Kwamamaza

Abakuru b’ibihugu babiri bemeje kuzitabira inama ya TGAIS izabera mu Rwanda

Yanditswe kuya 27-08-2016 saa 11:01' na Cyprien Niyomwungeri


Abakuru b’ibihugu babiri nibo bamaze kwemeza ko bazitabira inama yiga ku ishoramari rya Afurika, TGAIS-COMESA, iteganyijwe kubera mu Rwanda kuwa 5-6 Nzeli uyu mwaka.

Iyi nama kandi izanitabirwa n’abayobozi ba za guverinoma, abayobora ibigo by’ubucuruzi n’abashoramari bose hamwe bagera ku 1000, ni umwanya udasanzwe wo guhanga igenamigambi ryahindura ahazaza ha Afurika.

Nk’uko urubuga rw’iyi nama rubigaragaza, Perezida Kagame w’u Rwanda na Yoweli Kaguta Museveni wa Uganda nibo bamaze kwemeza ko bazitabira ndetse bagatanga ibiganiro, ikazabera ahasanzwe habera inama hazwi nka Kigali Conference and Exhibition Village (Camp Kigali).

Abandi bashyitsi bakomeye bamaze kwemeza ko bazatanga ibiganiro harimo; Umunyamabanga mukuru wa COMESA, Dr.Sindiso Ngwenya, uwahoze ari umuyobozi w’akanama Mpuzamahanga k’Imari (IMFC), Dr Youssef Boutros Ghali, Intumwa y’u Bwongereza mu bijyanye n’ubucuruzi mu Rwanda na Uganda, Lord Dolar Amarshi Popat, n’Umuyobozi w’Ikigo Goldman Sachs cy’Abanyamerika gikora ishoramari, Colin Coleman.

Umuyobozi w’iyi nama, Paul Sinclair, avuga ko aya ari amahirwe akomeye ku bihugu bya Afurika yo gutangira umurongo w’ubufatanye mu mishinga ikurura abashoramari kandi isembura ubukungu.

Yagize ati “Iyi nama izahuriza hamwe abashoramari n’abayobozi b’ibigo by’ubucuruzi, yitezweho kuba intangiriro y’ubufatanye bushya no kwishyira hamwe mu kuzamura ubukungu bwa Africa ndetse no guhanga uburyo bwabasha guhagarara neza ku ruhando mpuzamahanga.”

Ibiganiro bizibanda ku ngingo zirimo ubucuruzi hagati y’uturere, ibimaze kugerwaho n’imbogamizi zigihari mu gucuruzanya hagati y’imiryango itatu, Tripartite Free Trade Area (TFTA), uko ishoramari ryafasha mu guhindura Afurika, ikoranabuhanga, guteza imbere ubuhinzi n’iterambere muri rusange.

TFTA ni gahunda yemeranyijwe yo gukorana ubucuruzi hagati y’Umuryango w’Ubucuruzi bw’ibihugu bya Afurika y’u Burasirazuba n’Amajyepfo (COMESA), Umuryango w’Iterambere ry’ibihugu bya Afurika y’Amajyepfo (SADC) n’Umuryango wa Afurika y’u Burasirazuba (EAC).

Hazaganirwa kandi ku buryo bwo kureshya abashoramari mu kongera ibikorwaremezo byo koroshya urujya n’uruza rw’ibicuruzwa n’abantu n’uburyo bwo guhuza gahunda n’amategeko.

Mu bandi bashyitsi bakomeye batumiwe barimo Perezida wa Tanzania, John Pombe Magufuli ari na we Muyobozi mukuru wa EAC, Minisitiri w’Intebe wa Ethiopie, Hailemariam Desalegn usanzwe ari umuyobozi wa COMESA na Perezida wa Botswana, Seretse Khama Ian Khama, uyobora SADC.

Inama nk’iyi yo mu mwaka wa 2015 yari yabereye mu Bwongereza, aho ikigo cy’igihugu cy’iterambere, RDB, keretse abashoramari uko hari kuvugururwa umujyi wa Kigali.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved