Kwamamaza

RSwitch ikomeje gufasha abantu kutagendana umurundo w’amafaranga bajya kwishyura

Yanditswe kuya 7-11-2016 saa 10:30' na IGIHE


Ikigo RSwitch gikora amakarita yifashishwa mu kubikuza no kwishyura amafaranga (Smartcash), gitangaza ko nta kabuza gahunda u Rwanda rwihaye y’uko nta munyarwanda uzaba akigendana umuzingo w’amafaranga ajya kwishyura mu 2020 izagerwaho, bitewe n’uko gikomeje kuyirufashamo kibakorera amakarita ahendutse kandi yoroheye buri wese kuyakoresha.

Muri iyi gahunda, RSwitch yiyemeje kwagura uburyo bwo kwishyura hakoreshejwe ikoranabuhanga, hagamijwe korohereza no guteza imbere uyikoresha n’ubukungu bw’igihugu muri rusange.

Umuyobozi mukuru wa RSwich, Jean Claude Gaga, aganira na IGIHE yagize ati “Intego yacu ni ugufasha Abanyarwanda kwishyura no kubikuza amafaranga biboroheye, kuko gukoresha SmartCash hishyurwa ibicuruzwa na Serivisi ahantu aho ari ho hose mu gihugu, ni yo nzira nziza yo kugana ubuzima bwo kutagendana umuhambiro w’amafaranga.”

Avuga ko iki kigo gikora amakarita ahendutse kandi yorohereza itangwa rya serivisi za banki no kwishyura ibicurzwa ku buryo bworoshye ndetse bubangukira buri wese yaba banki cyangwa umukiyiya wayo.

Avuga ko umumaro w’iyo karita uzwi na buri wese kuko ngo bishimishije kubona umuntu adakenera kwishyura ngo yirirwe yikoreye amafaranga, cyangwa ngo yirirwe atonze umurongo ategereje ko muri banki bamubikuriza amafaranga kuko uyifite abasha kwishyura ibyo ashaka aho yaba ari hose.

Gaga yakomeje avuga ko batangije uburyo bwo guhuza serivisi za Mobile Money, Tigo Cash na Airtel Money n’amabanki hakoreshejwe umuyoboro bise eHuriro. Ubu buryo bufasha kwagura isoko ku batanga servisi ndetse n’umukiriya akisanzura mu guhererekanya amafaranga mu buryo butekanye.

Yasabye abanyarwanda kurushaho kwitabira uburyo bw’ikoranabuhanga kuko byihutisha ibikorwa byabo, ndetse bikanagabanya umwanya bajyaga batakaza mu nzira bajya kubitsa cyangwa kubikuza.

Yagize ati “ Iyo ufite iyi karita ubasha kwishyura ibyo ushaka byose kandi aho uri hose, ariko iyo utayifite ujya muri banki kubikuza amafaranga, ukabanza kujya ku murongo, bayaguha ugasohoka ugatega moto, kuki abantu badatekereza agaciro k’uriya mwanya batakaza?”

Ikarita ya Smartcash ikorerwa mu Rwanda, ifite uburyo bwemewe ku rwego mpuzamahanga bwo gucunga umutekano w’amafaranga y’umuntu kuko ifite ahabikwa amabanga hitwa ’Chip’ ku buryo nta muntu n’umwe wabasha kumenya amakuru abitse kuri iyo karita.

Yagiriye inama buri wese yo kwihutira gukoresha uburyo butandukanye bw’ikoranabuhanga muri gahunda zose z’amafaranga, kuko ngo gukoresha ikarita ya Smartcash byongera byibuze 50% y’umutekano w’amafaranga y’umuntu.

RSwich yatangiye gukora amakarita ya Smartcash mu 2012. Kuva icyo gihe amakarita angana na 50% by’ayakoreshwa mu gihugu yakozwe nabo, kandi ngo abayakoresha bishimira uburyo ahendutse.

Gaga yashimangiye ko RSwitch ari inkingi y’iterambere ry’ibikorwa bigamije kuzamura ikoranabuhanga ry’amabanki ndetse na mobile money kandi ko iki kigo gishingira gahunda z’ubucuruzi bwacyo kuri politiki ya leta y’ikoranabuhanga mu kwishyura.

Ati “Kuba mu Rwanda dufite abanyarwanda bagera kuri 89% bakoresha serivisi za banki na mobile money, biduha ishema kuko ni yo ndorerwamo y’umusanzu w’ibyo dukora.”

Yibukije ko kwishyura hakoreshejwe ikarita ya Smartcash ku tumashini twa POS ari ubuntu kandi byihuta, ku buryo bidakwiye ko umuntu ata umwanya ajya kuri banki bitewe n’uko isa n’aho iba ari yo aba agendana mu kiganza cye.

Gaga uyobora RSwitch, avuga ko bagamije gufasha leta n'abanyarwanda kugera ku ntego yo kwimakaza ikoranabuhanga muri serivise z'imari

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved