U Rwanda rwahaye ikaze abitabiriye inama mpuzamahanga ku ishoramari rya Afurika (Amafoto)

Yanditswe na Kanamugire Emmanuel
Kuya 5 Nzeri 2016 saa 09:25
Yasuwe :
0 0

Abakuru b’ibihugu bya Afurika, abayobozi ba za guverinoma, abayobora ibigo by’ubucuruzi n’abashoramari bose hamwe bagera ku 1000, barateranira i Kigali mu nama mpuzamahanga yiga ku ishoramari, 2016 Global African Investment Summit (TGAIS).

Iyi nama y’iminsi ibiri itangira kuri uyu wa Mbere tariki 5 Nzeli 2016, irabera mu nyubako ya Kigali Convention Centre, akaba ari ubwa mbere ibereye muri Afurika kuko izindi nshuro yaberaga i Londres mu Bwongereza.

Yateguwe na Guverinoma y’u Rwanda ifatanyije n’Umuryango w’Ubucuruzi bw’Ibihugu by’ibiyaga bigari (COMESA).

Ku mugoroba wo ku Cyumweru tariki 4 Nzeli 2016, Guverinoma y’u Rwanda ibinyujije mu kigo cy’Igihugu gishinzwe iterambere, RDB, yakiriye abashyitsi baturutse hirya no hino, bahabwa ikaze kandi bifurizwa kugira inama nziza izamura ishoramari rya Afurika.

Umuyobozi w’Ikigo cy’Igihugu cy’Iterambere, RDB, Francis Gatare, yashimiye imiryango yagize uruhare mu gutegura iyi nama n’abayitabiriye, avuga ko ari umwanya mwiza wo kwerekana amahirwe n’ubufatanye mu ishoramari hagamijwe guteza imbere Afurika muri rusange.

Yagize ati “Imishinga irimo amahirwe mu ishoramari n’iy’ubufatanye izagaragarizwa abazitabira inama barenga 1000. Turizera ko urugendo mu ishoramari twihaye nk’igihugu nk’umugabane ruzakomeza.”

Ubwo hategurwaga iyi nama, Umuyobozi wa Global African Investment Summit, Paul Sinclair, yavuze ko iyi nama ari urugendo rushobora kubyara ubufatanye bushobora kuzamura iterambere rya Afurika, ku buryo uyu mugabane ubasha guhangana ku rwego mpuzamahanga.

Ati “Iyi nama ni amahirwe akomeye ku bihugu bya Afurika yo gutangira gukorana ku mishinga bihuriyeho ishobora gukurura ishoramari, ikazamura ubukungu.”

Mu ijambo ry’ikaze Perezida Kagame yageneye abitabiriye iyi nama, yavuze ko Guverinoma y’u Rwanda yishimiye gufatanya n’Umuryango w’Ubucuruzi bw’Ibihugu by’ibiyaga bigari (COMESA) mu gutegura iyi nama, asaba abayitabiriye guhuza imbaraga mu rugendo rugana ku iterambere rya Afurika.

Yagize ati “Kwishyira hamwe kw’ibihugu ni ingenzi ku iterambere rya Afurika kandi twizeye tudashidikanya ko iyi nama izihutisha ishoramari mu mishinga yacu y’ingenzi nk’akarere, izateza imbere imibereho n’ubukungu by’abaturage bacu.”

Perezida Kagame yavuze ko inzego z’u Rwanda zizakomeza gukorana n’abandi bafatanyabikorwa mu korohereza abashoramari mu karere, ku buryo yizeye ko iyi nama imaze imyaka ibiri ikorwa hari icyo izasigira u Rwanda n’akarere muri rusange.

Umwihariko w’iyi nama ni uko yibanda ku ishoramari rya Afurika rikozwe n’Abanyafurika. Iraha umwanya abikorera bagaragaze ibigenda n’ibitagenda, banerekane impinduka zakorwa na za Guverinoma kugira ngo ishoramari rirusheho gukorwa neza.

Ibiganiro biribanda kandi ku ngingo zirimo ubucuruzi hagati y’uturere, ibimaze kugerwaho n’imbogamizi zigihari mu gucuruzanya hagati y’imiryango itatu, Tripartite Free Trade Area (TFTA), uko ishoramari ryafasha mu guhindura Afurika, ikoranabuhanga, guteza imbere ubuhinzi n’iterambere muri rusange.

TFTA ni gahunda yemeranyijwe yo gukorana ubucuruzi hagati y’Umuryango w’Ubucuruzi bw’ibihugu bya Afurika y’u Burasirazuba n’Amajyepfo (COMESA), Umuryango w’Iterambere ry’ibihugu bya Afurika y’Amajyepfo (SADC) n’Umuryango wa Afurika y’u Burasirazuba (EAC).

Ubucuruzi hagati y’imiryango y’uturere bigaragara ko Afurika yasigaye inyuma ugereranyije n’indi migabane. Ubu bucuruzi buhagaze ku gipimo cya 15% mu gihe ubwo muri Aziya buri ku gipimo kirenga 40%.

Haraganirwa kandi ku buryo bwo kureshya abashoramari mu kongera ibikorwaremezo byo koroshya urujya n’uruza rw’ibicuruzwa n’abantu n’uburyo bwo guhuza gahunda n’amategeko.

Umuyobozi Mukuru w'Ikigo cy'Igihugu cy'Iterambere, Francis Gatare hamwe n'abashyitsi bitabiriye inama ku ishoramari rya Afurika
Abahanzi basusurukije abashyitsi bitabiriye inama ku ishoramari rya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244