Abanyarwanda batatu bashyizwe muri ba Rwiyemezamirimo bato batanga icyizere muri Afurika

Yanditswe na Cyprien Niyomwungeri
Kuya 14 Werurwe 2017 saa 12:48
Yasuwe :
1 1

Abanyarwanda batatu bakaba na ba Rwiyemezamirimo bakiri bato, bashyizwe ku rutonde rwa ba Rwiyemezamirimo 30 bari munsi y’imyaka 35 batanga icyizere mu bikorwa by’iterambere ry’ubukungu muri Afurika.

Kuva mu 2013 ikinyamakuru Forbes.com gikora urutonde rwa ba Rwiyemezamirimo bato batanga icyizere muri Afurika. Uyu mwaka abarenga 250 baturutse mu bihugu 23 nibo batoranyijwemo 30, batanga icyizere kurusha abandi.

Inzego zibanzweho uyu mwaka ni inganda, itangazamakuru, ikoranabuhanga, ubuhinzi n’imideli. Ni urutonde rugaragaraho Abanyarwanda batatu ari bo; Teta Isibo, Jean Bosco Nzeyimana na Sonia Mugabo. Mu muryango wa Afurika y’Iburasirazuba, hariho n’Abanya- Tanzania batandatu, Umugande umwe n’Abanya-Kenya bane.

Teta Isibo

Rwiyemezamirimo, Teta w’imyaka 32, yashinze inzu yitwa ‘Inzuki Designs’, ikora imitako inyuranye ari iyambarwa n’itakwa mu nzu, intebe n’ibindi bikoresho bya Kinyarwanda.

Teta afite iduka rikomeye mu Mujyi wa Kigali, ndetse ibicuruzwa bye bigurishirizwa mu mamurikagurisha atandukanye yo mu Rwanda no mu mahanga.

Teta Isibo yashinze inzu yitwa ‘Inzuki Designs’, ikora imitako inyuranye

Jean Bosco Nzeyimana

Jean Bosco Nzeyimana w’imyaka 23, akomoka mu Karere ka Nyamagabe, yashinze ikigo kitwa ‘Habona Ltd’ gikora ibijyanye no gukusanya imyanda kikayibyazamo ibicanwa birimo amakara azwi nka ‘Briquette’, bitangiza ibidukikije, biogas yo gutekesha n’ifumbire y’imborera ifasha abahinzi guhinga neza bakeza bakarwanya inzara n’ubukene.

Uyu ni umwaka wa gatatu ahanze uyu murimo, amaze guha akazi gahoraho abantu 25, afite intego yo gutanga 10% y’ibicanwa bikoreshwa mu Rwanda mu myaka itanu iri imbere.

Ku nshuro ya gatanu y’ibihembo by’urubyiruko rufite icyo rwagezeho bizwi ku izina rya “Celebrating Young Rwandan Achievers (CYRWA) Awards bitangwa na Madamu Jeannette Kagame, rwiyemezamirimo Nzeyimana yagaragaye mu icumi bakigenewe.

Jean Bosco Nzeyimana asobanura umushinga we 'Habona Ltd'

Sonia Mugabo

Rwiyemezamirimo w’umuhanzi w’imideli, Sonia Mugabo, ku myaka 26 amaze kwandika izina mu Rwanda ndetse no mu mahanga kubera inzu yise ‘SM’ [Sonia Mugabo] ikora kandi igacuruza imyambaro ivanzemo umwimerere wa Afurika n’imyambaro igezweho, benshi bemeza ko ari iwabo w’abazi kurimba.

Uretse kuba ibyo akora abikunda, Sonia yanagize amahirwe yo kwimenyereza umwuga mu bijyanye no kurimba muri Magazine ikomeye kw’Isi ‘Teen Vogue’ y’i New York muri Leta Zunze Ubumwe za Amerika (USA).

Mu mpera z’umwaka ushize Sonia Mugabo yafunguye iduka rishya muri Hotel Marriott, aho usangamo amashati y’abagabo yise “Gusimbuka urukiramende”, kikaba ari n’ikintu kitari gisanzwe mu mideli y’uyu muhanzi wakunze kwibanda cyane ku byambarwa n’abagore, imyambaro myinshi ikaba ikoze muri Cotton.

Uru rutonde kandi rugaragaraho Abanya-Nigeria, Abanya-Afurika y’Epfo n’abandi ba rwiyemezamirimo bato batanga icyizere.

Ruriho Jennifer Shigoli w’imyaka 30 wo muri Tanzania washinze ikigo Malkia Investments Company Limited, ikora ikanakwirakwiza ibikoresho by’isuku. Hariho Rajiv Mehta w’imyaka 31 washinze Tangerine Investments, yamamaza ikoresheje imodoka. Ifite abakiriya benshi yamamariza barimo Kenya Airways, Pizza Inn, Subway, Coca Cola HP n’ibindi, yinziza nibura miliyoni imwe y’amadolari ku mwaka.

Sonia Mugabo ubwo yari mu Nama y'Umushyikirano ya 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza