Umutungo wa MTN Rwanda wiyongereyeho 20% umwaka ushize

Yanditswe na Ndahayo Emmanuel
Kuya 11 Gashyantare 2021 saa 05:42
Yasuwe :
0 0

MTN Rwanda yatangaje ko umwaka ushize wa 2020, wasize iki kigo cy’itumanaho kimaze kugira abafatabuguzi barenga miliyoni esheshatu, ibyatumye kigira inyongera ya 20% ku gicuruzo rusange cyinjije, ugereranyije n’igicuruzo rusange iki kigo cyari cyagize mu mwaka wa 2019, kingana na miliyari 125 Frw.

Umwaka wa 2020 waranzwe n’icyorezo cya Covid-19 cyatumye u Rwanda rushyiraho gahunda ya Guma mu Rugo mu gihugu hose, gahunda yatangiye ku itariki ya 21 Werurwe ikamara iminsi 45.

Muri icyo gihe, MTN yagabanyije igiciro cya serivise yo guhererekanya amafaranga kuri Mobile Money (MoMo), bituma umubare w’abakoresha izo serivise wiyongera ugera kuri miliyoni 3.2 mu mpera z’umwaka ushize, bavuye kuri miliyoni 2.8 mu mwaka wari wabanje wa 2019.

Na nyuma yaho, MTN Rwanda yakomeje kugabanya 72% ku giciro cyo guhererekanya amafaranga, ari na byo byatumye umubare w’abakoresha iyo serivise ukomeza kwiyongera.

Iyo nyongera kandi yanagaragaye mu bafatabuguzi bishyura bakoresheje serivise za Momopay, aho umubare wabo wiyongereye ukagera kuri miliyoni 1.4 uvuye ku bantu 200 000 bayikoreshaga mu buryo buhoraho mbere ya Covid-19.

Inyongera y’abafatabuguzi ba MTN Rwanda bakoresha internet na serivise za MoMo yatumye ijanisha ry’izo nzego ku nyungu rusange ya MTN Rwanda naryo ryiyongera rigera kuri 20% by’inyungu yose, rivuye kuri 15% mbere ya Covid-19, n’ubwo igice kinini cy’inyungu ya MTN Rwanda gituruka mu guhamagarana kuri telefoni.

Umuyobozi Mukuru wa MTN Rwanda, Mitwa Ng’ambi, yavuze ko bakoresheje imbaraga zidasanzwe mu gukomeza gufasha abakiliya ba MTN Rwanda kubona serivise bifuza.

Yagize ati "mu bihe by’icyorezo, twagize ibihe bibi hagati ya Gashyantare na Werurwe (umwaka ushize) kandi muri icyo gihe, twari tubizi ko ari ingenzi gukomeza guha serivise nziza abakiliya bacu ndetse no gufasha abakozi bacu".

Kugabanya igiciro cya serivise yo guhererekanya amafaranga kandi byatumye umubare w’ibikorwa byo guhererekanya amafaranga wiyongeraho 60%, ndetse binatuma serivise ya MoMo itangira gukoreshwa n’abantu ndetse n’ibigo bifite amafaranga menshi, binyuze mu bufatanye n’ibindi bigo by’imari mu Rwanda bworoheje ihererekanya ry’amafaranga hagati ya konti ya MoMo na konti umuntu asanganywe muri banki.

Ku rundi ruhande, MTN yashyize imbaraga nyinshi mu kongera ingufu za internet itanga, aho yubatse iminara 68 mu mwaka ushize nk’uko byari biteganyijwe, iyo minara ikaba yubakwa mu bice umuyoboro wa MTN utageramo neza.

Muri uwo mwaka kandi, MTN yongereye ubushobozi bw’iminara yayo mu bice 132 bitari bifite ubushobozi buhagije mu gihugu. Ni mu gihe kandi uyu mwaka MTN iteganya kubaka iminara 100 mishya.

Iki kigo kandi kivuga ko kimaze kugira abagihagararaiye (agents) 45 000 mu gihugu, mu gihe cyari cyatangiye umwaka ushize gifite 40 000, aho biyongereyeho aba-agents 5 000 bashya, n’ubwo byari mu gihe cy’icyorezo.

MTN ivuga ko ifite intego yo guteza imbere urubyiruko binyuze mu kuruha urubuga rwo gutambutsa ibitekerezo bishobora kurubyarira inyungu, ariko nanone bikanyura mu marushanwa ameze nka MoMo Yolo Hackathon riherutse gutangizwa na MTN, ubu rikaba rimaze kwitabirwa n’abagera kuri 200.

MTN Rwanda ni ishami ry’ikigo mpuzamahanga cya MTN Group, aho iki kigo kivuga ko kimaze kwitegura kubyaza umusaruro amasezerano y’Isoko rya Afurika, dore ko ikiguzi cyo kohereza amafaranga mu bindi bihugu MTN ifitemo icyicaro kingana n’icyo kohereza amafaranga imbere mu gihugu.

Mu bijyanye no guhangana na Covid-19, MTN Rwanda yamaze gutanga miliyoni 25$ azakoreshwa mu kugura inkingo, aho byitezwe ko ayo mafaranga azagura inkingo miliyoni zirindwi, zizatangwa mu bihugu byo ku mugabane wa Afurika, birimo n’u Rwanda.

MTN Rwanda imaze kugira abakiliya barenga miliyoni esheshatu mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .