Ubukungu bw’u Rwanda buzazamuka ku kigero cya 5,7% mu 2021

Yanditswe na Ndahayo Emmanuel
Kuya 24 Mata 2021 saa 12:33
Yasuwe :
0 0

Ikigega Mpuzamahanga cy’Imari, IMF, cyatangaje ko ubukungu bw’u Rwanda buri mu bufite amahirwe yo kuzazanzamuka ku muvuduko wo hejuru mu gihe cy’imyaka ibiri, kuko buzazamuka ku kigero cya 5,7% muri uyu mwaka, ndetse bukazagera kuri 6,8% mu utaha wa 2022.

Ni nyuma y’uko mu mwaka ushize wa 2020, ubukungu bw’u Rwanda bwari bwagabanutse ku kigero cya 0.,2%, bitewe n’ingaruka z’icyorezo cya Covid-19.

IMF igaragaza ko muri rusange, Umugabane wa Afurika wakoze iyo bwabaga ukagabanya ingaruka icyorezo cya Covid-19 cyagombaga kugira ku bukungu, kuko igihugu kimwe ari cyo kiyongereye ku bindi 16 biri mu byago bikomeye byo kunanirwa kwishyura amadeni bifite, mu gihe ikigero cy’igabanuka ry’ubukungu ku Mugabane wa Afurika ryari ku mpuzandengo ya 1,9%.

Iri gabanuka ryagize ingaruka zirimo igabanuka ry’imirimo kuri uyu Mugabane, kuko miliyoni 32 z’abaturage babuze akazi, barimo ibihumbi 550 bakomoka mu Rwanda, nk’uko Raporo yakozwe na Banki y’Isi ku ngaruka icyorezo cya Covid-19 cyagize ku bukungu bw’u Rwanda ibyerekana.

Muri rusange, byitezwe ko ubukungu bwa Afurika buzazamuka ku kigero cya 3,4%, ariko ibi bikazashingira ku buryo uyu mugabane uzabasha guhangana n’icyorezo cya Covid-19, kuko uko kizakomeza kuyogoza uyu Mugabane, ari nako ubukungu buzakomeza guhungabana.

Kugeza ubu, Afurika imaze gupfusha abarenga ibihumbi 120, ndetse ubwiyongere bwa Covid-19 buri kugaragara mu bice bitandukanye by’uyu Mugabane.

Inkingo zihanzwe amaso mu kuramira ubukungu bwa Afurika

N’ubwo Afurika yabashije guhangana n’ingaruka ziteye ubwoba ziterwa n’icyorezo cya Covid-19, hari impungenge z’uko ubushobozi bw’uyu Mugabane bwo gukomeza kubungabunga ubukungu burimo gushira vuba.

Kimwe mu bibazo bihangayikishije cyane ni ihungabana rya banki z’ubucuruzi rizaterwa n’uko abenshi mu bafite amadeni bashobora kuzananirwa kuyishyura bitewe n’uko ubucuruzi bwagabanutse cyane.

Nko mu rwego rw’ubukerarugendo, ibipimo byerekana ko buzasubira ku rwego rwariho mbere ya 2019, mu mwaka wa 2023, kandi nabwo ibikorwa by’ikingira bikagomba kwihutishwa ku rwego rw’Isi. Uru rwego ni rumwe mu zifite amadeni manini mu bihugu ubukerarugendo bufatiye runini ubukungu nk’u Rwanda.

Uretse amadeni ashobora kuzabangamira urwego rw’amabanki muri Afurika, hari ikindi kibazo cyo gutakaza agaciro kw’amafaranga ya Afurika, ibishobora gutuma kwishyurwa umwenda Afurika ifite bigorana.

Nko mu mwaka wa 2019, impuzandengo y’uburyo amafaranga yatakaje agaciro muri Afurika yari ku 9%, igera kuri 11% mu mwaka ushize, bitewe ahanini n’ikibazo cy’ibiciro by’ibiribwa byiyongereye ndetse n’igabanuka ry’amadevize, yiganjemo amadorali akoreshwa na Amerika.

Uretse igabanuka ry’amadevize, Afurika yanahuye n’ikibazo cy’igabanuka ry’amafaranga yoherezwa muri Afurika aturutse ahandi, yagabanutse ku kigero cya 7%, ndetse n’igabanuka ry’ishoramari ryinjira muri Afurika, na ryo ryagabanutse ku kigero cya 18% mu mwaka wa 2020, ugereranyije n’uko byari bimeze mu mwaka wa 2019.

Ku rundi ruhande, Afurika irasabwa kugura inkingo n’ibindi bikoresho mu rwego rwo kwirinda icyorezo cya Covid-19, ibyitezweho gutwara 50% by’ingengo y’imari Afurika isanzwe ishora mu rwego rw’ubuzima, kugira ngo ikingire 60% by’abaturage bayo.

Bitewe n’iri gabanuka ry’amafaranga yinjizwa na Afurika, ndetse n’ubwiyongere bw’ibyo uyu Mugabane ukeneye, byitezwe ko icyuho kiri mu ngengo y’imari kiziyongeraho 0.5% by’Umusaruro mbumbe w’uyu Mugabane muri uyu mwaka.

Mu rwego rwo guhangana n’iki cyuho mu ngengo y’imari, Afurika izakenera kongera inguzanyo ifata, ku buryo byitezwe ko hagati ya 2021 na 2025, inguzanyo Afurika ikenera iziyongeraho miliyari 245$.

Ku ruhande rw’u Rwanda, inguzanyo yarwo izangana na 66% by’umusaruro mbumbe w’igihugu muri uyu mwaka, ariko ikaba yitezweho kwiyongera mu mwaka utaha, ikazagera kuri 67.9%.

IMF itanga inama z’uko Afurika ikwiye kongera imbaraga mu ikoranabuhanga, kugira ngo yiyongerere amahirwe yo guhashya ingaruka z’icyorezo cya Covid-19, aho u Rwanda, Cape Verde, Ghana na Seychelles biza mu bimaze gutera intambwe ifatika muri uru rwego. Hari icyizere ko ibi bizagerwaho Afurika nikomereza ku muvuduko iriho magingo aya, kuko abantu 90 000 binjira mu bakoresha ikoranabuhanga buri munsi kuri uyu Mugabane.

Indi nama itangwa ni iyo gushyigikira Isoko Rusange rya Afurika (AfCFTA) riherutse kwemezwa n’ibihugu byo kuri uyu Mugabane. Buri cyumweru, Afurika yohereza ibicuruzwa bifite agaciro ka miliyari 6.5$, ariko kimwe cya gatanu cyayo ni cyo gicuruzwa ku Mugabane.

U Rwanda rukomeje gushyira imbaraga mu kuzahura ubukungu bwashegeshwe na Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .