Raporo ya Banki y’Isi yashyize u Rwanda mu bihugu bifite ubukungu bukomeje kwihagararaho

Yanditswe na Rabbi Malo Umucunguzi
Kuya 20 Mata 2017 saa 09:08
Yasuwe :
0 0

Banki y’Isi yagaragaje ko u Rwanda hamwe n’ibindi bihugu bitandatu byo ku mugabane wa Afurika bikomeje kwihagararaho, aho byagize ubukungu bwakomeje kuzamuka hejuru ya 5.4%, hagati ya 2015-2017.

Raporo ya ‘Africa’s Pulse’ ikorwa na Banki y’Isi kabiri mu mwaka nk’isesengura rigagaragaza uko ubukungu bw’ibihugu bya Afurika bihagaze, yasohotse kuri uyu wa 19 Mata 2017 igaragaza ko ubukungu bwa Afurika yo munsi y’Ubutayu bwa Sahara bushobora kuzamuka kuri 2.6% mu 2017.

Inagaragaza ko hari ibihugu byakomeje kugenda byihagararaho mu bukungu, birimo u Rwanda, Côte d’Ivoire, Ethiopia, Kenya, Mali, Senegal na Tanzania byakomeje kuzamura ubukungu bwabyo hejuru ya 5.9%.

Ikomeza igira iti “Ibi bihugu nibyo birimo 27% by’abaturage bose b’aka karere bikanagira umusaruro mbumbe wa 13% w’akarere kose. Ubukungu bw’Isi buri kugenda buzahuka, ibintu bishobora kuzafasha cyane izahuka ry’ubukungu bw’akarere.”

IKigo cy’Igihugu cy’Ibarurishamibare giheruka gutangaza ko ubukungu bw’u Rwanda bwazamutse ku gipimo cya 5.9% mu 2016, ndetse Ikigega Mpuzamahanga cy’Imari (IMF) giheruka kuvuga ko hari icyizere ko muri uyu mwaka wa 2017 buzazamuka kuri 6.2% hashingiwe ku musaruro wa Kawa na gahunda ya ‘Made in Rwanda’, mu 2018 bukazagera kuri 6.6%.

Raporo ya Banki y’Isi ivuga ko muri uyu mwaka ubukungu bw’ibihugu byo munsi y’Ubutayu bwa Sahara buzazamuka, nyuma y’ibihe bikomeye mu myaka ishize.

Ikomeza igira iri “Aka karere kari kugaragaza ibimenyetso byo kongera kwisuganya, ku buryo izamuka ry’ubukungu rizagera kuri 2.6% mu 2017. Ariko izahuka ry’ubukungu riragenda gahoro kuko buzazamuka ku ntera itari nini ugereranyije n’izamuka ry’abaturage, umuvuduko ushobora kubangamira gahunda zo guhanga imirimo no kugabanya ubukene.”

Banki y’Isi inavuga ko Nigeria, Afurika y’Epfo na Angola nk’ibihugu bifite ubukungu bunini kuruta ibindi muri Afurika, nabyo biri kuzahura ubukungu bwabyo nyuma ya 2016 yari itoroshye, ariko ngo ntibyihuta bitewe n’ibiciro ku isoko mpuzamahanga na politiki zidahamye.

Izamuka ry’ubukungu bw’Isi muri rusange ngo rishobora gutiza imbaraga izamuka ry’ubukungu bwa Afurika, Africa’s Pulse ikavuga ko buzazamuka ku mpuzandengo ya 3.2% mu 2018 na 3.5% mu 2019.

Umuyobozi ushinzwe ibirebana n’ubukungu bwa Afurika muri Banki y’Isi, Albert G. Zeufack, avuga kuri iyi raporo, yagaragaje ko hakenewe ko ibihugu bishyigikira ishoramari kugira ngo ribashe kugira umusanzu mu kongera kwisuganya k’ubukungu bw’ibihugu muri Afurika y’ubutayu bwa Sahara.

Yakomeje agira ati “Dukeneye gukora impinduka zongera umusaruro w’abakozi b’Abanyafurika no kubaka gahunda zihamye zishyigikira ubukungu bw’ibihugu. Imirimo myiza kandi itanga umusaruro ni ingenzi mu kurwanya ubukene kuri uyu mugabane.”

Iyo raporo yitsa cyane ku gushyigikira iterambere ry’ibikorwa remezo, ibintu ngo bishobora guhita byongera 2.7% ku musaruro mbumbe w’umugabane.

Ivuga ko gushyigikira ishoramari rya leta n’iry’abikorera cyane cyane mu bikorwa remezo ari ingenzi, aho umuvuduko w’ishoramari wagabanyutse mu myaka ishize ukava ku 8% mu 2014 ukagera kuri 0.6% mu 2015.

Ibyo ngo byakorwa binyuze mu bufatanye bwa za leta n’abikorera, ibintu bitarahabwa umwanya uhagije mu bihugu byinshi bya Afurika. Inasaba ko hashyirwa mu bikorwa amavugurura agamije kuzamura inzego ziteza imbere ishoramari ry’abikorera, guteza imbere amasoko y’imari n’imigabane mu bihugu no kongera ubushobozi ku masoko y’imbere mu gihugu.

Perezida wa Banki y'Isi,Jim Yong Kim, (ubanza ibumoso) kuwa 21 Werurwe 2017 ubwo yasuraga agace kahariwe inganda muri Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza