Huye : Ubuyobozi bw’akarere ntibuvuga rumwe n’uruganda rwa Rwabuye mu gutonora umuceri

Huye : Ubuyobozi bw’akarere ntibuvuga rumwe n’uruganda rwa Rwabuye mu gutonora umuceri


Yanditswe kuya 31-01-2013 - Saa 11:25' na Olivier Rubibi

Umuyobozi w’uruganda rwa Rwabuye Rice rutonora umuceri mu Karere ka Huye Gakwaya Gilbert, avuga ko nta muturage wo mu gishanga cya Mwogo ukora ibilometero 15 ajya kugurisha umuceri ; ibi bikaba bivuguruza ibiherutse gutangazwa n’umuyobozi w’aka karere Kayiranga Muzuka Eugène avuga ko hakenewe izindi nganda.

Inyubako z'uruganda rwa Rwabuye Rice

Gakwaya aratangaza ibi nyuma y’aho Muzuka agaragarije Minisitiri w’Intebe Dr Habumuremyi Pierre Damien imbogamizi abahinzi bo mu gishanga cya Mwogo bahura na zo mu kugurisha umusaruro w’umuceri ; aho ngo bakora ibilometero 15 bajyana umuceri ku ruganda rwa Gikonko. Hari mu nama yabereye i Kigali ku wa 25 Mutarama uyu mwaka.

Muzuka yavuze ko Akarere ka Huye gafite umuceri mwinshi, ariko hakaba habura inganda zo kuwutunganya.

Gakwaya avuga ko ibi byose umuyobozi w’akarere yavuze atari byo. Avuga ko nta muturage ukora ibi bilometero ajya gushaka aho agurisha umuceri, kuko uruganda rufitanye amasezerano n’amakoperative y’abahinzi b’umuceri bakaba bajya kwivanirayo umuceri.

Akomeza avuga ko n’umuceri utabaye mwinshi nk’uko umuyobozi w’akarere yabitangaje, kuko uruganda rwa Rwabuye Rice rutonora umuceri ungana na toni 60 ku munsi nyamara bakaba babona toni 41 iyo umuceri wabaye mwinshi. Ati “Umuceri ni muke ugereranyije n’umusaruro w’abaturage.”

Rwabuye rice bavuga ko bakira toni 60 z'umuceri ku munsi

Gakwaya avuga ko uruganda rukorana neza n’abahinzi b’umuceri bo mu Karere ka Huye kuva kera, gusa ngo bakaba barigeze guhagarika kugurira abaturage babisabwe na Minisiteri y’Ubucuruzi n’Inganda.

Uku guhagarara byabaye kugira ngo hakorwe igenzura ry’inganda zakoraga nabi mu gukoresha imashini zangiza umuceri. Nyuma y’iri genzura ariko Rwabuye Rice rwongeye kwemererwa kongera kugurira abaturage umuceri.

Gakwaya avuga ko atazi impamvu umuyobozi w’akarere yavuze ko umusaruro wabaye mwinshi mu gihe inganda ari nke, nyamara ngo yari azi neza Rwabuye Rice ndetse azi neza ko n’umusaruro rwakira ari muke ugereranyije n’ubushobozi rufite.

Ibi byatumye tuvugana n’umuyobozi w’Akarere ka Huye, atubwira ko uru ruganda aruzi neza ; ariko avuga ko ibyo avuga ari ukuri umuceri ari mwinshi cyane ugereranyije n’inganda ziri muri aka karere.

Umuyobozi w’Akarere ka Huye yatubwiye ko ibyo abayobozi b’uru ruganda bavuga atari ukuri, kuko ngo rudafite ubushobozi bwo kwakira umuceri wose wera mu Karere ka Huye. Yatubwiye ko muri aka karere hera nibura toni 300 z’umuceri buri gihembwe cy’ihinga, uyu muceri akaba asanga ari mwinshi ku buryo ukeneye izindi nganda.

Umuyobozi w'Akarere ka Huye avuga ko hari umuceri mwinshi ukeneye izindi nganda

Muzuka akomeza avuga ko ubu bakangurira abantu bose bibumbiye mu makoperative y’abahinzi b’umuceri muri Huye kwishyira hamwe bakiyubakira uruganda rwabo, aho kugira ngo bajye basiragira bashaka aho bagurisha umuceri.

Mu kiganiro twagiranye na bamwe mu baturage bibumbiye mu makoperative ahinga umuceri badutangarije ko ubwabo umusaruro wabo ari muke ugereranyije n’ubushobozi bw’uruganda rwa Rwabuye.

Gusa hari n’abandi bemeza ko i Huye hera umuceri mwinshi ku buryo uru ruganda rutawutonora rwonyine. Mugabo Daniel wagiranye amasezerano n’uru ruganda, yadutangarije ko n’ubwo koperative arimo yagiranye amasezerano n’uruganda rwa Rwabuye yo kubagurira umuceri bo bonyine badashobora kuruhaza, yongeraho ko ariko na rwo rutabasha kwakira umuceri wose wera mu Karere ka Huye.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO