00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwahanze amaso imurikagurisha ry’indabo mu Buholandi mu kureshya isoko mpuzamahanga (Amafoto)

Yanditswe na Karirima A. Ngarambe
Kuya 4 Ugushyingo 2021 saa 08:54
Yasuwe :
0 0

Ikigo gikora Ubuhinzi n’Ubucuruzi bw’Indabo, ‘Bella Flowers’, cyitabiriye Imurikagurisha Mpuzamahanga ry’Indabo ribera mu Buholandi, kuva ku wa 3 Ugushyingo, 2021.

Iri murikagurisha rizamara iminsi itatu ribaye ku nshuro ya 11 ariko u Rwanda ruryitabiriye ku nshuro ya gatanu. Hari hashize imyaka ibiri ritaba kubera Covid-19.

Abamurika bagera kuri 300 baturuka mu bihugu 30 naho abasura bagera ku bihumbi 25 baturuka mu bihugu 100. Bella Flowers yajyanyemo ubwobo 15 bw’indabo z’amaroza.

Ambasaderi w’u Rwanda mu Buholandi, Olivier Nduhungirehe, yatangaje ko kuba u Rwanda rwitabira imurikagurisha nk’iri bifasha mu guteza imbere ubuhinzi n’ubucuruzi bw’indabo.

Yagize ati “Ubuhinzi n’ubucuruzi bw’indabo mu Rwanda butangiye vuba ariko umusaruro uragenda wiyongera, ubuhanga n’ishoramari bigatuma n’ibyo ducuruza byiyongera kandi n’imurikagurisha nk’iri na ryo riba ribifitemo uruhare.”

“Kuko aha ni ho abaguzi b’inzobere ku Isi baza bakareba ubwiza bw’indabo bakavugana n’ababishinzwe kugira ngo bazabashe gutumiza izo bakeneye. Ni igikorwa kizatuma ubuhinzi bw’indabo n’umusaruro bitanga n’amafaranga twinjiza aturutse mu ndabo bitera imbere.”

Ambasaderi Nduhungirehe yakomeje avuga ko buri mwaka uko u Rwanda rwitabiriye rugira icyo rwigira mu imurika nk’iri kubera ko ruhahurira n’inzobere zo mu bindi bihugu uko byateje imbere ubwo bucuruzi bw’indabo.

Yakomeje agira ati "Bidufasha kugira ngo natwe ubutaha tuzabinoze. Na cyo ni ikintu gikomeye kuko iyo uhahuriye n’ibihugu birenga 30, buri gihugu gifite ibyo cyagezeho. Natwe nk’u Rwanda ni umwanya mwiza wo guhererekanya ubumenyi. Ngira ngo iminsi itatu nirangira hari ubundi bumenyi tuzaba tuhakuye ku buryo no mu imurikagurisha ritaha tuzaza noneho tuzaba dufite amasomo twahakuye mu guteza imbere ubuhinzi bw’indabo.”

Ikigo Bella Flowers cyatangiye gukora ubuhinzi bw’indabo mu 2016; gikorera kuri hegitari 40. Gikoresha abakozi bagera kuri 700.

Kimaze kohereza mu mahanga indabo zifite agaciro ka miliyari 10,3 z’amafaranga y’u Rwanda. Mbere ya Covid-19, Bella Flowers yoherezaga toni 30 z’indabo mu cyumweru, ubu byaragabanutse zigera kuri toni 20.

Mu mwaka wa 2019/2020, indabo zagurishijwe mu Rwanda zari zifite agaciro ka miliyoni 4 z’amadolari; mu 2020/2021 agaciro kazo kageze kuri miliyoni 7,9 z’amadolari.

Ubwoko bw’amaroza butandukanye u Rwanda rwamuritse
Indabo Ikigo Bella Flowers cyaserukanye mu imurika ryo mu Buholandi ziri mu moko agera kuri 15
Mu imurikagurisha indabo z’amaroza ziba zitatse mu buryo butandukanye
Ambasaderi w'u Rwanda mu Buholandi, Olivier Nduhungirehe aganira n'Umunyamakuru Karirima Aimable Ngarambe
Umuyobozi Mukuru ushinzwe Ubucuruzi no Kwamamaza muri Bella Flowers, Kayihura Jeanine, aganira n’abafatanyabikorwa
Ambasaderi Olivier Nduhungirehe aganira n’abo mu bindi bihugu bungurana inama
Ambasaderi w'u Rwanda mu Buholandi, Olivier Nduhungirehe, aganira n’itsinda ry’abadipolomate bamwungirije
Amb. Nduhungirehe ari kumwe n'Umunyamabanga wa Mbere muri Ambasade y’u Rwanda mu Buholandi, Jean Hugues Mukama, ubwo basuraga aho ibindi bihugu bimurikira indabo zabyo
Abaje gusura Stand y’u Rwanda bifitotoreza ku kibumbano cy’Ingagi
Jeanine Kayihura, Umuyobozi Mukuru ushinzwe Ubucuruzi no Kwamamaza muri Bella Flowers, aganira na Michel Minega Sebera, Umujyanama Mukuru muri Ambasade y’u Rwanda mu Buholandi
Ahabera imurika hari ubwoko butandukanye bw'indabo
Indabo u Rwanda rucuruza mu mahanga zigenda ziyongera
Kwitabira imurikagurisha nk'iri bizafasha u Rwanda kunguka ubumenyi bufasha mu guteza imbere ubuhinzi n'ubucuruzi bw'indabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .