo n’abanyafurika baza kubirebera hano. Mu iteganyabikorwa twakoraga, amakuru yavagamo wabonaga ari n’ibintu byatanga umusaruro no muri MICE, bishobora kugaruza amafaranga mu gihe cya vuba cyane.’’

Abikorera kandi bari muri gahunda yo gushyigikira gahunda yo gukoresha no kongera ibikorerwa mu Rwanda, bakagabanyaho hagati ya 30% na 50% ku bitumizwa mu mahanga mu gihe cy’imyaka itanu, cyane ibikomoka ku buhinzi.

A bikorera ku giti cyabo ubwo bagiranaga ikiganiro na Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE