Abagore batangije ikigega ‘Rugori Fund’ kizakusanya miliyoni 20 z’amadolari

Yanditswe na Cyprien Niyomwungeri
Kuya 10 Werurwe 2017 saa 09:29
Yasuwe :
0 0

Abagore bibumbiye mu ihuriro New Faces New Voices, batangije ikigega ‘Rugori Fund’ kizahurizwamo ubwizigame bugera kuri miliyoni 20 z’amadolari, zizashorwa mu gufasha abantu kubona inguzanyo nini zo kwagura imishinga yabo.

Inama rusange y’iryo huriro yabaye kuri uyu wa Gatanu tariki 10 Werurwe 2017, yafashe umwanzuro wo gushinga iki kigega no kwemeza ibijyanye n’imikorere n’akamaro kacyo.

Umuyobozi wa New Faces New Voices mu Rwanda akaba na Guverineri wungirije wa Banki Nkuru y’Igihugu (BNR), Monique Nsanzabaganwa, yasobanuye ko iki kigega gifite intumbero ebyiri zigamije gufasha abagore kugera kuri serivisi z’imari no kwizigamira.

Yagize ati “Iki kigega kizajya gikora ibintu bibiri; gufasha abagore kuzigama kandi bakazigama bashora imari ku isoko ry’imari n’imigabane mu buryo butandukanye bibazanira inyungu buri gihembwe.”

Yakomeje agira ati “Kuri icyo gice cy’amafaranga bunguka buri gihembwe, hari umugabane bazashora mu ishami ry’igihe kirekire rizajya rifasha abantu kuba babona umwenda muri icyo kigega cyangwa kikajyana na bo mu ishoramari ry’imishinga yabo kikabafasha kwagura ibikorwa byabo.”

Yongeyeho muri ubu buryo bwo gufasha abantu mu nguzanyo n’ibishoro bifuza gutangirana miliyoni 20 z’amadolari ya Amerika. Abazashora imari by’igihe gito mu kigega Rugori Fund bazajya babona inyungu kuva ku 8% kuzamura buri gihembwe, naho abaka inguzanyo ku mishinga y’abagore bazihabwe ku nyungu itarenze 12%.

Nsanzabaganwa asobanura ko iki kigega kizunganira ibindi bigo by’imari hakaba ubwuzuzanye cyane cyane mu gutanga inguzanyo n’ibishoro.

Yagize ati “Icyo iryo shami ritanga igishoro ndetse n’inguzanyo zidahenze rizanye, ni ukunganira ibigo by’imari aho bigereza, rizana ubundi bwoko bw’imari ikenerwa mu bigo by’imari mu buryo bw’ubucuruzi cyangwa mu buryo bw’imishinga y’ubucuruzi.”

Mu kigega Rugori Fund hakenewe ko abagore bakusanya byibura miliyoni eshanu z’amadolari mu ishoramari ry’igihe kirambye, kugira ngo kibashe kureshya abashoramari banini na leta y’u Rwanda.

Iki kigega giteganya ko kizajya gitanga inguzanyo ku mishinga minini ifite agaciro k’ibihumbi 50 by’amadolari kuzamura yujuje ibisabwa ku nyungu itarengeje 12%, kigatanga ubufasha mu bumenyi, imicungire n’ibindi bituma rwiyemezamirimo agera ku ntego ye.

Kizaba gifite inzobere igicunga nkuko ikigo cy’igihugu cy’imigabane giteganya ibigega bigomba gucungwa, kandi umugabane ni amafaranga 1000 ariko ntawemerewe gufata iri munsi y’itanu.

Abagore bagihanze amaso

Bora Clementine Umunyamabanga w’Itsinda Turibamwe ryo mu karere ka Rubavu, yabwiye itangazamakuru ko iki kigega kizazamura ishoramari n’iterambere ry’umugore muri rusange.

Yagize ati “Iki kigega kirakenewe kandi sinzabyihererana ngiye kubishishikariza bagenzi banjye turi kumwe. Twari itsinda dukora ibintu bitandukanye tugahuriza hamwe ubwizigame gusa, ubu dushobora kwiga umushinga tugahurira ku kintu kimwe, ndetse tukarenga kuba itsinda tukaba na koperative.”

Cathy Kayitesi Umuyobozi wa Ihoho Events Management Ltd, yiteze ko kizunganira umugore wo mu cyaro, na we akabasha gukora ku ifaranga.

Yagize ati “Iki kigega tucyitezeho kuzamura Abanyarwandakazi kugera no kuri babandi bo hasi mu cyaro nabo bakagera ku rwego rw’iterambere nkuko igihugu kibibifuriza.”

Ku ikubitiro abagore bahuriye muri Unity Club bihutiye kwitabira iki kigega nubwo cyari kitarandikwa, hataranashyirwaho umucungamutungo.

Biteganyijwe ko muri Mutarama umwaka utaha hazaba hatangiye ishami ryo kwizigama no gushora imari ku isoko ry’imari n’imigabane, naho mu 2019 hakazatangira ishami ry’igihe kirekire rifasha ba rwiyemezamirimo mu buryo bw’igishoro.

Nsanzabaganwa asobanura imikorere y'ikigega 'Rugori Fund'
Abagore biteze ko iki kigega kizunganira umugore wo mu cyaro, na we akabasha gukora ku ifaranga
Abagore bitabiriye Inama rusange y’ihuriro ryabo yabaye kuri uyu wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza