BRD yasinyanye amasezerano y’ubufatanye na USAID agamije guteza imbere ubuhinzi

Yanditswe na Cyprien Niyomwungeri
Kuya 10 Gashyantare 2017 saa 02:48
Yasuwe :
0 0

Abafite aho bahuriye n’inguzanyo zitangwa mu buhinzi n’ubworozi, bashobora kutazongera gusubiza inyuma imishinga yo muri urwo rwego kuko imbogamizi yagiraga zirimo gutegurwa nabi, ingwate, ibyago mu mushinga n’ibindi bigiye gukurwaho nyuma y’amasezerano Banki y’u Rwanda itsura Amajyambere (BRD) yasinyanye n’Ikigega cy’iterambere cya Leta zunze ubumwe za Amerika USAID.

BRD imwe muri banki zitanga inguzanyo z’ubuhinzi n’ubworozi nyinshi mu gihugu, kuri uyu wa Gatanu yasinyanye amasezerano na USAID binyuze mu mushinga wo guteza imbere ishoramari ry’abikorera mu mishinga y’ubuhinzi n’ubworozi bubyara inyungu (PSDAG).

Aya masezerano agamije ubufatanye mu kubaka inzego zose ziri muri gahunda yo gutanga inguzanyo mu buhinzi n’ubworozi, yaba amabanki, ibigo by’imari iciriritse amakoperative n’ibigo by’ubwishingizi.

Azanafasha mu gukuraho imbogamizi zijyanye n’imihindagurikire y’ikirere nko kuhira no gukoresha ikoranabuhanga mu buhinzi n’ubworozi.

Umuyobozi Mukuru wa BRD, Alex Kanyankole, yavuze ko ubu bufatanye bushingiye ku kubaka imikorere n’imikoranire hagati y’inzego zose kugira ngo serivisi zahabwaga umuturage zijyanye no gutanga inguzanyo zirusheho gukorwa neza.

Yagize ati “Ubu bufatanye buzashyiraho gahunda y’uburyo twuzuzanya buri wese agatanga umusanzu we kandi ariko ko umusaruro w’inguzanyo zigera ku muhinzi-mworozi zikiyongera.”

BRD izafatanya n’andi mabanki, ibigo by’imari n’amakoperative gutanga inguzanyo z’ubuhinzi n’ubworozi ku giciro gitoya, ndetse n’abahinzi bato babone iziciriritse zitabagoye.

Ku ruhande, USAID izanatanga ubufasha mu bya tekiniki birimo gufasha abakozi ba BRD n’abafatanyabikorwa bayo kunoza imyigire y’imishinga, guha ubushobozi inzego zitandukanye bwo kwiga imishinga neza ku buryo bureba inzira yose kugera ku isoko.

Kanyankole yavuze ko bizatuma abafite aho bahuriye no gutanga inguzanyo mu buhinzi batongera gusubiza inyuma imishinga yo muri urwo rwego kuko izaba idafite imbogamizi yari isanganywe.

Yagize ati “Bizagabanya kuba hari umushinga waganaga ikigo cy’imari ugasubizwa inyuma kuko bizaba byateguwe neza, abantu bahawe uburyo bwo kubitegura batagize icyo basiga inyuma, bitume na banki nijya kwakira umushinga isanga wizwe neza.”

Inyungu ku nguzanyo z’ubuhinzi ishobora kugabanuka

Kanyankole akomeza avuga ko ubu bufatanye buzanagabanya inyungu ku nguzanyo kuko ikiguzi cy’igishoro cy’inguzanyo kizagabanuka, ibyago by’umushinga bikaba bike n’icyizere cy’umusaruro wawo kikiyongera.

Ati “Niba abantu bakoreye hamwe hari ubwishingizi bujyanye n’umushinga, habayeho ikoranabuhanga ku buryo umusaruro uzaba mwiza, imikorere yagenze neza n’inyungu ishobora kugabanuka.”

Ibijyanye n’ingwate nabyo ngo bizongera bisuzumwe habe hakongerwamo n’ingwate z’ umusaruro w’ubuhinzi uri mu bubiko.

Umuyobozi w’umushinga wo guteza imbere ishoramari ry’abikorera mu mishinga y’ubuhinzi n’ubworozi bubyara inyungu (PSDAG), Melanie Bittle, yavuze ko aya masezerano azateza imbere ubuhinzi mu Rwanda, bukagera ku cyiciro cyo kubyara inyungu.

Ati “Tugamije kongera ishoramari ry’abikorera mu bijyanye n’ubuhinzi bubyara umusaruro. Ubu bufatanye ni ingenzi ku mpande zombi kuko tuzatanga ubufasha mu bya tekiniki na BRD ibashe gufasha ibigo by’imari bitandukanye kubona imari bishora mu mishinga y’ubuhinzi.”

BRD yashyizeho ishami ryihariye rishinzwe ibyerekeranye no gutanga inguzanyo mu buhinzi n’ubworozi, ifite intego yo kongera amafaranga yatangaga muri izi nguzanyo.

Muri 2016 iyi banki yatanze inguzanyo mu buhinzi n’ubworozi zirenga gato miliyari 10 z’amafaranga y’u Rwanda, muri 2017 irateganya gutanga izindi 10, naho muri 2018 zigere kuri miliyari 22, muri 2019 ho hatangwe miliyari 33.

Umuyobozi wa BRD, Alex Kanyankole n'Umuyobozi w’umushinga wo guteza imbere ishoramari ry’abikorera mu mishinga y’ubuhinzi n’ubworozi bubyara inyungu (PSDAG), Melanie Bittle

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244