RAB yatsembeye Abadepite ko idashobora kwishyuza miliyoni 610 yambuwe

Yanditswe na Uwishyaka Jean Louis
Kuya 27 Nzeri 2016 saa 08:07
Yasuwe : XX
0

Umuyobozi Mukuru w’Ikigo cy’Igihugu gishinzwe Ubuhinzi n’Ubworozi (RAB), Dr Gahakwa Daphrose, yatangarije abadepite bagize Komisiyo ishinzwe gukurikirana imikoreshereze y’umutungo wa Leta (PAC), ko iki kigo cyananiwe kwishyuza umwenda wa miliyoni 610 kiberewemo n’inzego zitandukanye harimo n’iza leta nk’uturere.

Aya mafaranga RAB ibarwaho ngo ni ay’icyahoze ari RADA (Rwanda Agricultural Development Authority) cyari cyaragurije uturere mbere y’uko iki kigo gihinduka RAB.

Umuyobozi wa RAB yavuze ko ikigo ayoboye cyagerageje ibishoboka byose ngo cyishyuze aya mafaranga ariko gikomeza guhura n’inzitizi zituma babura uwo bayishyuza ku buryo kuri ubu ngo bamaze kuyahara.

Raporo y’Umugenzuzi Mukuru w’Imari ya Leta ku kigo cy’Ubuhinzi n’Ubworozi, yagaragazaje ko gifitiwe umwenda n’uturere ungana na miliyoni 610. Iyi raporo kandi inagaragaza ko RAB ubwayo ifitiye ibindi bigo ideni rya miliyoni 114.

Abadepite muri iyi Komisiyo babajije abayobozi ba RAB icyo bari gukora ngo bishyuze aya mafaranga arimo ayo RAB iberewemo n’abantu batandukanye ariko akaba nta nyandiko n’imwe ibigaragaza, bikanatera amakenga y’uburyo azishyuzwamo. Aha Dr Gahakwa yakuriye inzira ku murima Abadepite ababwira ko iki kigo cyananiwe kwishyuza ako kayabo.

RAB yatangaje ko bibabaje kubona Umugenzuzi w’Imari ya Leta akibara uyu mwenda kuko ngo bari barasabye ko wahanagurwa, ariko akaba akiwubara.

Dr Gahakwa yagize ati “Ni ikintu kibabaje cyane kubona ko yawusubijemo (umwenda), twari twasabye ko bawuhanagura kubera ko byari byaratunaniye kuwishyuza pe! Ni wa mwenda twimukanye tuva muri RADA na RARIDA, ukaba uri mu turere tutakiriho.”

Akomeza agira ati “Nk’ubu hariho nk’akarere ka Bugaragara, ni urugero gafitiye RARIDA umwenda, natwe tukajya kwishyuza akarere ka Nyagatare, tukananirwa kugaragaza uko uwo mwenda uteye kuko akarere ka Bugaragara ntaho byanditse ko kahaye akarere ka Nyagatare umwenda wa RARIDA.”

Dr Gahakwa avuga ko mu bitabo bya RAB ari ho handitse ko iki kigo cyahaye uturere runaka umwenda wenda w’intanga z’amatungo, inkingo cyangwa n’ibindi ariko ngo uko inzego zagiye zihinduka ngo aya madeni yagiye yibagirana.

Uyu muyobozi kandi avuga ko Umugenzuzi w’Imari ubwe yari yaragiriye RAB inama yo kumenyesha inzego z’ubuyobozi bwa leta zikandukura mu bitabo iby’iri deni, ibi ngo RAB ni byo yabashije gukora ariko ibyo kwishyuza byo ngo ntiyabishoboye.

Yagize ati “Nta gihe natanga aha ngaha ngo mvuge ko tuzawishyuza kuko abo twishyuza byaricanze, ni umwenda umaze igihe kirekire rwose, akaba umwenda udusebya kuko twagerageje kuwishyuza biranga. Nta wundi mwenda uzongera gutangwa muri RAB kuko ndibaza yuko ingaruka zo gutanga umwenda twazumvise. Tuzajya kuganira n’Umugenzuzi w’Imari turebe ukuntu yawukuraho kuko abaturimo umwenda ntibawemera abandi ntibanahari.”

Ibigo bya RADA (Rwanda Agricultural Development Authority) cyari gishinzwe ubuhinzi, RARDA (Rwanda Animal Resources Development Authority)cy’ubworozi ndetse na ISAR (Rwanda Agricultural Research Institute) yari ishinzwe ubushakashatsi mu buhinzi ni byo byahurijwe hamwe bibyara RAB. Ideni RAB ivuga ko yananiwe kwishyuza ryatanzwe n’ibi bigo.

Dr Gahakwa Daphrose (hagati) yavuze ko umwenda babarwaho wabananiye kuwishyuza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza