Uko Afurika yazigama miliyari 35$ ikoresha ku mwaka itumiza ibiribwa mu mahanga

Yanditswe na Cyprien Niyomwungeri
Kuya 3 Ukuboza 2019 saa 08:55
Yasuwe :
0 0

Imibare yerekana ko ku mwaka umugabane wa Afurika ukoresha miliyari 35$ itumiza ibiribwa ku yindi migabane hafi ya byose bishobora kwera mu bihugu biyigize.

Ni ubucuruzi benshi bemeza ko Afurika ihomberamo ndetse hakwiye gukorwa ibishoboka byose bugahagarara kuko ari umugabane ufite ubutaka butagira uko bungana kandi bwiza ndetse ikagira ikirere cyiza n’amazi yakwifashishwa mu buhinzi.

Mu kiganiro IGIHE yagiranye n’Umuyobozi w’Ihuriro Nyafurika ry’iterambere mu buhinzi (AGRA), Dr Agnes Kalibata, asanga iki ari ikibazo gikomeye kuri Afurika ariko aho gikomerera cyane ari uko ibiribwa itumiza ifite ubushobozi bwo kubihinga.

Afurika itumiza cyane mu mahanga soya, umuceri, ingano, ibigori n’ibirayi usanga byo biza ari ibyo kurya byihuse (chips).

Dr Kalibata ati “Iyo urebye ibihugu byo muri Afurika nta hantu ibyo bintu bitakwera ndetse ni nayo mpamvu dukwiye kwibaza rya soko rusange rya Afurika tuvuga, rikoze Afurika twakemura ibibazo bingana gute?”.

Akomeza avuga ko icyuho mu bucuruzi hagati y’abanyafurika ari ikindi gihamya cy’uburyo uyu mugabane ushishikarira kujya kugura ibiribwa ahandi kandi mu bihugu biwugize bihari.

Isoko rusange rya Afurika mu buryo budasubirwaho ryatangiye muri Nyakanga i Niamey muri Niger, ku ntego y’uko rizaba ryatangiye gukora neza kuwa 1 Nyakanga 2020. Ryitezweho kuzamura ubuhahirane hagati y’abanyafurika buzakemura n’ikibazo cyo gutumiza ibiribwa ahandi.

Iri soko ryitezweho gukuba kabiri ubucuruzi hagati y’abanyafurika bwari ku kigero cya 12% mu 2012 bukagera kuri 25% mu 2022.

Dr Kalibata avuga ko hakenewe imbaraga nyinshi kandi abantu bagahindura imitekerereze bakareka kujyana n’ibyoroshye byo gutumiza ibiribwa hanze ahubwo imbaraga zigashyirwa mu kuzamura ubuhinzi n’ibindi bibwerekeyeho ku mugabane.

Ati “Impamvu iyo tujyanye n’ibyoroshye duta abaturage bacu inyuma ugasanga ibyo umuturage ahinga nta soko abibonera kubera ko biratworohera kujya mu masoko y’ahandi hanze bo babishyizemo imbaraga cyane kugira ngo batugereho biboroheye”.

Mu byakorwa harimo gufasha umuturage kugeza ku isoko ibyo ahinga hubakwa imihanda ariko hakitabwa no ku gukemura ikibazo cy’ubwiza n’ubuziranenge bwabyo.

Dr Kalibata atanga urugero ku muceri akavuga ko kugira ngo abantu batajya kugura uw’ahandi kandi muri Afurika uhari, bishaka ngo wongererwe agaciro abantu bumve ko umuceri atari uguheragura ugashyira hariya ku isoko.

Ati “Nidusubiza ibibazo by’ubwiza bw’ibiribwa byacu uko tubikora kugira ngo bigere ku isoko n’uko tubifata, tugasubiza ikibazo cyo gushyira imbaraga mu bikorwa remezo nk’imihanda, tugashyira imbaraga mu kugira ngo umusaruro uboneke uhendutse ni ukuvuga ari mwinshi kuri hegitari, bizakemuka”.

“Kubera ko abaturage bacu bakirimo kurwana n’imbuto, ifumbire, amazi, imodoka, imihanda, uzasanga umusaruro wabo uzagera mu mijyi uhenze kurusha uwavuye Vietnam niba ari umuceri kuko uwa Vietnam we yabonye toni 10 kuri hegitari uwacu yabonye toni ebyiri cyangwa eshatu, ntabwo abo bantu bajya ku isoko rimwe ari ryo wa muturage wo mu mujyi ushaka umuceri kandi mwiza”.

Dr Kalibata agasanga kugira ngo Afurika izigame miliyari 35$ igura ibiribwa hanze, hakenewe kuzamura umusaruro mu buhinzi, kumenya guhindura imbuto kuko igihe kirimo guhinduka, ifumbire ijyanye n’igihe, kugira ubumenyi mu buhinzi, kubushyiramo amafaranga ndetse no guteza imbere ibindi byunganira ubuhinzi nk’ibikorwa remezo.

Ati “Nibyo byonyine bizatuma ubuhinzi bwacu bushobora guhangana ku isoko n’ubuhinzi bwa biriya bihugu dukuramo ibiribwa uyu munsi”.

Ikibazo cy’ingano y’ibiribwa Afurika itumiza mu mahanga cyakunze kugarukwaho n’inzego nyinshi, zigahuriza ku kuvuga ko cyakemurwa no kubyaza umusaruro ubutaka ifite.

Uwahoze ari Perezida wa Nigeria, Oluseguni Obasanjo, yigeze kuvuga ko yatangajwe n’ukuntu yagiye muri Guinea yajya muri Hoteli agasanga hafi ibiribwa byose bihari byanditsweho ko byakorewe i Burayi, nyamara wabireba ugasanga iki gihugu gifite ubutaka butagira uko busa, kandi ibyo bihingwa muri Afurika naho byahera.

Ibyo yabishingiyeho avuga ko ikibazo Abanyafurika bafite ari imyumvire gusa, kuko uyu mugabane ufite ubutaka bwiza, imvura nyinshi n’ibindi, ariko ugasanga bidakoreshwa ngo bibyazwe umusaruro uko bikwiye.

Kuba 70% by’abaturage ba Afurika bari mu buhinzi, buramutse buhawe imbaraga bwakemura ikibazo cyo kwihaza mu biribwa kandi bukaba umusemburo mu muvuduko w’imibereho myiza y’abaturage cyane cyane mu kugabanya ubukene n’ibibazo biterwa n’imirire mibi.

Umuyobozi wa AGRA, Dr Kalibata Agnes asanga bishoboka ko umugabane wa Afurika udakoresha miliyari 35$ mu gutumiza ibiribwa mu mahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza