Kwamamaza

U Rwanda rushora asaga miliyari 2 Frw rukoresha amafaranga mu mahanga buri mwaka

Yanditswe kuya 26-08-2016 saa 12:59' na Rabbi Malo Umucunguzi


Banki Nkuru y’u Rwanda ivuga ko buri mwaka ikoresha nibura miliyari ebyiri z’amafaranga y’u Rwanda, mu gutumiza amafaranga akoreshwa mu gihugu hose kuko ubu mu Rwanda hatari ubushobozi bwo kuba rwakwikorera inoti n’ibiceri bikoreshwa ku ifaranga ry’u Rwanda.

Nyuma yo kugaragariza uko ubukungu bw’u Rwanda buhagaze hagati ya Mutarama na Kamena 2016, Chantal Kasangwa ushinzwe ibikorwa bya Banki Nkuru y’igihugu, kuri uyu wa Kane yabwiye itangazamakuru ko amafaranga akoreshwa buri mwaka ari hagati ya miliyari n’igice na miliyari ebyiri.

Ati “Ku mwaka bidutwara hagati ya miliyari imwe n’igice na miliyari ebyiri z’Amanyarwanda. Imibare itarimo igendanye n’amafanga wenda dukoresha mu gusana imashini zibikora, abakozi, umutekano dushyiraho wo gucunga ayo mafaranga no kuyabika neza.”

Guverinoma y’u Rwanda ikomeje gushyira imbaraga mu kwifashisha ikoranabuhanga mu kwishyurana, amafaranga akajya aguma muri banki aho gukomeza guhererekanywa mu ntoki, ari na byo bituma yangirika.

Ihererekanwa ry’amafaranga mu ikoranabuhanga…

Konti zo muri telefoni ngendanwa zikomeje kugira uruhare mu ihererekanywa ry’amafaranga, ndetse BNR igaragaza ko kugeza muri Kamena 2016, abafite konti za mobile money biyongereyeho 22% bakagera kuri 8,371,693 bavuye kuri 6,834,749 bo muri Kamena 2015.

Inshuro abantu boherejeho amafaranga ziyongereyeho 21%, ziva kuri 77,698,985 zagaragaye hagati ya Mutarama - Kamena 2015 zigera kuri 94,254,063 hagati ya Mutarama-Kamena 2016.

Gusa ingano y’amafaranga yahererekanyijwe yagabanutseho 17% aba miliyari 469 na miliyoni 243 Frw hagati ya Mutarama- Kamena 2016, mu gihe hagati ya Mutarama- Kamena 2015 yari miliyari 562 na miliyoni 455 Frw.

Ibi ngo ahanini byaturutse ku kuba muri Nyakanga 2015, kimwe mu bigo by’itumanaho cyarakuyeho amafaranga y’inyongera yahabwaga uwohereje amafaranga menshi, ku buryo byagize ingaruka ku ngano y’amafaranga yoherezwa.

Hagati ya Kamena 2015 na Kamena 2016, abakoresheje konti bafite muri banki bifashishishije telefoni ngendanwa biyongereyeho 20%, ariko amafaranga bahererekanyije agabanukaho 7% kuko hagati ya Mutarama na Kamena 2015 yari miliyari 18 na miliyoni 537 Frw, mu gihe hagati ya Mutarama- Kamena 2016 yabaye miliyari 17 na miliyoni 153 Frw.

Abifashishije konti zabo muri banki ariko bakifashisha internet , hagati ya Kamena 2015 na Kamena 2016 biyongereyeho 19%, ingano y’amafaranga bahererekanyije yiyongeraho 69%, kuko hagati ya Mutarana-Kamena 2015 yari miliyari 211 na miliyoni 241 Frw, agera kuri miliyari 356 na miliyoni 197 Frw hagati ya Mutarama –Kamena 2016.

Hagati ya Kamena 2015 na Kamena 2016, umubare w’ibyuma bitanga amafaranga cyangwa bikabikirizwaho, ATM, byiyongereyeho 10% biva kuri 361 bigera kuri 398. Inshuro ATM zakoreshejwe wiyongereyeho 1%, uva kuri 3,679,144 ugera 3,719,152.

Amafaranga yanyujijwemo yo yiyongeraho 10% ava kuri miliyari 172 Frw hagati ya Mutarama-Kamena 2015 agera kuri miliyari 188 Frw hagati ya Kamena 2015 na Kamena 2016.

Ibyuma byishyurirwaho mu maguriro (POS) byiyongereyeho 27% biva ku 1,339 zigera ku 1,707. Inshuro byakoreshejwe ziyongereyeho 84% ziva kuri 146,038 hagati ya Mutarama-Kamena 2015 zigera kuri 269,241 hagati ya Mutarama-Kamena 2016. Amafaranga yishyuriweho yiyongereyeho 39%, ava kuri miliyari 12 Frw agera kuri miliyari 16 Frw.

Chantal Kasangwa (hagati)ushinzwe ibikorwa bya Banki Nkuru y’igihugu

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved