00:00:00 IGIHE NETWORK KN KINYARWANDA EN ENGLISH FR FRANCAIS

RRA yashimiye abasora bitwaye neza Iburasirazuba, ibaha umukoro

Yanditswe na Hakizimana Jean Paul
Kuya 9 Ugushyingo 2021 saa 10:44
Yasuwe :
0 0

Ikigo cy’Igihugu cy’Imisoro n’Amahoro, RRA, cyashimiye abasora bitwaye neza kurusha abandi mu Ntara y’Iburasirazuba mu mwaka wa 2020/2021, bahabwa umukoro mushya wo kuzinjiza arenga miliyari 6 Frw ku mafaranga binjije umwaka ushize.

Byabaye mu gikorwa cyo gushimira abasora bo mu Ntara y’Iburasirazuba ku nshuro ya 19 cyabereye mu Karere ka Nyagatare kuri uyu wa Kabiri tariki ya 9 Ugushyingo 2021.

Bamwe mu basoze neza bahembwe harimo umucuruzi wahize abandi mu gukoresha neza EBM aho yabaye sosiyete ya B&C General Ltd ya Budeyi usanzwe ucuruza ibinyobwa bya Bralirwa mu Karere ka Kayonza, iyi yatanze inyemezwabishyu za miliyari 5 Frw. Umuguzi watse inyemezabwishyu nyinshi kurusha abandi yabaye Twahirwa Emmanuel wo mu Karere ka Bugesera.

Mu basoze neza kurusha abandi bahembwe harimo Vinit International, uruganda rukora ibisuguti mu Karere ka Rwamagana aho rwinjije umusoro ungana na miliyoni 256 Frw, Ayateke Star Company ikorera mu Karere ka Kirehe izwiho gutanga serivisi z’amazi yinjije miliyoni 144 Frw, Cost Wise contractors Ltd izwi mu bwubatsi yinjije miliyoni 134 Frw.

Hanahembwe H.M business yasoze arenga miliyoni 80 Frw, Escale Group Ltd yinjije miliyoni 79 Frw, Life Holistic Ltd yinjije miliyoni 23 Frw z’umusoro mu gihe Nganila Company Ltd imenyerewe mu kuvidura amazi y’imyanda yinjije miliyoni 20 Frw.

Komiseri Mukuru wa RRA, Ruganintwari Pascal yashimiye abasora bitwaye neza, abasaba gukomeza gusora neza batanga inyemezabwishyu ya EBM.

Yakomeje agaragaza ko Intara y’Iburasizuba yinjije imisoro y’imbere mu gihugu ya miliyari 35.74 Frw ku ntego ya miliyari 33.7 Frw, umuhigo ukaba wareshejwe ku gipimo cya 106%.

Ku misoro n’amahoro RRA ikusanyiriza mu turere, iyi Ntara yinjije miliyari 13.74 Frw mu gihe intego yari miliyari 13.51 Frw.

Bamwe mu bahembwe kubera gusora neza, bavuze ko nubwo umwaka ushize icyorezo cya COVID-19 kitatumye bakora neza nk’uko byari bikwiriye bike binjije bashoboye gukuraho umusoro.

Ndahimana Vincent uhagarariye sosiyete ya ESCALE Ltd iri mu zahembwe, yavuze ko kimwe mu byabafashije harimo kwiyumvamo ko amafaranga binjije agomba kuvaho umusoro ugafasha Leta mu bindi bikorwa by’Iterambere.

Ati “ Iyo uri umuntu n’ubundi usanzwe utekereza ko umusoro ukureba, wakagombye kuwutanga uzi n’icyo umaze haba mu gihe cyiza n’ikibi urakora ukawutanga. Ntabwo bagusoresha icyo utakoreye n’ubundi bagusoresha ku byo winjije.”

Sebikwekwe Cyprien ukuriye sosiyete ya Ayateke ikwirakwiza amazi we yagize ati “Dufite uburyo dukoresha ku buryo nta nyemezabwishyu dusohora tutayinyujije muri EBM, impamvu no mu bihe bitoroshye twakoze cyane amazi ducuruza yarakenewe cyane muri COVID-19 bituma dukuraho umusoro mwinshi dutanga muri Leta."

Guverineri w’Intara y’Iburasirazuba, Gasana Emmanuel, yashimiye abasora bitwaye neza n’umusanzu batanze mu kubaka igihugu , yizeza RRA ubufatanye mu kongera umusoro.

Ati “Inshingano twe dufite ni ugukora ubukangurambaga bushoboka tugahindura inyumvire y’abaturage basora kugira ngo basore neza."

Intego ku Ntara y’Iburasirazu mu mwaka wa 2021/2022, ni uko hazinjizwa imisoro y’imbere mu gihugu ingana na miliyari 39.1 Frw.

Komiseri Mukuru wa RRA, Ruganintwari Pascal yashimiye abasoze neza, abasaba gukomerezaho
Guverineri w'Intara y'Iburasirazuba Gasana Emmanuel we yijeje RRA ubufatanye mu kwigisha abaturage n'ubukangurambaga bwatuma basora neza
Abasora mu Ntara y'Iburasirazuba basabwe gukomeza gusora biyubakira igihugu
Mu mwaka utaha, abasora bo mu Burasirazuba biyemeje kurenza miliyari 6 Frw kuyo basoze uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .