Abanyamuryango ba Vision Sacco Gahanga biyujurije inyubako ya miliyoni 118 Frw (Amafoto)

Yanditswe na Akayezu Jean de Dieu
Kuya 3 Kanama 2019 saa 08:19
Yasuwe :
0 0

Abanyamuryango ba Vision Sacco Gahanga yo mu Murenge wa Gahanga mu Karere ka Kicukiro, biyujurije inyubako nshya y’igorofa bitezeho ko izabafasha mu gutanga serivisi nziza no ku mutekano w’amafaranga babitsamo.

Iyi nyubako yatashwe ku mugaragaro kuri uyu wa Gatanu tariki 2 Kanama 2019, mu muhango witabiriwe n’abayobozi mu Karere ka Kicukiro, Ikigo cy’Igihugu gishinzwe Amakoperative, RCA, abanyamuryango, abakozi n’abayobozi ba Koperative Vision Sacco Gahanga.

Imirimo yo kubaka iyi nyubako yatwaye asaga miliyoni 118 Frw ashobora kuziyongera bitewe n’imirimo mike igikenewe kuyikorwaho.

Umuyobozi w’Inama y’Ubutegetsi ya Vision Sacco Gahanga, Bahati Innocent, yavuze ko igitekerezo cyo kubaka iyi nzu cyaje mu 2014, biturutse ku kuba abanyamuryango barabonaga ko aho ikorera hadahesha agaciro amafaranga yabo.

Yakomeje ati “Twari dusanzwe dutanga serivisi nziza ariko twagaburiraga ibiryo ku isahani mbi kandi buriya umuntu ukugaburiye ku isahani itogeje ntabwo bikuryohera ndetse ejo ntiwazagaruka. Natwe rero tugiye kujya tugaburira abantu ku isahani nziza kandi ni igikorwa kizongera abanyamuryango ba Sacco ya Gahanga n’iterambere ryayo muri rusange.”

Bahati yavuze ko babanje gukorera mu nyubako batijwe n’Umurenge wa Gahanga, nyuma bimukira mu yo batijwe n’Ihuriro ry’Imitwe ya Politiki mu Rwanda gusa n’igihe bari barahawe cyararenze.

Abanyamuryango b’iyi koperative bavuze ko umuhigo bari barihaye bawugezeho kandi biteze ko serivisi bahabwa zizarushaho kuba nziza.

Nsabimana Justin utuye mu Kagari ka Karembure, amaze imyaka itanu ari umunyamuryango wa Vision Sacco Gahanga.

Yagize ati “Aho bakoreraga hari hato, hafunganye ku buryo wabonaga ko no gushyiramo abakozi byari bigoye. Aha ngaha rero harisanzuye, n’abahakorera bazajya bakora neza birumvikana.”

Umucungamutungo wa Vision Sacco Gahanga, Umurerwa Triphose, yavuze ko n’ubwo batangaga serivisi, ubu bagiye kurushaho kunoza ibyo bakora kuko aho bazaba bakorera ari heza kandi hisanzuye.

Vision Sacco Gahanga yatangiye mu 2009, ifite abanyamuryango 2000 ariko kuri ubu ifite abasaga 5000. Abanyamuryango babikijemo asaga miliyoni 500 Frw.

Ubuyobozi bwashishikarije abaturage kugana iyi koperative ngo ibahe inguzanyo kuko amafaranga ahari.

Umukozi wa RCA ushinzwe Iterambere ry’Amakoperative, Kazenga Diogène, yavuze ko iyi Sacco ifite amafaranga menshi, anasaba abanyamuryango kujya bayigana ikabaha inguzanyo cyane ko ari n’imwe mu ntego z’Umurenge Sacco.

Umuyobozi mu Karere ka Kicukiro ushinzwe Iterambere ry’Ubucuruzi n’Umurimo, Murenzi Donatien, yashimye abanyamuryango ba Vision Sacco Gahanga bagize igitekerezo cyo kwiyubakira ahantu heza ho gukorera abasaba gukomeza gusigasira ibyagezweho.

Koperative Umurenge Sacco zashinzwe mu 2009 nyuma y’uko leta ibonye ko serivisi z’imari zitagera ku baturage neza nk’uko bikwiye. Kuri ubu zikorera mu mirenge yose uko ari 416 yo hirya no hino mu gihugu.

Abayobozi bafungura inyubako nshya ku mugaragaro
Abayobozi batemberejwe muri iyi nyubako
Abanyamuryango bitabiriye ibirori byo gutaha inyubako nshya yabo
Bamwe mu bitabiriye ibirori
Perezida w'Inama Njyanama y'Umurenge wa Gahanga, Bikorimana Jean de Dieu yashimye abanyamuryango ba Vision Sacco Gahanga biyubakiye inzu nshya yo gukoreramo
Umukozi wa RCA ushinzwe iterambere ry’Amakoperative, Kazenga Diogène ashyikirizwa ishimwe ryagenewe RCA
Umukozi w'Akarere ka Kicukiro ushinzwe iterambere ry'Ubucuruzi n'Umurimo, Murenzi Donatien yashimye ubuyobozi bwa Vision Sacco Gahanga
Umuyobozi w’Inama y’Ubutegetsi ya Vision Sacco Gahanga, Bahati Innocent, yavuze ko bari bamaze igihe kinini bakorera mu nyubako zitari izabo
Intebe zizajya zicaramo abagana iyi sacco zegeranye n'icyumba kizajya gikoreramo umucungamutungo
Umwe mu banyamuryango barambye muri Sacco Gahanga, Nsabimana Justin, yavuze ko kuba igiye gukorera mu nyubako nshya biteze umusaruro na serivisi nziza
Abakozi ba Vision Sacco Gahanga bagenewe ishimwe kubw'umurava bakomeje kugaragaza
Umunyamabanga Nshingwabikorwa w'Ihuriro ry'Imitwe ya Politiki, Burasanzwe Oswald ashyikirizwa ishimwe ryagenewe abafatanyabikorwa ba Vision Sacco Gahanga
Umucungamutungo wa Vision Sacco Gahanga, Umurerwa Triphose aganira n'umwe mu bitabiriye ibirori byo gutaha inyubako nshya
Bafashe ifoto y'urwibutso nyuma yo gufungura inyubako nshya ya Vision Sacco Gahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza