Abanyarwanda 50 bagiye koherezwa i Burayi kwiga kubyaza nyiramugengeri amashanyarazi

Yanditswe na Mathias Hitimana
Kuya 10 Mutarama 2017 saa 03:56
45 31

Mu gihe u Rwanda rurwana no kongera ingano y’amashanyarazi rufite,haranitabwa ku kuba ikoranabuhanga abashoramari b’abanyamahanga bazana mu mashyanyarazi ryagera no ku Banyarwanda, ngo abanyamahanga bataziharira akazi.

Ibi bigaragara mu mushinga w’uruganda rushya rw’amashanyarazi azakomoka kuri nyiramugengeri, watangiye imirimo mu Murenge wa Mamba, Akarere ka Gisagara.

Leta yahaye umushoramari, Hakan Karasoy, hegitari 4200 mu gishanga cy’Akanyaru, kuva mu Murenge wa Gishubi mu Karere ka Gisagara kugera mu Karere ka Bugesera, ku kiraro cya Rwabusoro. Nyiramugengeri iri muri iki gice,ikaba ishobora kugaburira uruganda mu gihe cy’imyaka 30.

Uruganda ruzatunganya iyi nyiramugengeri, rutange amashanyarazi angana na megawati (MW) 80 mu cyiciro cya mbere mu mpera z’umwaka wa 2019,ariko nyuma rukazongeraho izindi 40.

Sosiyete Hakan Ltd izakora uyu mushinga w’amezi 42, uhereye ku itariki 14 Ugushyingo 2016, ubwo Leta y’u Rwanda yasinyanaga amasezerano n’umushoramari.

Eng.Nkurikiyumukiza Gaspard ukuriye ishyirwa mu bikorwa ry’uyu mushinga yeretse itangazamakuru ko imirimo yatangiye, kandi n’Abanyarwanda bazungukiramo tekinoloji izakoreshwamo, bikaba bikubiye no mu masezerano.

Yagize ati “Umushoramari yasezeranye na leta ko imirimo idasaba tekiniki zihambaye zo kuva hanze izakorwa n’Abanyarwanda, ariko imirimo isaba inzobere mu cyiciro runaka, haba mu kubaka uruganda cyangwa gucukura nyiramugengeri hazitabazwa izizaturuka hanze, ariko zitaje gukora mu gihe cyo guhora ino, bazaza bahugure Abanyarwanda bakore ya mirimo.”

Enjeniyeri Nkurikiyumukiza Gaspard yemeza ko Abanyarwanda ari bo gusa bazaba bakora mu ruganda mu myaka icumi rutangiye(Ifoto/Mathias H.)

Akurikije ibyiciro by’uyu mushinga, Eng. Nkurikiyumukiza avuga ko uyu mushinga uzakorana na za IPRC, higishwa tekinoloji ikoreshwa.

Uretse abazahugurirwa mu Rwanda, anavuga ko biteganyijwe ko uruganda ruzajya gutangira gutungunya amashanyarazi, hari Abanyarwanda babarirwa muri 50 bazaba bavuye kwiga muri Finland iby’iyo tekinoloji. Bazamarayo umwaka n’amezi atandatu.

Kubw’ibyo, uru ruganda rw’amashanyarazi, ruzagera igihe rushiremo abanyamahanga.

Nkurikiyumukiza yagize ati "Mu ntangiriro bizaba ari 100 % ari abanyamahanga ariko bari kumwe n’abenjenyeri b’ino aha, nyuma y’imyaka itanu muri ba banyamahanga hasigaremo 50%, na 50% y’abanyarwanda ; mu myaka icumi ruzaba 100 % rukoreshwa n’Abanyarwanda gusa."

Mu mizo ya mbere hari no gucukura nyiramugengeri, uru ruganda ruzakoresha abakozi babarirwa hagati ya 1000 na 1500.

Imashini zizakoreshwa mu mirimo y'uruganda zarahageze (Ifoto/Mathais H)
Igishanga cy'Akanyaru ku mupaka w'u Rwanda n'u Burundi ni cyo kizacukurwamo nyiramugengeri (Ifoto/Mathias Hitimana)
Umusore w'i Gisagara utarabashije kurangiza amashuri yisumbuye ari mu bamaze kwiga gutwara izi mashini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE