00:00:00 IGIHE NETWORK KN KINYARWANDA EN ENGLISH FR FRANCAIS

Ubukungu bw’u Rwanda buzazamuka ku kigero cya 10,2% mu 2021

Yanditswe na Iradukunda Serge
Kuya 25 Ugushyingo 2021 saa 10:51
Yasuwe :
0 0

Ikigega Mpuzamahanga cy’Imari (IMF), cyatangaje ko umwaka wa 2021 uzarangira ubukungu bw’u Rwanda buzamutse ku kigero cya 10,2%, biturutse ku kuba ubukungu bw’Isi buri kuzahuka muri rusange, imbaraga igihugu cyashyize mu gukingira icyorezo cya COVID-19 n’ingamba zashyizweho mu kureshya abashoramari.

Ibi byatangajwe na IMF nyuma y’ibiganiro itsinda ryayo riyobowe na Haimanot Teferra ryagiranye n’ubuyobozi bw’u Rwanda.

Ibi biganiro byabaye ku wa 18 Ukwakira kugeza ku wa 15 Ugushyingo 2021 byibanze kuri gahunda IMF ifashamo u Rwanda kuzamura ubukungu izwi nka ‘Policy Coordination Instrument (PCI)’.

Nyuma y’ibi biganiro, IMF yatangaje ko umwaka wa 2021 uzarangira ubukungu bw’u Rwanda buzamutse ku kigero cya 10,2%. Ni nyuma y’uko umwaka wa 2020 warangiye bumanutseho 3,4%, bitewe n’ingaruka za COVID-19.

IMF igaragaza ko umwaka wa 2020 wasize u Rwanda ruhungabanye mu bijyanye n’urwego rwa serivisi, ubukene n’umubare w’abadafite akazi ukiyongera cyane cyane mu b’igitsinagore.

Kuba u Rwanda rwarageze ku wa 15 Ugushyingo 2021 rumaze gukingira abaturage barwo bagera kuri 21%, byagaragajwe na IMF nk’imwe mu ntwaro izarufasha kuzahura ubukungu bwarwo kuko bizatuma ibikorwa byose byongera gukora uko byari bisanzwe cyane ko n’umubare w’abandura COVID-19 watangiye kubaganuka.

Izindi ngamba IMF yagaragaje nk’izizafasha u Rwanda kugera ku izamuka ry’ubukungu bwa 10,2% ni ukuba ubukungu bw’Isi yose buri kuzahuka muri rusange n’impinduka ziri gukorwa mu bijyanye na politike y’ubukungu.

Yagaragaje kandi ko gukomeza gushyiraho uburyo bwo kureshya abashoramari bigenga n’ubwo guhangana n’imihindagurikire y’ibihe, bizafasha u Rwanda gukomeza kugera kw’iterambere rirambye kandi ridaheza.
Amafaranga Leta isohora aziyongera

N’ubwo IMF igaragaza ko umwaka wa 2021 uzarangira ubukungu bw’u Rwanda buzamutse ku kigero cya 10,2%, inagaragaza ko muri 2021/22 icyuho kiri hagati y’amafaranga Leta ikoresha n’ayo yinjiza nacyo kizazamuka ku kigero cya 9,1% by’Umusaruro Mbumbe w’Igihugu (GDP) kivuye kuri 8.6% cyari kiriho mu 2020/2021.

Ibi bizaterwa n’uko Leta izakomeza kongera amafaranga ikoresha muri gahunda n’ibikorwa bigamije gufasha igihugu kurenga ingaruka za COVID-19 ndetse n’agenda muri gahunda zo kugabanyiriza imisoro inganda.

Ibi bizatuma imyenda ya Leta izamuka ku kigero cya 75% by’Umusaruro Mbumbe w’Igihugu ariko IMF igaragaza ko ntacyo bizahungabanya ku bijyanye n’uburemere bw’imyenda Leta y’u Rwanda ifite kuko buzaguma ku kigero kigereranyije.

Muri Nyakanga IMF yaherukaga gushima uko u Rwanda ruri kwitwara muri gahunda z’ubukungu ziganjemo izigamije gufasha ibigo by’ubucuruzi, amabanki n’abantu kurenga ingaruka bagizweho na COVID-19, inatangaza ko yongeye umwaka ku gihe gahunda irufashamo mu kuzamura ubukungu izwi nka ‘Policy Coordination Instrument (PCI)’ yari kuzamara.

Umuyobozi Mukuru Wungirije wa IMF, Tao Zhang, yavuze ko mu isesengura bakoze basanze u Rwanda ruri gukora ibishoboka byose kugira ngo rubashe kurenga ibibazo rwatewe na COVID-19.

Ati "Politiki y’ubuyobozi ikomeje kugaragaza ko iteguye neza kandi irasa ku ntego. Igamije kubona ubushobozi bwo kugura inkingo, kongera ubufasha buhabwa abantu n’ibikorwa by’ubucuruzi no gutanga amafaranga ku mabanki hashingiwe ku gihe icyorezo gishobora kumara no kugabanya ingaruka mbi mu mibereho n’ubukungu zishobora gitinda."

Si IMF gusa yagaragaje ko ubukungu bw’u Rwanda muri uyu mwaka buzazamuka kuko na Banki Nkuru y’Igihugu BNR yari iherutse kubitangaza.

BNR yagaragaje ko mu gihembwe cya mbere cy’uyu mwaka (Mutarama-Kamena), ubukungu bw’u Rwanda bwazamutse ku kigero cya 3,5%, cyane cyane bigizwemo uruhare n’urwego rw’ubuhinzi rwazamutse ku kigero cya 6,8%.

Iri zamuka kandi ryagizwemo uruhare n’urwego rw’inganda, rwazamutse ku kigero cya 9,7% mu gihembwe cya mbere cy’uyu mwaka, mu gihe rwari rwazamutse ku kigero cya 1,9% mu gihembwe cya mbere cya 2020.

Izamuka ry’uru rwego ryatewe n’izamuka ry’izindi nzego zirimo ubwubatsi bwazamutse ku kigero cya 14,4% ndetse n’umusaruro w’ibikorerwa mu nganda wazamutse ku kigero cya 8,3%.

Umwaka wa 2021 uzasiga ubukungu bw’u Rwanda buzamutse ku kigero cya 10,2%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .