Umusaruro mbumbe w’igihugu wageze kuri miliyari 6,618 Frw mu 2016

Yanditswe na Cyprien Niyomwungeri, Philbert Girinema
Kuya 15 Werurwe 2017 saa 02:28
Yasuwe :
0 0

Umusaruro mbumbe w’u Rwanda mu 2016 wageze kuri miliyari 6, 618 z’amafaranga y’u Rwanda uvuye kuri miliyari 5,956 Frw mu mwaka wari wabanje,bisobanuye ko umusaruro mbumbe w’igihugu wazamutse ku kigero cya 5.9%.

Mu byiciro byazamutse cyane harimo ubuhinzi bwiyongereyeho 4%, inganda zizamuka kuri 7% naho ibijyanye na serivisi bigera kuri 6%.

Minisitiri w’Imari n’Igenamigambi, Amb. Claver Gatete, yavuze ko uburyo ubukungu bwazamutse mu mwaka wa 2016 burusha indi myaka yari yabanje ndetse ko imibare iri hafi y’ibyari byiyemejwe. Ikigereranyo cyari cyafashwe cyari uko ubukungu buzazamuka ku kigero cya 6% ariko ubu imibare yabaye ikaba ari 5.9%. Ati “ Ibi bijya guhura n’ukuri guhari”.

Minisitiri Claver Gatete yakomeje avuga ko gahunda ya leta ijyanye no kwakira inama mpuzamahanga yagize uruhare runini mu kuzamura umusaruro mbumbe w’igihugu nk’aho ibijyanye na hotel na restaurant zabigizemo uruhare runini.

Muri rusange ubuhinzi n’ubworozi bwazamutse ku kigero cya 4%, inganda zizamuka ku kigero cya 7% naho serivisi zizamuka ku kigero cya 6%.

Umuyobozi mukuru w’Ikigo cy’igihugu cy’ibarurishamibare, NISR, Yusuf Murangwa, yasobanuye ko mu buhinzi n’ubworozi umusaruro wazamuwe n’uw’ibihingwa ngandurarugo bwagenze neza mu gihembwe cy’ihinga cya mbere, ku kigero cya 5%. Gusa mu gihembwe cya kabiri byagenze nabi kuko byazamutse ku kigero cya 1% bitewe n’amapfa n’imyuzure byagaragaye mu bice bimwe na bimwe by’igihugu.

Mu bijyanye n’inganda, gahunda ya Made in Rwanda yagize uruhare rukomeye cyane kuko inganda zikora imyenda, inkweto n’ibindi bituruka ku ruhu byiyongereye ku rugero rwa 10%, izikora ibyo kurya ziyongera ku rugero rwa 8%, naho inganda zikora ibikoresho by’ubwubatsi harimo isima ziyongeraho 21%.

Ubwubatsi bwakomeje kwiyongera ku kigero cya 5% mu gihe mu 2015 bwari bwazamutse ku kigero cya 15%. Iri gabanuka ryatewe ahanini n’imishinga minini y’ubwubatsi yarangiye mu ntangiriro za 2016.

Serivisi zishingiye kuri hoteli na resitora (restaurant) zazamutse ku rugero rwa 11% bitewe na gahunda yo kwakira inama n’ibikorwa bitandukanye, n’imirimo y’ubwikorezi izamuka ku rugero rwa rwa 8% ahanini bitewe n’ubwikorezi bwo mu kirere bwazamutse ku rugero rwa 15%.

Minisitiri w’Imari n’Igenamigambi, Amb. Claver Gatete
Umuyobozi mukuru w’Ikigo cy’igihugu cy’ibarurishamibare, NISR, Yusuf Murangwa asobanura uko umusaruro wagiye uzamuka mu nzego z'ubukungu zitandukanye
MINECOFIN isobanurira itangazamakuru aho umusaruro mbumbe w'igihugu wageze mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza