Kwamamaza

Zimwe mu mpamvu zikomeje gutuma ifaranga ry’u Rwanda rita agaciro

Yanditswe kuya 5-09-2016 saa 08:46' na Mukaneza M.Ange


Ni kenshi humvikana abaturage bavuga ko amafaranga y’u Rwanda yataye agaciro, ibi ahanini babishingira ku kuba uko iminsi igenda ishira ari ko n’amafaranga bakenera mu kugura ibintu runaka yiyongera.

Iyo ukoze igereranya hagati y’ifaranga ry’u Rwanda n’idorali rya Amerika uhita ubona ko nubwo aba baturage nta bumenyi buhambaye bafite ku miterere n’ihindagurika ry’agaciro k’ifaranga, ibyo baba bavuga biba bifite ishingiro kuko rigenda rirushaho guhenda bitandukanye no mu myaka yashize.

Ku itariki ya 1 Nzeli 2016, ufite idorali rimwe yahabwaga amafaranga y’u Rwanda 799.62 na ho urishaka agatanga 815,62 nkuko Banki Nkuru y’Igihugu BNR ibigaragaza. Ni mu gihe ku itariki nk’iyi mu 2006 urifite yahabwaga 548.83 na ho urishaka agatanga 554.35.

Imibare iherutse gushyirwa ahagaragara na Banki Nkuru y’Igihugu, BNR yerekana ko mu myaka icumi ishize, ifaranga ry’u Rwanda ryataye agaciro ku kigero cya 5% ugereranyije n’idorali.

Mu 2015 ni bwo ifaranga ry’u Rwanda ryataye agaciro cyane ugereranyije no mu myaka 20 ishize aho ryari ku kigero cya 7.5%.

Guta agaciro ku ifaranga ry’u Rwanda mu buryo bugaragara si ikimenyetso cy’uko ubukungu bw’igihugu buba butifashe neza; kuko burya bidaturuka ku mpamvu imwe cyangwa ngo bibe iteka ikimenyetso cy’ubukungu buhagaze nabi.

Uretse kuba ari ibintu bishobora kubaho bisa n’ibitunguranye hari n’ubwo igihugu runaka gishobora guhitamo gutesha agaciro ifaranga ryacyo bitewe n’impamvu zirimo no gushaka kwigarura amasoko mpuzamahanga.

Ikinyuranyo hagati y’ibyoherezwa mu mahanga n’ibyinjira mu gihugu

Muri iki gihe mu Rwanda hakomeje kugaragara icyuho kinini, aho ibitumizwa mu mahanga birusha agaciro ibyoherezwayo (Trade deficit).

Mu 2015, u Rwanda rwatumije mu mahanga ibicuruzwa bifite agaciro ka miliyari 2.200 z’amadolari ya Amerika, rwoherezayo ibya miliyari 1.100.

Nubwo mu gihembwe cya mbere cya 2016, u Rwanda rwongereye ibyo rwohereza mu mahanga ho 16.5%, amafaranga byinjije yo yagabanutseho 2.4%. Kugeza muri Kamena uyu umwaka hinjiye miliyoni 268.6 z’amadorali avuye kuri miliyoni 275.12 yinjiye mu gihe nk’icyo mu 2015.

Ni mu gihe ibyatumijwe mu mahanga byo byiyongereyeho 3.3%, bigera kuri miliyoni 1171.25 z’amadolari, zivuye kuri miliyoni 1134.10 mu 2015.

Ibi rero bigira uruhare runini mu gutuma ifaranga ry’u Rwanda rita agaciro cyane, kuko igihugu kiba kitabashije kwinjiza umubare w’amadorali gikeneye kugira ngo kibashe gutumiza ibintu mu mahanga, bikaba ngombwa ko BNR yongera umubare w’amadorali ku isoko.

Ihindagurika ry’ibiciro

Indi mpamvu ikomeje gutuma ifaranga ry’u Rwanda rigenda rita agaciro ni ihindagurika ry’ibiciro by’ibicuruzwa ndetse na serivisi zitandukanye mu Rwanda (Inflation rate).

Mu Rwanda ibiciro bigenda byiyongera umunsi ku munsi aho nko mu kwezi kwa Kamena 2016, ibiciro byazamutseho 5.5%, bikaba byarazamutse cyane ugereranyije n’uko byari bimeze muri Gicurasi 2016 aho byari kuri 4.6%.

Uku kuzamuka kw’ibiciro bituma ubushobozi bwo kugura serivisi cyangwa ibicuruzwa bugabanuka (purchasing power reduction).

Ibi rero bituma abantu bakenera amafaranga y’amahanga cyane cyane amadorali kugira ngo babashe kujya kugura bya bicuruzwa bashobora kubona ku giciro cyo hasi mu bindi bihugu.

Ikindi kandi n’umubare w’abanyamahanga bakenera ifaranga ry’u Rwanda kugira ngo bagure ibicuruzwa cyangwa serivisi na wo ugenda ugabanuka kuko bahitamo gushaka ahari ibihendutse.

Amadeni igihugu gifite

Indi mpamvu ifite uruhare runini mu gutuma ifaranga ry’u Rwanda rita agaciro ni amadeni/inguzanyo igihugu gifata hanze mu rwego rwo gushyira mu bikorwa imishinga minini ifitiye abaturage akamaro.

Muri iyi mishinga harimo iyo kubaka imihanda minini, uruganda rubyaza Gaz Methane amashanyarazi ’Kivu Watt’ ndetse n’inyubako ya Kigali Convention Center imaze igihe gito yuzuye.

Kuba inguzanyo zakoreshejwe mu gushyira mu bikorwa iyi mishinga ndetse n’indi myinshi tutavuze zigomba kwishyurwa bituma hakenerwa amadorali menshi ari na byo bigira uruhare mu gutuma arushaho kugira agaciro ugereranyije n’ifaranga ry’u Rwanda.

Ibihuha ku isoko ry’ivunjisha

Kuba ku isoko ry’ivunjisha hakunda kugaragara ibihuha ku bijyanye n’agaciro k’idorali aho usanga bavuga ko ryabuze bagatangira kurihenda na byo biri mu bituma ifaranga ry’u Rwanda rita agaciro.

Iyo ibi bihuha bitangiye gukwirakwira, usanga abantu benshi bihutira kujya kugura amadorali ngo bayabike mu gihe abandi bayafite banga kuyarekura, ugasanga birangiye idorali ribuze ku isoko.

Uretse kuba ku isoko ry’ivunjisha idorali rihita rihenda, bihita biba ngombwa ko Banki Nkuru ikora mu kigega cy’igihugu kugira ngo abakenera kujya kurangura hanze babone ayo bakoresha.

Ibicuruzwa biturutse hanze birimo ibikoresho by’ikoranabuhanga n’iby’ubwubatsi na byo bihita bitangira guhenda, ugasanga ibyinshi byiyongereyeho amafaranga atari munsi ya 500.

Urugero twatanga ni nko muri Nyakanga 2015, aho byavugwaga ko idorali ryabuze aho wasangaga mu mujyi wa Kigali riri kugura amafaranga y’u Rwanda 800 mu gihe i Rubavu ryaguraga 715.

Ifaranga ry'Igihugu rita agaciro kubera impamvu zitandukanye

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved