Trump akomeje gutsimbarara ku ntambara mu by’ubucuruzi n’ibihugu birimo u Rwanda

Yanditswe na Mukaneza M.Ange
Kuya 3 Nyakanga 2018 saa 09:59
Yasuwe :
0 0

Perezida wa Leta Zunze Ubumwe za Amerika, Donald Trump, akomeje gutsimbarara ku birebana n’ubucuruzi n’imisoro, aho ashinja Umuryango Mpuzamahanga w’Ubucuruzi (WTO) n’u Rwanda rubarizwamo gukora ibikorwa bibangamira igihugu cye.

Trump akomeje iyi ntambara mu gihe ubucuruzi ku masoko mpuzamahanga busa n’ubutifashe neza muri iyi ntangiriro y’igice cya kabiri cy’umwaka.

Mu nama yagiranye na Minisitiri w’Intebe w’u Buholandi, Mark Rutte ku wa Mbere , Trump yavuze ko WTO yamaze igihe kinini ifata nabi Amerika ariko afite icyizere ko uyu muryango uzahindura imikorere.

Ati “Nta mugambi n’umwe turi gutegura magingo aya ariko nibatadufata uko bikwiye tuzagira umwanzuro dufata.”

Muri iyi nama kandi Trump yavuze ko bari hafi gufata ibyemezo bituma hakorwa ubucuruzi butagira uwo bubangamira, bunogeye abasora, abakozi n’abahinzi muri Amerika.

Nk’uko The Guardian dukesha iyi nkuru yabyanditse, ibi Trump abitangaje mu gihe hari ibimenyetso bikomeje kugaragaza ko aya mezi atandatu asigaye ngo 2018 irangire yatangiye nabi ku bacuruzi.

Banki ikomeye muri Amerika yitwa Goldman Sachs iherutse kugaragaza ko aya mezi asigaye ngo 2018 irangire ashobora kutorohera abashoramari, kubera ko bagomba guhangana n’izamuka ry’imisoro n’inyungu ku nguzanyo.

Ni mu gihe ibarura ku nganda zo muri Amerika ryakozwe n’ikigo HIS Markit ryagaragaje ko ibi bikomeje gutuma ibiciro bizamuka ku banyenganda bo muri iki gihugu no kurushaho kuba bibi cyane ku bari mu bihugu bikoresha ama-euro.

Ku rundi ruhande ikigo JP Morgan cyaragagaje ko iyi ntambara y’ubucuruzi ikomeje gushorwa na Trump abinyujie mu kuzamura imisoro, ishobora gutuma haza icyuho kinini mu izamuka ry’ubukungu bwo ku Isi kubera ingaruka zo kugabanuka kw’ingano y’ibicuruzwa, no gutakaza icyizere.

Ingaruka z’ibi byemezo kandi zatangiye kugaragara aho nk’uruganda rukora imisumari muri Amerika rwa Mid-Continent Nail, kuri ubu rwamaze guhagarika abakozi 60, kandi ngo mu mpera z’iyi mpeshyi rukaba rushobora gufunga imiryango.

Ku cyumweru Trump yari yagereranyije Umuryango w’Ubumwe bw’u Burayi, EU n’u Bushinwa, avuga ko byombi ntaho bitaniye mu kubangamira inyungu za Amerika, aha yagarukaga ku ikumirwa ry’imodoka rikoreshwa muri biriya bihugu.

Financial Times yatangaje ko ibi Trump yabivuze nyuma y’ibaruwa y’amapaji 11 EU yandikiye Urwego rushinzwe ubucuruzi muri Amerika, ivuga ko nibaramuka batisubiyeho ku birebana no kongera imisoro ku modoka ziturutse hanze, uyu muryango nawo uzayizamura ku bicuruzwa by’Abanyamerika bifite agaciro ka miliyari 290 z’amadolari.

Mu ntangiriro z’ukwezi gushize Trump nibwo yakomoje ku birebana no kugabanya umubare w’imodoka zikorerwa mu Budage zinjira muri Amerika, abinyujije mu kuzamura umusoro ukava kuri 2.5% ukagera kuri 35%. Ibi kandi bizanakuraho kubangamirwa ku gihugu cye gicibwa umusoro wa 10% kugira ngo izahakorewe zinjizwe mu bihugu bigize EU.

Mu bubucuruzi hagati ya USA n’u Rwanda, rwanze kwisubiraho ku cyemezo cyo guca imyenda n’inkweto byambawe bizwi nka Caguwa, bituruka muri Leta Zunze Ubumwe za Amerika, Canada, u Bwongereza n’ahandi nk’uko rwabisabagwa na Trump.

Perezida wa Leta Zunze Ubumwe za Amerika, Donald Trump

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza