Abagore bagiye gushyirirwaho ikigega kizatuma banywana na serivisi z’imari

Yanditswe na Kanamugire Emmanuel
Kuya 1 Nzeri 2016 saa 01:04
Yasuwe : XX
138 71

Umuryango New Faces New Voices ugamije ko abagore bo mu nzego zose bagera kuri serivisi z’imari bakiteza imbere, ugiye gutangiza ikigega cya Miliyari 16 kizafasha abagore guhangana n’ibibazo bahura na byo mu rugendo rwo kugera kuri serivisi z’imari.

Uyu muryango umaze umwaka umwe ukorera mu Rwanda, kuri uyu wa Kane wahuye n’abatanyabikorwa bawo ngo ubagaragarize ibyakozwe n’ibiteganywa gukorwa, birimo no gutangiza ikigega cy’imari kizajya gitanga serivisi zirimo n’ishoramari.

Umuyobozi w’umuryango, New Faces New Voices mu Rwanda akaba na Guverineri wungirije wa Banki Nkuru y’Igihugu (BNR), Monique Nsanzabaganwa, yatangaje ko iki kigega kizagira uruhare mu gukemura bimwe mu bibazo abagore bagenda bahura na byo mu mishinga yabo ibageza kuri serivisi z’imari.

Yagize ati “Turimo gutegura igenamigambi ry’ikigega cy’ishoramari kigenewe abagore ku buryo ukwezi kwa cumi kuzajya gushira turirangije kugira ngo dutangire tubagenderere tubabwira ibipimo bifatika n’ibikorwa bifatika tuzakora twifashishije icyo kigega.”

Ubushakashatsi butandukanye bwakunze kugaragaza ko zimwe mu mbogamizi abagore bahura nazo muri serivisi z’imari zirimo ubumenyi buke bafite ku micungire y’inguzanyo n’imishinga, kutagira ingwate, imyumvire y’ibigo bitanga inguzanyo mu guha abagore inguzanyo no kutagira ibibashishikaza bihagije byatuma babaguriza.

BNR igaragaza ko mu Rwanda abagore badahabwa inguzanyo nk’abagabo, aho mu myaka itandatu ishize izatanzwe mu bagore zingana na 22.5% mu gihe mu bagabo ari 77.5%.

Nsanzabaganwa yavuze ko kiriya kigega kizatangirana miliyoni 20 z’amadolari ni ukuvuga miliayari 16 z’amafaranga y’u Rwanda. 25% byayo ni ukuvuga miliyari enye zizava mu migabane abagore bazagura muri icyo kigega, aho umugabane umwe uhagaze ku mafaranga 1000.

Ayandi azava mu bigo bimenyereye gushora imari mu bigega, mu bantu bifuza gushyigikira icyo kigega, muri Leta n’ahandi.

Iki kigega kizakora cyunguka kuko kizaba cyashowemo amafaranga ndetse kinandikishwe ku isoko ry’imari n’imigabane.

Abanyamuryango batangije New Faces New Voices yatangijwe ni abagore 18, kuri ubu barenga 1000.

Hamaze kugurwa imigabane ya miliyoni 80 ariko izatanzwe ni miliyoni 17.

Umuryango New Faces New Voices uzakora nk’ikigo cy’imari gikora ishoramari, gihugura abagore, gitanga amakuru kuri serivisi z’imari no gufatanya n’abakora imishinga n’ibikorwa bitandukanye by’abagore.

Umuyobozi w’umuryango, New Faces New Voices mu Rwanda, Monique Nsanzabaganwa
Abafatanyabikorwa ba New Faces New Voices

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE