U Rwanda rwakuyeho imisoro ku modoka zihenze mu kureshya ba mukerarugendo

Yanditswe na Akayezu Jean de Dieu
Kuya 12 Gashyantare 2021 saa 07:41
Yasuwe :
0 0

Leta y’u Rwanda igiye guhara miliyoni nyinshi z’amadorali mu gusonera imisoro ku modoka zihenze zitumizwa mu mahanga hagamijwe gukurura ba mukerarugendo bo mu rwego rwo hejuru.

Ni gahunda igamije kuzahura ubukerarugendo bwagizweho ingaruka na COVID-19, nyuma y’icyiciro cya kabiri cy’iki cyorezo gikomeje gukoma mu nkokora ibikorwa bitandukanye birimo n’ihagarikwa ry’ingendo.

Ku wa 22 Mutarama 2021, Minisiteri y’Imari n’Igenamigambi yasabye Ikigo cy’Imisoro n’Amahoro mu Rwanda (RRA), gusonera imisoro ku nyongeragaciro ndetse n’umusoro ku modoka zitumizwa mu mahanga zifite agaciro ka 60.000$ kuzamura.

RRA itangaza ko ubusanzwe, ibinyabiziga nk’ibi buri wese yishyura nibura miliyoni 43 Frw mu misoro ya gasutamo.

Iryo tangazo rya Minecofin ryasobanuraga ko gusonera izi modoka imisoro bigamije korohereza abavana mu mahanga imodoka zihenze hagamijwe guteza imbere ubukerarugendo bwo mu rwego rwo hejuru, inama zishimangira inama n’imurikagurisha (MICE), n’ishoramari ry’amahanga.

Rikomeza rigira riti “Ni ngombwa kumenya ko umusoro ku bicuruzwa byatumijwe mu mahanga watanzwe binyuze mu cyifuzo cyatanzwe mu nama ya EAC ibanziriza ingengo y’imari yo muri Gicurasi 2020.”

Indi ntego yo gukuraho iyi misoro ni ugushyira mu bikorwa politiki ya guverinoma yemejwe n’Inama y’Abaminisitiri.

N’ubwo icyorezo cyagabanyije ibikorwa by’ubukerarugendo ku Isi, u Rwanda rukomeje gushora imari muri urwo rwego rwinjije amadovize mu mwaka wa 2019, aho imibare igaragaza ko rwinjiza hafi miliyoni 498$. Intego ni ukuzamuka byibuze miliyoni 800$ mu 2024.

Gusonerwa imisoro y’imodoka bije mbere gato y’Inama ya 26 y’Umuryango w’Ibihugu bikoresha Ururimi rw’Icyongereza, Commonwealth (CHOGM) iteganyijwe kubera i Kigali muri Kamena 2021.

Ni inama yitezweho ko u Rwanda ruzayifashisha mu kureshya abashoramari bo mu rwego rwo hejuru kugira ngo bamarane igihe kirekire mu gihugu, cyane cyane mu bukerarugendo buri mu nzego zinjiriza abandi agatubutse.

Impuguke zivuga ko kugabanya imisoro ijyanye n’icyerekezo cya guverinoma cyo gukurura ishoramari, guteza imbere ibyoherezwa mu mahanga, no gutera inkunga abikorera.

Impuguke mu by’Uubukungu mu Kigo cya KPMG, Musinguzi Angelo, yabwiye The East Africa ko Guverinoma yibanze ku bukerarugendo n’inganda nto n’iziciriritse bityo iragerageza gushishikariza ishoramari muri izo nzego z’ibanze.

Yagize ati “Bishobora gutuma habaho igihombo cy’imisoro ariko muri rusange intego ni uko iki gihombo kizishyurwa n’abashoramari benshi.”

Yakomeje agira ati “Ikibazo nyamukuru ubu ni ukubona abo bashoramari bafite ubushobozi bwo gutumiza imodoka zihenze no gushora imari mu gihugu. Hatabayeho ishoramari nk’iryo, iryo vanwaho ry’imisoro ryazaguma mu mpapuro gusa.”

Kuva mu 2015, RRA yatangije uburyo bwo gusonera imisoro mu gihe cy’imyaka irindwi ku bashoramari bafite ishoramari rifite agaciro ka miliyoni 50 z’amadolari.

Mercedes Benz G-Class iri mu bwoko bw'imodoka zihenze zisigaye ziharawe cyane mu Rwanda zagabanyirijwe imisoro
Imodoka zo mu bwoko bwa 'Maserati' ziri mu zigezweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .